毒L溝女記[遇上補習老師]: 團圓

由細細個開始我就見盡一切家庭暴力。

吵罵、打罵、爭鬥最後離婚，自此我就踏上單親家庭之路。

而老媽子自此亦都唔多理我，我好多時候覺得我直程已經係雙失家庭。

雖然話就話老媽子唔多理我，但唯一一樣會理嘅，

就淨係識叫我讀好啲書，我由出世至依家已經聽左唔知幾多千百萬次。



直至見我中四呢年成績每況越下先叫左補習老師上門同我補習，

而佢就一日到黑好多時間都係出左去，淨係留低一句「讀好啲書。」

乜野鼓勵、關心佢通通不會，識嘅就只係返工返大陸。

其實我都要多謝老媽子嘅，因為佢我先有緣識到彤姐。

有一刻老媽子更什想擺我入孤兒院，當時我仲細細個。



當然好彩老媽子最後都冇將我擺入去，可能係良心發現。

直至大個小小先知道，我好心痛，我心痛佢竟然想擺自己個仔入孤兒院。

因為種種原因所以我同老媽子係好少野傾，難聽啲可以稱得上陌生人。

「老媽子，由細到大你都唔多理我，點解你呢刻要咁擔憂我。」

我要問個明白，就好似要認識一個陌生人咁。



「對唔住啊啊仔，但我要返工搵錢俾你洗嘛。」

「咁你就可以將我置之不理，唔通你忙到淨係識叫我讀多啲書?」

「我會改嫁啦阿仔，我會抽多啲時間同你傾下計。」

「自從你死過翻生，我真係知道自己做錯，我有反省過，我亦知由細到大你都感受唔到一絲親情，所以我更加唔想以後都見你唔到。」

「你話你除左識返工返大陛仲識做啲咩?淨係識叫我讀好啲書，但你嘅一個唔開心就想將我擺入孤兒院。」

「你知唔知做你個仔我聽到你想咁做有幾心痛。」

「對唔住...我以前真係唔應該咁對你，但因為以前你老豆走左路，屋企又冇錢再加上我當時真係好大壓力，我覺得我養唔起你，所以我諗唔開先想擺你入孤兒院咋。」

「但我又諗深一層，呢個係我仔黎，我點捨得拋棄我個骨肉。」



我聽完已經眼濕濕。

「咁返大陸呢?點解釋?」

「唉，阿仔你有所不知...」

睇黎老媽子當中係有隱情。

「咩...咩事。」

「我阿媽...即係你外婆佢呢排係鄉下患左重病，所以我先要經常返去陪佢。」

係外婆，想當年係鄉下嗰陣係外婆帶大我。



「點解佢會突然患病?冇可能，我以前仲見佢好健壯。」

「外婆佢老啦，邊會日日都咁健壯，所以你阿媽我先陪多啲佢。」

「老媽子...外婆佢...佢依家點，我想即刻返去探佢。」

聽到帶大我嘅外婆有事，我終於忍唔住喊左出黎。

「阿仔，等你好左出左院先探佢啦，你外婆等得到你返去嫁。」

「偉仔，你睇下伯母都咁珍惜每一分每一秒去照顧佢阿媽，點解你就唔去珍惜時光去原諒伯母。」

「你睇伯母都有白髮，佢都唔係日日都咁健壯嫁，總有一日佢都會好似你外婆咁。」

彤姐終於睇唔過眼出聲發言。



「但係...」

「我知，我知你仲記住以前伯母所做嘅事。」

「雖然佢以前做啲野真係搞到你好心痛，但係就算幾錯一切都過去啦，佢依家亦都答應改過，何必仲要好似記仇咁樣去記住佢。」

「餘下嘅時光係要好好珍惜而唔係冷戰，唔好等到失去左先黎後悔。」

「始終都係伯母生你出黎，亦冇冷血到將你擺去孤兒院，你就原諒佢啦。」

經過彤姐一翻勸告再加上老媽子一翻解釋，我慢慢覺得我好似一直都誤會左老媽子。

「老媽子，你講嘅全部野係咪真?」



「係呀，呢個時候我唔會再有野瞞住你，你大個仔有權知道呢啲事。」

「咁...好啦，我原諒你，不過...」

「你唔可以淨係識叫我讀好啲書。」

「唔會啦，我會多啲關心你，再唔會好似以前咁。」

「好耶，你地兩母子終於可以團圓，我都可以鬆一口氣。」

彤姐好似如釋重負咁呼一口氣。

「係囉!咁咪好囉，兩母子終於可以和和氣氣咁生活落去，恭喜恭喜。」

企係側邊食花生嘅豪哥突然拍起手掌黎恭喜我。

「係喎豪哥，你唔講野我都已經唔記得你係度。」

「緊係啦，見住你地團圓我都鄧你地開心嫁嘛。」

「豪哥...我有一樣野想問下你。」

我突然記翻起有樣野我係不解務必要問清楚豪哥。

我抹乾眼淚，用嚴肅眼神對住佢。