「續寫」無啦啦多左幾個家姐同阿妺: 參戰
李生：「今日要同你地講既就係咁多，你地可以返去。」
信：「嘖，叫我地黎就只係為呢兩件事？哂時間，我要走啦。
」 雪：「嘩一次過有三個新人？好似會幾好玩咁啵，希望會係靚仔啦~
」 天：「哼，望就望其餘兩個會係返個似樣少少既人啦。
」 大家各自拋下一句野之後就帶住自己既人馬離開，只有晨哥同李生未有動作，企係原地。
李生：「阿明，呢班就係將會同你交手既人，你做好心理準備未？」
晨：「只要稍不留神就會死得好慘，呢度就係一個咁既世界。」
「可以的話我真係唔想我既朋友入黎呢個世界，連我自己都唔多想接觸呢班人。」
我：「我都已經大約feel到呢度係一個咩地方，不過我都無退路喇，唯有頂硬上。」
「但係講起果兩個空缺，你地會點做？」
晨：「你係想問會點揀兩個新既家族出黎？」
我：「係，因為我朋友有個計劃，可以幫到我係七星…」
晨：「係啊…咁快就已經諗好鞏固地位既計劃啊，你朋友都幾厲害。」
「我記得傳統係現有七星提名新人？我有無講錯？」
李生：「無錯，七星會根據佢地屋企既意願去提名，之後再投票選。」
我：「吓咁每個人都投返自己提名既咁咪無得玩？」
李生：「所以有規則就係唔可以投返自己提名既人。」
我：「哦…我明白啦，咁李生你想我提名邊個？」
李生：「唔洗喇，你鐘意提名邊個都可以，我走先喇。」
我：「吓但係我係代表你架喎..」
李生：「無所謂，邊個做新七星對我既生意唔會有太大影響，只要你保持到而家呢個局勢就可以。」
「唔好俾佢地合作，等佢地一直咁鬥就得。」
李生講完就雙手放係背後咁離開左。
晨：「明，話我知你想提名邊個。」
我：「應該係我朋友阿威同阿惠架啦，若然佢地入到黎，一定可以幫到好多。」
晨：「係呀…我明白喇，你唔好提名佢地，由我提名。」
我：「點解要搞到咁複雜？我自己咪…」
Ellie：「因為其他人一定唔會投阿明你提名既人，佢地會覺得你會想建立有利自己既狀況。」
晨：「個個都會咁諗對方，但係一個新黎既人提既名佢地大多數唔會投，因為佢地會覺得你未明遊戲規則。」
「佢地認為你揀既人會有機會危害到佢地本身既利益，所以佢地多數會投返做左好耐既人既提名。」
「唔講咁多喇，不過我可以向你保證，你揀既人一定可以入到七星，我有辦法。」
既然佢都講到黎呢個地步，唯有信佢喇。
晨：「你都快D返去喇，你班女朋友仔而家應該好擔心你。」
佢講得無錯，我而家要儘快返屋企先得。
之後我就同Ellie離開李氏既總部，坐的士飛返屋企。
一入到屋企，個個都坐哂係客廳望住我地。
我：「乜咁人齊啊…」
大家姐：「你返黎嗱明仔！！嚇死大家姐我啦！！
」 大家姐一見到我就撲左上黎，好彩我訓練有素，今次終於無仆起度，而係好似樹熊抱咁抱住大家姐。
不過我唔小心咁揸左大家姐屎忽一下，又幾好肉。
大家姐好似無為意，只係一味咁攬住我。
大家姐：「Sarah佢地講到好得人驚咁，又話你被人捉左又盛，我諗住再過一陣你再唔返黎我就去報警架啦！
」 我：「邊有咁誇張吖，我放返你落黎先講啦。」
之後我就慢慢咁放返低大家姐，走到去佢地面前。
我：「其實頭先我同Ellie去左見其餘既七星，叫做好簡單咁認識左佢地。」
「所以並唔係咩俾人捉，你地可以放心，仲有，李uncle話要填補埋其餘兩個七星既空缺。」
Sarah：「吓咁阿威今朝同我地講既提議咪…」
我：「嗯，雖然時間可能早左d，不過呢個不失為一個好機會，起碼唔係我提出，唔會有位俾人入。」
「我一陣或者今晚就會打俾阿威，同佢傾下。」
Ellen：「唔洗啦，呢D野交俾我同Anna去做喇，你都攰架啦，好好咁抖下啦。」
Anna：「係囉，呢D咁複雜既野你搞唔掂架，我幫你啦。」
我：「咁…就麻煩你地啦，嘩真係好攰。」
我成個人訓左落梳化，郁都唔想郁一下。
Sarah：「阿明吖，班七星係點架？」
我：「講起佢地，佢地真係好恐怖，頭先我好似身處一大片草原咁，佢地就獅子。」
「佢地果種氣勢真係會令人流冷汗，有強勢又有陰險，好得人驚。」
「有個女仔仲可以笑笑口咁話係自己篤阿傑屋企既罪證出黎，好似覺得咁係好好玩既野咁。」
「總知我就覺得佢地唔易對付，最好唔好同佢地起衝突。」
自己講完先發現自己好似已經同果個阿天有少少衝突，唉救命。
Yui：「阿明…萬事都要小心…」
Sarah：「有咩問題諗唔通或者覺得難搞就搵我地喇，我地會一直係你身邊。」
我：「好，多謝你地，好彩頭先有Ellie係我身邊磅住我咋，如果唔係我都唔知點算。」
咦，係喎Ellie呢？
我環顧四周，見到Ellie佢同Ellen仲有Anna三個人行左埋一邊講野。
應該係Anna同Ellen問返Ellie頭先既情況啦。
我：「唔見二家姐既？又係自己房？」
Yui：「頭先羽晨話想食蛋糕，二家姐就帶左佢出去食…」
Sarah：「二家姐佢聽到我地話你被人捉左果陣都無乜反應…過左陣就同羽晨出左去…
」 我：「係咩…」
睇黎二家姐佢仲係好嬲我做七星呢件事…
到最後我始終都係等唔到二家姐門。
唔知係巧合定係二家姐較準時機返，Sarah同我講話咁岩係我沖涼果陣就返左黎，仲一支箭咁返左房。
原本仲打算見件事已經過左一排，都係時候好好咁同二家姐解釋，睇黎而家佢仲係好唔想見到我。
無辦法啦，唯有再等下先喇。
之後我地都同阿威佢傾返之後既安排，為未來既情況做定準備。
講係咁講，其實大家都無乜野要做，係等果一日黎。
由於大家都要時間去諗到底提名邊個好，所以真正揀出新人既日子定左係一個月後。
係果日黎之前，我地並無野可以做。
起初我仲以為李生會叫我去好多Party之類，但係居然一個都無，甚至連聯絡都無。
不過咁樣仲好，我仲可以有時間去做下自己野，趁仲未忙起上黎。
所謂既自己野，其實都只係休息下，同佢地hea下玩下咁。
除左咁之外，我根本唔知自己可以做D乜。
我見完阿天佢地之後，老實講我係幾淆底。
單憑言行舉止仲有眼神表情之類，我都好確實咁feel到佢地三個並非咩善男信女。
只要我一有咩痛腳被佢地捉到，我肯定我就會玩撚完，尤其係果個阿天，佢咁憎我，一定會千方百計咁整死我。
一諗到我黎緊要加入呢個咁恐怖既戰圈我就成個人打哂冷震。
雖然自己知道自己一個係度擔心d仲未發生既事係好無謂，但真係無辦法唔諗。
就算係同Sarah佢地玩既時候我都無辦法唔諗呢件事，搞到成個人開心唔到。
愈係係度諗呢件事就愈覺得自己已經走左入一個困局，走唔返出黎。
我開始向負面果邊諗，例如阿威入唔到七星咁點算之類。
最後，我真係崩潰左，返學果陣忍唔住曠課，自己一個坐左係學生會室發呆。
我之後應該點做好？不如真係放棄唔好做？
咁都唔錯喎，退出又可以唔洗將阿威都捲埋入呢個咁恐怖既戰局，又唔洗晨哥費神照顧我。
呢個真係有得諗喎。
「乜你係度呀？搵得我幾辛苦，做乜無啦啦曠課呀傻仔明？
」