輝伯，屬於4A班的恐怖傳說: 002: 選擇(二) 跟陳老師去搵師父，而且帶同詹寶欣去

2: 選擇(二) 跟陳老師去搵師父，而且帶同詹寶欣去

「咁……好啊。」我說。

陳老師看看手錶，「你係度等一等我，我放低埋啲文件就帶你去。」

「依家？咁急？」

「反正有時間，緊係盡快搞掂件事好啲，定係你唔得閒？」





「唔係。」

「咁你喺度等我。」

突然，我想起了操場的詹寶欣，「等等啊陳sir，我想叫埋詹寶欣去！」

「吓？點解叫埋佢去？」陳老師止步問道。

「因為佢都聽過個櫃響，我驚佢都有事。」





「咁啊……好啦，叫埋佢嚟。」

「我落去操場搵一搵佢先，一陣係操場見。」

陳老師說：「得，無問題。」

我跑往操場，見到詹寶欣仍然呆坐。

詹寶欣弓著背坐著，神情凝滯，雙目無神。





「詹寶欣！」我在她身邊呼喊。

「健仔？」她反應有點呆，看來仍是驚魂未定。

「陳老師會帶我哋去搵師父。」

「搵師父？」

「係，師父作完法之後就唔會再遇到嗰啲事，佢哋就傷害唔到我哋。」

「嗰啲事……」詹寶欣打了個冷顫，「好……好啊！」

陳老師揹著背包，從後樓梯走到操場，「行得。」

「係！」





我拍拍詹寶欣的手，示意她跟我一起去。

陳老師帶我們去到停車場，「我揸車車你哋去。」

「要搭車去？好遠架？」我問道。

「唔算遠，放心，我會車返你哋翻屋企。」

「唔該陳sir。」我說。

車程的確不算遠，不過兩個字時間就去到目的地，是一間不太顯眼的村屋。

泊好車後，我們走上行人路。





「就係前面間屋。」陳老師指著那間村屋。

陳老師帶頭，我留在最後，一行三人在只供一、兩人行走的小路上朝著村屋推進。

路旁樹上有著各式各樣的蟲鳥，更有大如人頭的蜘蛛掛在蜘蛛網上，把我嚇得雙眼瞪大，不敢接近。

「一陣入到去唔好講嘢，等我負責講就得。」陳老師叮囑我們。

「係。」我們齊聲道。

到達村屋門外，陳老師敲門問：「有冇人啊？」

屋企傳來蒼老的回話聲：「入嚟啦，道門無鎖。」

或許是我的錯覺，我覺得裡頭有不少靈界氣味滲出⋯⋯