「續寫」無啦啦多左幾個家姐同阿妺: 知情權
愛麗絲走左之後我諗左好耐，最後我都係決定將成件事講埋比Anna，Ellen同Ellie知。
我只係覺得佢地有知情權，我唔應該有野瞞住佢地既。
所以我就透過Whatsapp Group講比佢地知，而且再三強調唔好同任何人講呢件事同埋唔洗擔心我唔會訂婚，希望可以令佢地安心。
不過佢地無人覆，個個都已讀不回，由佢地啦，係要d時間消化下既件事咁突然。
話唔話埋比阿威佢地知好呢？算啦都係唔好住。
唔係話信佢地既，不過呢件事愈少人知就愈好，尤其阿惠把口好疏，所以都係唔講好D。
Yui：「阿明…」
我：「咦？送左愛麗絲走嗱？」
Yui：「係啊…」
我：「估唔到愛麗絲原來係個咁既人喎，真係幾似Ellen呀可？
」Yui：「係啊…」
咦…？好似有D奇怪咁既佢？
我：「Yui你係咪有咩事？做乜好似怪怪地咁既？」
我一邊講一邊擰轉臉，發現Yui頭dup dup，緊握雙手咁企左係度。
見到佢咁我就突然間慌起黎，覺得佢有心事，仲要係唔開心果種。
雖然話Yui平時唔係好似Sarah佢地咁咁鐘意講野，但係我都仲可以分到佢幾時係唔開心既。
我：「Yui！你做乜呀？係咪發生左咩事？
」Yui：「阿明呀…你會唔會有事架？」
哇，Yui用佢果對水汪汪既眼加上楚楚可憐既表情望住我講，我真係忍唔住，即刻上前攬住佢。
Yui總係有一種令我好想保護佢既感覺，雖然我自己好弱，但都係好想保護佢。
我：「我？我會有咩事呀傻豬。」
Yui：「因為頭先聽你地講又臥底又幕後黑手咁，我睇電視有呢D野都好危險，我怕阿明你…」
哈哈，好萌好呆呀佢，居然話睇電視知道呢D野好危險。
我：「無事既~`我地講得誇張左D啫，我會無事既。」
Yui：「係咪真架…阿明你對我好重要…我唔可以…」
我：「大丈夫！萌大奶！」
Yui：「萌大奶..？係咩意思？
」我：「即係話無問題咁解！我一定會無事架，因為我仲要服待你地幾位公主嘛！
」我一邊講一邊輕輕掃Yui個頭，希望佢可以安心。
Yui：「嗯！阿明加油！
」呢招果然有用。
不過聽到Yui話我對佢好重要，唔可以無左我我真係好開心，感覺到自己被人需要被人愛。
我一定要儘快解決呢件事，再同佢地好好過開心既日子。
或者今次之後，我主動退出七星好唔好呢？
返到學校，我第一時間就係帶埋Sarah去搵Anna佢地。
Sarah係星期日聽到愛麗絲講哂所有野之後已經變返之前咁，仲係咁話佢可以幫手查，當玩柯南咁。
唔係喎，柯南次次都死人，我唔想今次會有人死啊，咁應該用咩形容好呢？
唉我唔知呀，呢d小事就唔好理咁多喇！
我：「點呀Anna姐，仲嬲緊呀？」
Anna：「唉真係唔識講你呢個人，點解我硬係嬲唔落你架呢？」
「點解你份人成日都會惹咁多火頭架？仲要一次比一次嚴重，唉真係令人好擔心架你知唔知？」
我：「係係，係我唔岩，對唔住大佬。」
Anna：「咁你要應承我…唔係，應承我地，以後有咩事第一時間同我地商量，得唔得？」
我：「當然無問題啦，我原本都無打算瞞你地，只係今次呢件事唔係好可以俾咁多人知，我先無第一時間…」
Anna：「明架啦，你萬事都要小心呀，對方唔知會唔會真係想你死，一定要小心。」
我都未講完，Anna就已經行左上黎攬住左我。
啊，點解一個動作就可以令人咁安心，真係神奇。
我：「咁Ellen你地呢？係咪仲..」
Ellen：「乜你咁架，攬住另一個問我感受？好過分囉。」
係喎咁好似真係有少少過分，咦..？
我想退後，但係Anna仍然捉到我實一實。
Anna：「哼，答你就答喇，我係唔會放手架。」
Ellen：「吖你！我而家真係有少少嬲啦！」
Anna：「聽到啦阿明，佢頭先唔嬲架。
」Ellen：「Anna！！
」哈哈…咁得意既你地…
Ellie：「阿明，你要小心吖，因為…」
Ellie故意唔講完成句野，仲邊講邊周圍望，應該係提示我身邊可能有耳目。
我：「嗯我明白，我而家就係去查呢件事，係啊你地無同其他人講架嘛？」
Ellen：「梗係無啦，我連Daddy媽咪都無講添呀！」
Ellen講呢句野既時候特別大聲，周圍既人都望住我地。
我：「嗯，咁就好啦，係啦我都係時候要去搵…」
阿惠：「有咩唔比得我地知吖你班可惡既幸福小情侶？」
咦岩岩想去搵佢地佢地就出現啦，慳番唔少功夫。
我：「無…」
屌，頭先Ellen講到咁大聲搞到比阿惠佢地聽到添，用咩理由過骨好呢。
Ellie：「我地打算遲D六個人一齊去一次旅行，但係想秘密進行，唔比我地父母知道。」
嘩！Ellie你轉數真係快！咁你都諗到既！
Anna：「係吖，比我知道你地是但一個爆左出去的話我就殺。左。你。」
阿惠：「知道Anna哥！我一定唔會講出去！」
Anna：「講左幾多次唔好加個哥字！」
Anna講完就狠狠咁打個阿惠個肚一拳，阿惠即刻訓左係地下，大家睇到咁都笑左出黎。
阿威：「阿明，之前你Whatsapp我地講既野…」
我：「啊係，我地換個地方傾啦，喂阿惠唔好詐死啦，去做正經野啦。」
阿惠：「真係痛架屌你…」
Alex：「唉等我扶你啦，俾個女仔打一拳就搞成咁，無用。」
阿惠：「痴線你試下比佢打一拳吖！佢男人黎架！」
阿威：「嗱我就建議你行快D，我覺得Anna姐聽到你講野，想保住條命就行快兩步。」
阿惠：「屌！走呀！」
阿惠講完就一馬當先咁跑係我地面前，我地想追都追唔到。
學嘉美尤話齋，生命既界限真係遠遠超出我地既想像…
我地四條仔之後上左天台傾，因為係呢度就唔怕比其他人聽到。
阿惠：「喂大佬明聽講你星期六又得罪左d不得了既人喎！仲要係個靚女黎？」
我：「點解要用個又字…我成日得罪人咩而家？不過你點解會知既？你又無去到。」
阿威：「呢d野一傳十，十傳百架啫，尋日有個uncle同我老豆食飯講起，所以我地咪知囉。」
我：「哦原來係咁…唉唔好再講啦，直頭係惡夢。」
阿惠：「個愛麗絲靚唔靚架？聽講係個好霸道好記仇既人？」
我：「係好撚靚！至於性格呢…」
「今日我地講既野千奇唔好同外面既人講，以免走漏風聲。」
我突然記起愛麗絲講既野，再望住阿惠呢個大喇叭，我即刻吞返準備講出口既野。
我：「性格我唔太清楚呀，不過佢果日同我講野都好有骨，仲好似嬲左我咁。」
Alex：「嘩咁聽落阿明你而家好似一身麻煩喎，無事吖嘛？」
我：「暫時係無乜野既…係啦我地快d入正題啦，我想查下寄俾果四個七星既邀請信係邊度黎。」
阿威：「如果要查的話範圍好大架喎，不如叫埋Anna佢地…」
Alex：「唔好，咁大陣象的話好易打草驚蛇，我地四個秘密咁查會好D。」
我：「岩，寧願慢慢黎都唔好打草驚蛇。」
阿惠：「講到好似玩偵探game咁又幾正，但係具體我地應該點做？」
阿惠講完之後大家都靜左落黎，靜到連風聲都可以聽到。
係喎，話就話要查，不過到底應該點查好呢？