「續寫」無啦啦多左幾個家姐同阿妺: 給我滾
起初阿天並未注意到Alex望往佢，佢推低左Ash仲打算繼續向前行，但係其他人既目光令佢停步，最後佢先注意到Alex既存在。
阿天：「你望乜野呀？」
阿天極其挑釁既語氣猶如扣下左扳機咁，令Alex爆發。
Alex帶住一個極為恐怖既表情，一言不發咁撲左上去，阿天身邊既保鏣甚至都黎唔切反應，搞到阿天成個人被Alex推左落地。
同Ash果下唔同，Alex並唔係只係推左阿天落地咁簡單，而係再向阿天重重咁打左一拳。
呢一拳，令全場既人都沉默左落黎。
阿天既保鏣甚至呆左一秒，之後先捉住Alex。
我見勢色唔對都即刻衝上去，隔開佢地兩個，同係班保鏣手上救返Alex。
但係Alex個樣仍然好似意猶未盡咁，仲係好想衝上去，我好辛苦先同岩岩起返身既Ash㩒住佢。
我從未見過Alex個樣咁嬲，咁近睇直頭覺得有少少恐怖。
「夠膽打我？你夠膽打我？」
唉，我寧願你唔好再講野。
阿天唔知幾時企返起身，同佢班保鏣向我地步步進逼。
我：「快D走，呢度交俾我處理就可以，你地快d離開呢度先。」
Alex好似聽唔到我講野咁，繼續咬牙切齒咁望住阿天，真係成隻獅子咁。
我情急之下別無他選，只好用少少力打左Alex一拳，再推走佢。
出符意料既係，係我地身後既同學們好有默契咁讓開左一條路比Ash同Alex走。
我甚至見到有幾個同學幫手挾走佢兩個。
真係唔該哂大家，好，處理返件事先。
阿天：「你咁係咩意思先？包庇自己人？比佢打完我就咁走左去？」
我：「你頭先做過咩事，你自己好清楚。」
阿天：「做過乜？條女掂到我，我推開佢好正常，有錯咩？」
嘩你呢個人真係…我都開始嬲嬲地啦。
唔只我一個，我身邊既人聽到佢咁講都嘩左出聲。
「wow wow wow，大家都冷靜冷靜，唔好咁火先。」
阿惠唔知係邊度彈出黎，今次隔開左我同阿天，不過阿天好似無將阿惠放在眼內，想一手撥開阿惠。
只係，阿惠居然接住呢一下。
呢個場面…點解好似似曾相識？
阿天對於阿惠呢個舉動似乎唔感到意外，仲好快縮手。
阿天：「行開，我唔係同你講野，唔好阻住我。」
阿惠：「係咩？但係我大佬叫我咁做架喎。」
阿天：「大佬？哼，真係一個粗俗既稱呼，下等人真係下等人，聖所羅王…」
阿惠並未等到阿天講完佢果d自以為高人一等既說話就已經送多一個膝撞比佢，阿天即時成個人跪左係度。
阿惠：「我大佬仲話，呢間學校並無人係下等人，大家都係一樣。」
我奇怪既係點解阿天既保鏣並無出手阻止，原來佢地已經被Anna安排既保安隔開左，埋唔到阿天身邊。
阿惠：「大佬，之後應該點做。」
阿惠講呢句野既時候望住我，我就知道佢頭先講既大佬係指我。
可能係因為頭先阿天既種種舉動激嬲左我，我好爽快咁接受左呢個突如其來既「大佬」身份，行左去阿天面前。
當時佢仲係跪左係地下，所以我係用一個俯視既角度望住佢。
我：「你頭先，話自己無錯？」
阿天：「錯？你既人郁手打我先有錯吖，我咩身份你知唔知？」
阿天好似好唔鐘意被人用一個高高在上既姿態望住，見到我行埋黎就即刻起身。
可惜既係，阿惠再請佢食多腳，不過今次呢腳並無令阿天訓低，只係好辛苦咁掩住自己個肚。
阿惠：「我無郁手呀，我用腳咋。」
阿惠用佢平時果種玩玩下既語氣搞到圍觀既人都笑左出聲。
不過我就無笑，因為我仲有正經事要處理。
我：「你推我朋友落地就岩，我朋友打你就唔岩，我想問下呢個係咩道理？」
阿天：「身份問題，我點知佢會唔會係咩殺手？我係七星，全香港社會最上層既人，肯定大把人想綁架我，勒索我屋企，我咁做係保障自己。」
佢滿口歪理實在令我忍唔住怒火，一拳打左落去。
我：「唔好意思，今日呢度我話事，七星都唔例外。」
阿天：「你夠膽打我！？」
阿天馬上就回敬我一拳，我亦無避，正面接左呢一拳，但係佢呢拳其實無乜力度。
阿天：「好！你要咁玩？我一定唔會放過你地，我而家就報警！告到你地死！」
我：「隨便，不過你頭先都打左我一拳，你報警的話我都會話俾警察知。」
佢呆左一秒。
阿天：「哼，原來你係咁先比我打，好，睇下邊個有錢打官司？」
我：「我諗你係咪唔記得左我都係七星？錢的話我估大家差唔多。」
佢聽完我咁講之後又再呆左一下，不過我今次無再等佢，我自己開口先。
我：「唔想再繼續丟臉就好同我即刻走，帶埋你果幾個保姆走。」
「今日係大家開心玩既日子，我唔會俾人係度搞事，我會用盡所有方法阻止人搞事。」
「若然你仲係想告我同埋我既朋友的話，我無任歡迎，你知道點樣搵到我。」
阿天：「你…」
阿信：「嘩嘩嘩，阿天你就唔岩啦，人地個女仔唔小心掂到你，你就推人落地，點睇都係你唔岩。」
另一個七星，阿信佢係人羣中穿出黎，右手仲拎住小食部賣既燒司華力腸。
阿天：「你收聲！我而家就call我屋企既special force黎！睇下到時你仲可唔可以咁得戚！」
「呢度你話事？睇下一陣係邊個話事？」
special force..？Shit無諗過佢顛到連呢d野都有添！
「夠喇！全部人同我停！」
係我地頭頂既喇叭突然傳出一個唔識既阿叔把聲。
雖然我唔知呢把聲既主人係邊個，不過我留意阿天佢聽到呢把聲之後就露出一個充滿自信既笑容。
好快，係我地右邊既圍觀既人羣好似被人分紅海咁分開兩邊，有個中年肥佬係中間帶埋一堆保鑣行過黎。
阿天：「爸！
」屌！係佢老豆？今次大鑊！
無諗過阿天老豆都會黎！今次真係仆街啦！
阿天見到佢老豆之後就一五一十咁將成件事講哂俾佢老豆知。
當然，有加鹽又加醋啦佢。
我起初仲以為佢老豆聽完之後會大發雷霆咁屌我話仲乜打佢個仔之類，但佢無咁做。
佢聽完之後好平靜，行埋去圍觀既人群度，仲同圍觀既人唔知講乜，講左好耐。
就連佢個仔阿天都唔知咩事，企係旁邊一臉疑惑。
講左唔知幾耐，佢終於行返埋黎中間，望住我。
阿天老豆：「你可唔可以同我解釋一下發生咩事。」
語氣非常平靜，完全feel唔到佢係嬲。
我：「我承認我同我朋友出手打令公子係有唔岩，但係令公子既處事方式實在太過份，我朋友先會忍唔住出手。」
「今日應該係個開開心心既日子，你見大家都玩得好開心，但令公子就只係因為一個女仔唔小心掂到佢而推人落地，仲用自己係七星去合理化自己既行為。」
「我只係想講，七星又好咩人都好，今日係呢度既人大家都係一樣，只係一個參觀者。」
「而我就係呢個項目既負責人，我有責任去維持秩序，破壞秩序既人我地唔歡迎，無論係咩人都好。」
「好似你旁邊既阿信咁，佢都係七星，但佢並無好似令公子咁搞事，所以我非常歡迎佢。」
佢對我講既野完全無反應，只係冷冷咁講左句：
「你唔怕我向你學校投訴你？」
我：「呢個完全係你既自由，你想的話請隨便投訴。」
阿天：「岩啦阿爸！投訴佢啦！等佢呢d野蠻人受下教訓都好。」
阿天係遠處叫囂，十足十果d有大佬撐腰既古惑仔咁。
「你同我收聲！！！」
阿天老豆突然發出震撼性既聲音，嚇到我呆左一呆。
「唔好意思，係我個仔唔岩在先，我代佢向你地賠罪。」
呢句又細聲返。
阿天：「阿爸...」
「我叫你收聲！！即刻同我走！仲未丟夠架？」
無錯，又係震撼性既聲音。
阿天老豆：「各位唔好意思，打擾到各位既雅興，我代犬兒向各位賠罪。」
「帶佢走。」
阿天老豆同佢身邊果堆保鑣講左呢三個字，佢堆保鑣就好似夾公仔咁夾走左阿天，一大班人咁向出口進發。
呼…我仲以為佢會撐阿天添，估唔到都係一個明白事理既人，總算可以鬆一口氣。
「細路。」
佢突然擰轉頭同我講野，嚇到我成個人彈起咁濟。
「你的確唔錯，我開始明白阿李點解要揀你。」
佢講完就同兩個保鑣再前進，今次無再回頭，一口氣行到去出口。
阿李？咩阿李？阿里巴巴？
啊！！佢講李生！屌諗死人咩就咁講阿李。
不過佢咁講，算係讚我？