「續寫」無啦啦多左幾個家姐同阿妺: 別碰我

「陳煒明，我地都有一段時間無見啦。」

我：「點解你地會黎？」

我之所以會咁驚訝，係因為黎既人唔係其他人，而係七星。

阿信，阿雪，諾儀，仲有岩岩開口講野既阿天，四個都黎哂，佢地既出現引起好多人既注意，因為佢地既排場都非常誇張。

明明只係一班後生仔女，居然每人都帶住三四個保鏣係身。連果d唔知佢地身份既街外人都大約估到佢地係咩來頭啦咁。



果d知道佢地身份既人就更加唔洗講，直頭嚇到傻左啦。

我甚至聽到我附近有人講左一句咁既野：

「六個七星居然會同時出現係呢度…」

我聽到咁我自己都出左一身冷汗，但出冷汗既原因並唔係單純因為六個七星同時出現。

我出冷汗既原因係我覺得佢地一定會搞D事出黎。



真係希望我既預感係錯。

阿天：「開放日，顧名思義就係對外開放架啦，唔通人地黎得我地就唔可以黎？」

屌，佢d態度令我唔好既預感更加強烈。

阿信：「我地係收到邀請卡所以黎架。」

邀請卡？邊個會寄邀請卡比佢地？



開頭我以為佢只係講下笑，點知佢即刻拎左張邀請卡出黎比我睇，張卡又係真架喎。

阿天：「做咩啊？俾埋邀請卡你睇你都係唔歡迎我地？」

我：「唔係，學你話齋開放日就係對外開放，當時歡迎你地，隨便玩。」

隨便玩三個字一出，阿雪即刻捉住我，搞到係我旁邊既Anna同Ellen即刻啤住我。

阿雪：「阿明阿明！今日係咪有CNBLUE睇架！！？？」

我：「eh…係吖，一陣會係體育場個邊…」

阿雪：「諾儀我地快D去霸個靚位啦咁！」

佢都未等人答佢就拉走左人，一支箭咁跑左去，阿天同阿信亦分別行左去唔同既地方。



呀…

我：「Anna，以防萬一你都係搵幾個保安離遠咁跟住佢地，唔好俾佢地搞咩事出黎。」

Anna：「唔洗你講我都會咁做。」

Ellen：「我都搵幾個朋友去跟住佢地喇。」

我：「嗯，麻煩你地啦，佢地有乜事就即刻搵我啦，我返學生會室先。」

大家開心既日子，唔可以俾佢地搞破壞。

雖然講係咁講，但其實我根本無野可以做，係處於一個非常被動既狀態。



佢地唔做任何舉動的話，我地係無任何理由趕佢地走的。

不過可以的話我都希望唔會出現呢個「理由」，因為一旦出現呢個理由，即係代表出左事。

出左事的話，大家都會唔開心，唉屌到底係邊個撚樣請佢地黎架，搞到成件事突然複雜左咁多。

阿雪同諾儀應該就唔會搞事既…阿信都應該唔會搞咩事既，最大問題係阿天…

我直頭覺得佢黎就為左搞事。

我一個人坐係學生會室入面，等待一d我唔想聽到既消息，真係諷刺。

我等啊等，等到我聽到運動場開始傳黎種種既歡呼聲，尖叫聲同埋音響聲，我都仲未收到有咩突發事件既報告。

唔通係我太多心？佢地真係只係黎玩下，無特別意思？



我忍唔住，決定自己出去睇下。

點知道我一出到去操場就有事發生。

我見到Ash被人推左落地，而推佢既人唔係其他人，正正就係阿天。

阿天：「唔好用你隻污糟手掂我。」

仆街，出事啦今鋪。

點解我會咁講？因為Alex當時就係Ash旁邊。

大家都知道，Alex係非常非常錫Ash，直頭係當Ash係公主咁。



而家阿天咁做Alex會有咩反應我都唔知道，但我成個人已經好驚，出哂汗咁。

因為Alex佢好似一尊石像咁郁都唔郁，只係望住阿天。