「續寫」無啦啦多左幾個家姐同阿妺: 抱歉
學校，真係好耐無返過黎。
而家咁樣，反而有少少緊張，真係好奇怪。
Sarah：「做咩呀你？扯哂氣咁既？唔舒服？」
我：「無，只係好耐無返黎有少少唔知點咁…」
Sarah：「哈哈你真係吖，總言之我地去左學生會先喇。」
我：「咁早去做乜？之前有好多野積落未做完？洗唔洗我幫手
」 我一聽到學生會三個字個人就不受控咁激動起黎。
Sarah：「唔係啊，只係有幾個人我覺得你而家就想即刻去見啫~」
而家想去見既人…
咪佢地囉…我仲有野想同佢地講添…
好快Sarah就拖住我去到學生會室前面。
Sarah：「咁，我開門架喇，你準備好未？」
我：「等等先，我黎開。」
呢d野一定要由我黎做。
我捉住度門個毛柄，深呼吸左一下，一口氣推開度門行入去。
一入到去，就見到佢地係哂入面，個個都忙緊。
「電腦學會份預算呢？比我。」
「下星期個talk send左email比嘉賓未？記得用英文呀。」
「之前小食部d投訴我搞掂打好份回應啦，Anna你過下目，無問題我就出。」
大家…都好努力。
一時之間我真係唔知點開口，亦唔好意思開口，怕阻住佢地做野。
但兩個人成尊佛咁企係度，好難唔俾人發現，阿威好快就發現左我同Sarah。
阿威：「喂，早晨吖阿明，成個幾禮拜無見喇我地。
」大家聽到阿威叫我之後都紛紛停低手上既工作望左過黎。
突然間被咁多人望住，真係好唔自在，我甚至feel到自己背脊開始出汗。
阿惠：「歡迎你返黎吖，我地既變革者主席。
」 Alex：「Is good to be back right?
」 個個都好親切，面帶笑容咁同我打招呼。
班女既就企埋係一邊細聲講大聲笑。
見到佢地對我咁好，我個心好內疚。
畢竟…之前我咁任意妄為，仲做左D野幾乎害左大家既事。
啊，係喎，我係有野想同佢地講架嘛，做乜野無左回事？
我：「各位，之前真係好對唔住，俾左咁多麻煩大家，係我做錯左。
」 「我唔應該咁獨行獨斷，我應該聽大家講，係我一時嬲得濟無諗清楚。」
「我唔知應該講乜好，總知真係好對唔住，希望大家可以原諒我。」
我深深咁向佢地鞠左一個躬以示歉意。
不過佢地無人有反應，搞到我唔敢抬起頭。
我一個人望住個地板成分鐘有多，終於聽到有人有反應，係阿惠。
阿惠：「傻啦邊有嬲你啫，我地朋友黎架嘛。」
阿威：「無所謂啦，你闖幾多次禍我都會幫你搞掂，學阿惠話齋，我地FRIEND黎架嘛。」
屌，好撚感動，呢d真係朋友。
Alex：「其實阿明你真係唔洗咁自責，起碼你去到最後記返起咩先係岩，仲出手救左果三個Form5。」
「亦係因為佢三個，我地今次先踢走到阿傑咋，計落你都有功勞架阿明。」
又係呢d說話，之前係晨哥果度都聽唔少。
係喎，講起Form5…
我：「我想問下，無左阿傑之後Form5變成點？」
我始終都係記掛住呢D野。
Alex：「放心啦，我知你擔心緊D乜，訓導組已經睇實佢地架啦。」
咁都好D…我怕阿偉倒台果陣發生既事又再一次係Form5度上演，係咁的話就麻煩啦。
Anna：「喂唔好再吹水啦，既然阿明你返左黎，快d簽埋呢d佢啦，我同Ellie呢排簽到手軟啦。」
Anna突然搬左一堆文件出黎，放落會議檯果下勁響，痴撚線。
我：「你話簽哂佢..？」
Anna：「係吖今日內好簽哂佢啦，有d要盡快送出去架。」
痴線有乜可能簽得哂，一支筆D墨都未必夠用喎。
「登~登~登登~」
正，鐘聲將我將從文件地獄中拯救出黎。
阿威：「喂，打鐘啦，返去上堂啦。」
Anna：「咁無辦法啦，阿明你一陣再簽啦，而家上堂先。」
好啊，我就係等緊你講呢句。
我九秒九咁彈左起身，跟住阿威阿惠後面走，但聽到後面有把聲。
「見到你咁精神咁開心，我就安心啦。」
原來係Ellie。
我：「都係多得你咋。
」 聽到我咁講之後，我見到Ellie塊臉好明顯紅左好多。
Ellie：「嗯…一陣見啦我地！
」 Ellie之後就同Alex，Ellen仲有Sarah行左去同我地完全相反既方向。
見到咁，我先發現一件事。
我，阿惠，阿威，Anna行緊去舊校舍果邊。
我：「咦我地行呢邊既？唔通…
」 阿威：「係吖，你估得無錯，我地既班房已經整返好可以用啦。」
聽到呢個消息，我真係開心到爆。
好快，我地四個人就返到去我地原先既班房。
見到呢個班房，我百感交集，一時之間唔知由邊度講起好。
見到而家呢個完整無缺既班房，我個腦居然會彈返被阿傑破壞完既景況出黎。
雖然壁報都係未整返好，不過由佢啦，起碼可以返黎呢度先。
所有野都會慢慢好起來的，反正我地有既係時間。
我諗短時間內都應該唔會有咩風雨架啦，呢個時勢無人會夠膽亂黎。
阿惠：「喂，係度諗乜呀，入去啦。
」 阿惠係我後面輕輕咁拍左我一下，之後就同Anna仲有阿威一個接一個咁行左入去。
係啦，阿惠講得岩，而家仲有乜好諗，根本唔需要諗太多。
就算會發生咩事，而家我都做唔到D乜去阻止或者預防架啦。
杞人憂天倒不如活在當下，好，去上堂啦。
所有野一切依舊，同以前一樣，點名，上堂，收功課。
講起收功課，屌原來Anna之前俾我果堆功課有八成係流既，根本無呢D功課。
堂一堂接一堂咁上，唔知係咪因為太耐無返學既關係，居然覺得時間過得好快，咁就一堂咁。
當我意識到呢件事果陣，原來已經小息。
唉，落去學生會室簽埋頭先Anna叫我簽果堆野先。
正當我企左起身伸左個懶腰準備落去個下，果個好乞人憎既肥仔突然叫我。
「喂明哥，出面有人話要搵你喎。
」 搵我？唔通係Sarah佢地？
但我望過去門口，見唔到Sarah，亦見唔到Ellen，Ellie佢地任何一個人。
搵我既人，係Form 5既果幾個男仔。
阿威阿惠見到佢地三個之後即刻衝左去我面前將我同佢地隔開。
阿惠：「你地黎有咩事？」
阿惠語氣好惡咁，佢好似唔記得左d重要野。
我：「喂你地係咪唔記得左都係因為佢地阿傑先..」
阿威：「係喎屌，Sorry。」
阿惠：「屌，柒左，語氣惡左少少唔好意思。」
唉屌呢兩個傻仔真係唔記得左。
我係阿威阿惠中間穿過，行去佢地三個面前。
我：「Hi，唔好意思我朋友語氣重左少少，你地搵我有咩事？」
「我地三個今次黎其實係想同你講多謝同埋道歉既..」
吓，搞乜呀？又多謝又道歉？
我：「eh…我份人比較蠢，可唔可以講得易明少少？咩事要多謝同埋道歉一齊黎既？」
為左分別佢地邊個講野，我決定將佢地命名為A，B，C。
因為其實到而家我都唔知佢三個叫乜名，頭先講野既係A。
B：「多謝係指之前你叫訓導唔好報警，等我地唔洗比人拉。」
「其實我地係聽到阿傑叫我地認左佢果陣已經做好哂心理準備，但當聽到訓導話要報警果陣，個心始終都好驚。」
「諗住「唉死硬啦今次」果陣，你居然企左出黎叫訓導唔好報警。」
「明明我地非親非故，但係你竟然肯攬我地，所以我地好想親口同你講聲多謝。」
哦，原來係呢件事。
我：「咁我知你地一定係無辜架嘛，報警又可能會令你地留案底，講緊係一世架，所以咪叫訓導唔好報警住囉。」
原本我打算問佢地點解肯幫阿傑，不過都係算啦，都過左去囉，無謂再提起。
我：「咦咁道歉又係咩事呀？」
C：「我地想為咁遲先供阿傑出黎而向你道歉，仲因為咁累你受左咁多苦。」
咁多苦？
係我諗咩係「咁多苦」果陣，阿威撞左我一下，我望左過去，佢仲對我打個眼色。
啊係喎屌，之前個謠言令佢地以為我俾阿傑搞先返唔到學。
死，咁反而令我有少少慚愧添，呃左佢地。
我：「唔緊要啦，至少你地有供佢出黎，救返成間學校吖。」
我邊講邊冒汗，好驚俾人識穿我講大話。
A：「咁既然你肯原諒我地，你可唔可以俾我地跟你？」