毒L溝女記[遇上補習老師]: 重見天日
一幅一幅印有彤姐嘅畫面浮現出黎。
「.......要客氣啲咁講『can i coition with you?』」
「啊...係咩。」
教作文，彤姐你英文水平真了得。
.............
「我全名叫張倩彤，你叫我阿彤就得。」
呢幅畫面係我認識阿彤嘅時候。
.............
「我...我失戀...嗚嗚。」
失戀，有我陪住。
.............
「我有樣野想同你講，其實我...我鍾意你吖張倩彤。」
「吓，你唔好玩啦，我知你一定系度講笑。」
我所有野都可以講笑，但，唯獨呢樣我係唔會講笑。
「.......何紹偉，點解你會同我妹搞埋一齊...」
對唔住，係我有負於你。
「經歷過咁多事，我已經百份百信任你......」
我同你好唔易再一齊翻。
「個太陽落緊啦，我地啱啱好趕到。」
...
「今日你生日啊大日子黎，緊係要驚喜啲啦!」
...
「呢幅相就係我地嘅紀念照，要永遠keep住唔可以唔見!」
多謝你，你唔止帶我行山、同我慶生，仲同我一齊渡過聖誕同除夕。
但係我...
「瞓醒未呀...瞓醒我地分手啦...!」
竟然要燃點起禍端嘅導火線。
「阿彤...阿彤唔好嚇我啊!我帶你去醫院。」
「阿彤你一定唔可以有事。」
係我搞到你一傷再傷。
「唔好離開我啊...你走左我生存仲有咩意義。」
但你最後都選擇原諒我。
「起身啦偉仔。」
係彤姐，我聽到彤姐叫我，你係邊度?
然後我眼前出現一道白光，而叫聲係由嗰度傳出。
「我好掛住你啊，快啲起身啦。」
「我地幸福嘅日子仲未結束。」
彤姐把聲一直由光傳出，我慢慢起身行近白光。
一步一步越來越近，無比刺眼，最後穿入白光。
我對眼慢慢睜開，模模糊糊見到彤姐坐住係隔離瞓著左。
「阿彤...」
我搭住佢手，彤姐亦開始慢慢睜開眼。
「偉....偉仔?你終於醒!! 你冇事啦...終於冇事啦。」
講完彤姐即刻攬住我。
「阿彤，你有冇事?你傷得嚴唔嚴重?」
「我嗰啲傷皮外傷黎姐，最緊要依家你平安冇事終於醒翻。」
「你知唔知你已經瞓左4日，呢4日你知唔知我都好擔心你。」
「我擔心你會從此離開我，我真係好驚，我每分每刻都祈禱你快啲好翻。」
「最後你終於醒翻，我真係好掛住你。」
「傻豬黎，我話過要永遠陪住你點會反口，你要知道我係好守承諾嘅人。」
「你知唔知你有一刻心跳停左我喊左好耐好耐，我好驚我最愛嘅人就咁消失左。」
「傻豬，你喊到眼腫晒醜死鬼啦。」
「偉仔，我唔會再離開你，我以後會信晒你，你都唔好離開我。」
「知道啦，冇左我仲有邊個會照顧得你咁周到。」
「阿彤，你知唔知呢...」
「係。」
「係我昏迷呢段期間我發左個夢。」
「我見到好多以前同你一齊嘅畫面，集結所有喜怒哀樂。」
「最後我見到道光同埋聽到你把聲，我沿住道光行入左去之後就醒左。」
「咁你係咪睇到好多我地唔開心嘅事?」
「係呀，每次睇到啲唔開心嘅事我就會好內疚，內疚自己點解要咁樣對你。」
「唔緊要嫁，過左去就由得佢過左去啦。」
「我好傻，我每次都做錯決定令你一次一次傷心，如果我可以醒少少就好。」
「傻仔黎嘅，就係因為你傻我先做到你老師嘛，你咁聰明就唔洗我幫你補習啦HAHA。」
「同埋我愛嘅係你個人、你個心，而唔係你嘅智商、你個樣。」
「阿彤我都愛你，我發覺自從我識左你一齊左之後我改變左好多。」
「我由最初一條毒L俾你打造成一個又痛又錫你嘅人，仲俾你教得貼貼服服。」
「你知我有幾好就得啦，以後你唔好再令我擔心，做乜野事都要第一時間通知我。」
「知道啦，我以後會每一分每一秒每做一樣野都會同你報到。」
「識咁講我就放心。」
「我仲會每一分每一刻愛住你，記掛住你。」
「口甜舌滑啦偉仔，我都愛你。」
「錫翻淡先啦BB。」
我坐係病床同彤姐打左20多秒車輪，我再次接觸到彤姐柔軟嘅嘴唇。
「WOW，屌偉同得條女打車輪即係冇事好翻啦。」
我突然聽到把聲從門口傳來。
呢把聲係豪哥。
我轉頭望向門口，但竟然係有兩個身影而唔止一個。
「阿仔，你終於醒返，醒返就好，我可以屠雞還神。」
冇錯，係老媽子。
「老媽子，豪哥，你地都等左我4日?」
「我就等唔到你4日啦，不過你老母就真係係醫院苦等左你4日。」
原來老媽子仲係有我心，我一直以為老媽子已經置諸我不理。
「係呀阿仔，呢4日我係出面等你我都好心痛，好彩你個補習...唔係，係阿彤，係佢呢4日裡面一直安慰我俾鼓勵我先感到慢慢安心。」
「阿偉媽媽，呢啲事我應該做嘅，唔洗咁客氣喎。」
「阿彤你仲叫得我咁陌生做乜?直接叫我伯母啦。」
我同彤姐都感到有啲驚訝。
「唔洗估啦，其實我一早知你地有野。」
「老媽子你從何得悉?」
「你阿媽我以前都有拍過拖嫁，點會睇唔出你嗰日返屋企咁頹係因為咩事。」
老媽子原來一早睇透我，我仲以為我可以瞞得更耐，知道之後仲要冇任何反對。
「老媽子...竟然俾你睇穿左。」
「偉仔，你以後對你媽多啲交流啦，話晒伯母都開始老，要好好珍惜餘下日子。」
「但係佢由細到大都係唔多理我嫁啦，我一早已經覺得我地冇晒親情。」
「同埋伯母對你好好嫁，可能你地當中有咩誤會呢，如果我有個咁好嘅阿媽就好。」
「由呢4日我親眼見到伯母有幾擔心你，佢都好心痛你，你就原諒伯母啦偉仔。」
經過彤姐一翻勸諫，我內心好亂疑惑不定。
內心中出現兩條路，
究竟我揀"原諒"呢條路，
定揀"唔原諒"呢條路。