「續寫」無啦啦多左幾個家姐同阿妺: 介紹
我地聽完阿威既計劃之後無一不驚訝。
因為若然呢個計劃一旦成功，影響將會非常之大。
正因為影響咁大，阿威要求我地係實行之前要保密，千萬不要走漏任何風聲。
我係呢一刻再次感受到阿威係有幾咁醒目，真係好彩我係佢朋友而唔係敵人。
咁之後我地就好似平時咁嘻嘻哈哈咁上堂，食lunch，話咁快就放學啦。
正當我係度諗緊今日返去應該做乜之際，學校門口突然多左兩排西裝友棟左係度，個個都戴哂超咁，十足十拍戲。
係其中有一個應該係阿頭既西裝友行左去我地面前。
西裝友：「請問你係咪陳煒明先生？」
我：「係，我就係。」
西裝友：「咁請你上車，李生要見你。」
我：「哦…好既。」
Anna：「等等，我地都要一齊去。」
Anna突然行左去我前面，隔開左我同個西裝友。
西裝友：「你幾位係陳煒明先生既邊位？」
Anna：「我地係佢女朋友，有無問題？」
西裝友：「哦我有聽過李生提起過，佢交帶落你地最多只可以有一位跟黎，請你地自己討論。」
Anna：「唔得，全部都要去。」
西裝友：「恕難從命，我地車隊亦只有兩個座位可以提供比你地。」
Anna：「我地自己有車。」
Anna態度咁強硬，睇黎佢係一定要去到。
西裝友：「當然你地可以用自己既車自己跟住黎啦，但可唔可以入到大廈我就無辦法保證啦。」
「咁既然你地有車，咁就有請陳煒明先生你先上車啦。」
個西裝友越過Anna，開始推我上佢地架車。
Anna：「等等！我知道喇！只有一個人跟埋去就得喇？」
「Ellie，你陪阿明去喇，有咩就打比我地。」
Ellie：「我明白喇，我去啦咁。」
又會突然跪低都有既，唔似Anna作風喎。
西裝友：「好，咁就有請兩位上車。」
就係咁，我就同Ellie上左呢班西裝友既車，向唔知邊度進發。
最後我地去左一棟非常宏偉既建築物，但我完全唔知呢度係邊度。
我：「Ellie，你知唔知呢度係咩地方？」
Ellie：「呢度係李氏企業既總部…唔會有錯…
」我：「我有無聽錯？你話呢度係…」
西裝友：「我地到咗啦，請兩位落車。」
我地一落車就被人帶去搭lift，一上就就係幾十層。
Lift門一打開，我見到既並唔係一個office，成層只有一套大書檯同梳化仔，而且成層都係無開燈黑媽媽，完全係依靠落地玻璃提供光綫。
而呢層樓只有一個人係度，坐係張大班椅上望住外面既風景。
西裝友：「李生，我地已經照你吩咐帶左陳煒明先生黎。」
「好，辛苦哂，你地落返去先，阿明你埋黎坐低。」
呢把聲，果然係佢，不過除左佢仲可以係邊個吖。
我按照佢講既咁，去到小梳化度坐低，佢亦轉身面向我。
李生：「咦？仲有位小姐架？我記得你應該係陳家…」
Ellie：「我係Ellie，我仲有位家姐叫Ellen。」
李生：「果然係果對雙胞胎呢！黎啦你都過黎坐低，不過我估唔到會係你跟埋黎。」
「我仲以為會係江家果位千金添哈哈。」
佢係度自己講自己笑，而我同Ellie就笑唔出，Ellie仲要鄒哂眉頭咁。
李生：「小姐，睇你個樣好似有野想講？有說話唔怕直講啵。」
Ellie：「既然係咁，可唔可以請你話我知點解只係俾一個人跟阿明黎？」
李生：「做生意既基本原則，要食住對方，我就知道你地會想跟埋黎，所以我先咁做。」
Ellie：「咁你叫阿明黎所為何事？」
李生：「哦，有好多有關七星既野要交托比阿明，同埋要介紹其他七星比佢識，所以先叫阿明黎。」
問左兩個問題，但Ellie仍然鄒哂眉，好似仲有野要問咁。
李生：「我之所以請阿明代表我做七星完全只係因為佢有適合既能力，我完全唔係想害佢，你可以放心。」
Ellie：「但願如此，我同我家姐都唔想見到阿明有事。」
真係一場激烈既神經戰，Ellie既氣場突然唔同哂，我有少少嚇親。
李生：「真係後生可畏啊…呢個年代既後生仔女真係厲害…咦，時間都唔早啦，我地行啦。」
我：「我地要去邊？」
我終於講左第一句野。
李生：「去見其他七星。」
之後我地三個人又再一次搭lift，不過今次唔係向上而係向下。
最後，李生帶左我同Ellie入去一個好大好大既演講廳。
個演講廳同頭先個層幾似，都係無乜開燈，只有演講台上有開射燈。
係入口望過去台上都可以見到台上面有一張好大既圓檯，仲有人係旁邊。
李生：「佢地就係其餘既七星。」
台上面就咁睇都有成七，八個人喎，你要話我邊個係七星先得架。
Ellie：「阿明，記住一陣行到埋去唔好怯，如果唔係佢地會得寸進尺。」
我：「哦哦…不過..」
李生：「行喇，佢地注意到我地架喇。」
屌，話俾我聽邊個係七星先行喇啦好無？
當然，我無真係講出口啦，你當我真係傻架咩。
好快我地就行到去台上，台上每一個人都望住我，個個既眼神都好乞人憎。
個眼神對我黎講非常之熟悉，因為我以前成日俾人咁樣望住。
果個係一個睇唔起人既眼神。
「你就係揀左佢黎代替阿偉啊Uncle lee？」
其中一個睇落同我差唔大既男仔率先開聲，語氣中可以感受到一份嘲諷。
李生：「無錯，以後佢就代表我，你地自我介紹下先。」
「要人自我介紹之前自報名號係基本禮貌掛？連咁都唔識？」
一個坐係另一邊既男仔都開聲，但佢講野時完全無望住我地，只係合埋眼，臉向天花咁。
佢頭先講既野，我認為唔係只係對我講，仲係對李生講。
居然夠膽串全香港最有錢既人，呢班人真係氣度非凡…
李生：「好，咁阿明你自我介紹下先。」
學Ellie講既咁，睇黎我真係唔好怯，如果唔係一定會比呢班人食住。
我慢慢咁行去張圓檯度，然後一手禁住張檯。
我：「我叫陳煒明，今日開始我就係代表李氏既七星。」
自以為好有氣勢既開場，卻換黎「哼」一聲。
「你就係陳煒明呀？我一直都好想見下你架！
」 有把女聲係我右邊傳黎，我望過去就見到一個女仔行左埋黎，仲橋住我，請我食哂波餅。
個女仔既笑容好好，同頭先完全唔同，但我不為所動，因為我仲知道有正經野要做。
我：「我就已經講左自己叫咩名，而家輪到你地。」
「陳煒明…原來你就係陳煒明，估唔到你會黎做七星，世事真係諷刺。」
第一個開聲既男仔又再次開聲講野。
「真係無諗過一個整死兩個七星既人最後會黎做七星。」
我：「你叫咩名。」
信：「我叫阿信，係代表葉氏，陳煒明歡迎你加入七星。」
雖然態度都仲係唔好，不過比起頭先已經好左少少。
雪：「我就叫做阿雪，係代表張氏既，歡迎你啊阿明，我可以叫你阿明架可？」
一直橋住我既女仔原來都係七星，完全估唔到，我仲以為七星清一色都係男既添。
我：「點叫隨便你，但請你放手，我有女朋友。」
講完我就縮開，行返去Ellie度攬住佢條腰。
雪：「咁冷淡架你~~喂阿天你都快d自我介紹啦。」
原來頭先串李生果個叫阿天..
阿天：「哼，乜七星而家墮落到呢個地步？居然會比呢種人做七星，我真係周身唔舒服。」
Ellie：「你咁講係…」
Ellie講到一半我就用手掩住佢把口，唔比佢再講落去。
阿天：「只係靠女人先辛辛苦苦咁係最底層爬上去，有乜資格做七星。」
「一係靠阿媽改嫁，再唔係就係靠班女朋友，你自己講，你自己有乜實力？」
無人再出聲，全場都靜哂。
事實上佢係講得岩，我而家之所以可以企係度，都係因為老母改嫁。
「咁不如阿天你話我知，要有咩條件先有資格去做七星喇。」
有一把熟悉既男聲係入口度傳黎，打破左沉默既局面。而我唔會記錯呢把聲，因為把聲既主人係我大恩人。
藍洛晨，最後一位七星。