「續寫」無啦啦多左幾個家姐同阿妺: 警告你

我：「唔係呀？蘭姨帶左佢去玩咋？點會唔見左呀？」

Sarah：「唔係呀！蘭姨佢…學校…打電話…」

Sarah一邊講一邊喊，甚至連一句完整既說話都講唔到。

我見到佢咁就即刻拎左兩張紙巾上前安慰佢，叫佢慢慢咁講哂成件事出黎。

但係佢可能真係嚇親，喊到收唔到聲，講左好耐都仲係講到一舊雲咁。



最後我係Yui既幫助下用左十分鐘左右終於大概明白成件事到底係點。

首先，蘭姨今日中午左右收到一個電話話羽晨學校今日有事會放遲一個鐘頭。

蘭姨見對方up得出羽晨咩班咩名，講野又有紋有路，所以就信左，遲左一個鐘去接羽晨。

講到呢度結果係點相信大家都好清楚啦，當蘭姨去到學校果陣，羽晨就已經比人接走左。

Sarah：「點算好呀阿明，羽晨佢會唔會有事架..」



我：「唔會既，羽晨咁乖，一定唔會有事既，Yui你陪住Sarah先，我去一去洗手間。」

Yui：「知道。」

講完我就離開細廳，不過我並唔係去洗手間，而係去二家姐房。

相信咁大件事，二家姐已經收到消息，去問下二家姐打算點做都好。

去到二家姐房，見到房門打開左，但係入面無人。



應該係去左書房。

我跟住自己既直覺行去書房，未開門已經聽到二家姐把聲，佢係度破口大鬧，唔知鬧緊邊個。

我聽到咁就門都費事敲，直接入去就算，反正敲左都無乜意思。

點知我一推門入到去，就有一個煙灰缸迎臉向我飛埋黎。

好彩我行路會望前面，如果唔係的話真係會爆頭。

二家姐：「你點會咁容易信呢D電話架！！」

原來二家姐鬧既人係蘭姨。

蘭姨：「對唔住呀二小姐，我真係無諗過會有人打細小組主意…」



二家姐：「你！…」

大家姐：「算啦阿May，而家你係度鬧蘭姨都係無用，蘭姨你出返去先喇。」

蘭姨：「知道大小姐..咁我返出去先喇…」

蘭姨講完就係我旁邊出左去，我偷偷見到蘭姨神情非常哀傷。

咁又難怪既..佢而家唔多唔少都覺得係自己責任。

有心人玩無心人，又點可以怪哂蘭姨呢。

奇怪，點解我而家會咁冷靜既，我應該好似二家姐咁咁激動架。



我執起頭先個煙灰缸，慢慢行去大家姐佢地個度。

我：「我地而家應該點做？」

大家姐：「咦阿明？哦你都知道左喇..我打算報警。」

二家姐：「無用架，羽晨而家都只係唔見左幾個鐘頭，我地又未收到咩勒索電話，警察唔會理架。」

大家姐：「咁唔係我地可以點做？唔通真係咩都唔做？羽晨佢而家一定好驚，等緊我地去救佢..」

大家姐講講下突然喊起上黎，同頭先咁冷靜既佢完全係兩個人。

一講到可以點做，大家都靜左落黎，望住個地板。

「等喇，我地而家唯一可以做既就只有等。」



二家姐打破沉默，講左我地最唔想做但又真係而家唯一可以做既選擇出黎。

二家姐：「若然對方只係求財的話，一定會打比我地，到時候再諗啦。」

雖然唔想接受呢個辦法，但真係真只可以咁。

只係希望羽晨而家安全。

偏偏係呢個時候我個腦先全部都係羽晨個樣，唉…

等啊等，等到差唔多八點，我地都仲未收到咩勒索電話，就連電話都無響過。

七點開始既晚飯，到差唔多八點都仲係度郁都無郁過，成檯餸原封不動咁放係度。



大家都無心情食，我仲留意到佢地一直望住平時羽晨坐既位。

唉…

大家姐：「不如都係…」

「叮噹！~」

一聽到門鐘聲，大家都望過去大門既方向，蘭姨更加係第一時間衝過去開門。

同所有在場既人期望既一樣，門後既人係羽晨，一個可愛到不得了既小妹妹。

羽晨：「我返黎啦！ 」

大家姐：「你去左邊度呀羽晨！擔心死大家姐我啦！」

羽晨：「咩啊，唔係你地有事要做，所以先叫呢幾個哥哥帶我去玩架咩？」

幾個哥哥？

我望向羽晨指既方向，見到幾個戴哂黑超既西裝友企係門口度。

我唔知邊度黎既勇氣，行左去呢幾個人面前。

我：「點解要帶走我細妹。」

西裝友：「你就係陳煒明先生？」

我：「無錯，到底點解要帶走我細妹！你地係咩人！」

西裝友：「我地既老闆想同陳先生你合作，佢吩咐我地交呢份文件比你，請你睇下。」

另一個西裝友拎左一個公文袋交左比而家講緊野既西裝友，最後轉交到我手。

我並未即刻打開呢個公文袋，因為我知道九成唔會係好野，所以我決定一直啤住佢地。

我：「如果我話我唔想合作的話，會點？」

靜左。大家都靜左一陣。

「咁下次就未必會係咁既結局。」

「我地走。」

呢幾個西裝友講完就上車離開，野都無講多句。

我好清楚，今次帶走羽晨既人唔係為左錢或者咩野，對方既目的係我，係想借今次警告我，唔知想我做乜。

雖然暫時仲唔知對方到底想做乜，不過對我屋企人落手其實太…

呢份文件會係咩黎架呢…