無品神探: 第十八節
岑世英感到背脊畀某樣野𠝹開咗，而且𠝹得好深。
月亮斜照之下，銀光閃閃！
刀！
岑世英意識到，自己如果搞唔掂，分分鐘會畀捅死！
電光火石間，佢見到一塊面，一塊女人嘅面。
塊面目無表情，而且透白如紙，白到得人驚。
但岑世英冇時間諗呢啲，因為個女人又一刀捅過黎。
岑世英面對住個女人，等佢斬到嗰時向左一跳，避過咗嗰一刀。
佢避開之後，再望個女人嗰時，畀睇到嘅畫面嚇親。
高大嘅女人塊面依然慘白，面無表情，唔同嘅係，佢唔同咗樣。
自己避過咗嗰一刀，而家照計喺面對住個女人嘅背脊。
但自己對住嘅，係一塊女人嘅面。
前面係面，背後都係面。
女「人」又追上黎。
岑世英嚇到差啲熛屎，拔腿就跑。
*************************************************************************
翌日。德廣大廈。偵探所。
Veronica已經起咗身，飲緊杯熱騰騰嘅朱古力。
自從前排嘅驚嚇事件，佢一直唔敢返自己間房瞓，寄居喺岑世英嗰間爛鬼偵探所。而因為呢位有錢小姐嘅緣故，爛鬼偵探所裝番度好度門，唔使再用紙皮充數。
唔止喺咁，拜呢位小姐所賜，爛鬼偵探所執到乾乾淨淨、冇曬垃圾，仲多咗幾件傢俬。簡直獲得咗重生。
偵探所度門打開咗。
Veronica放低個杯，望向門口個方向，睇下邊個入黎。佢兩個保鑣阿tim同阿john廿四小時輪流喺門口當值，保護佢地呢位小姐。
一個人行咗入黎。
正正係岑世英，佢面色有啲蒼白，個樣好似冇沖涼咁，長鬆凌亂。佢著緊T-shirt短褲，同佢平時嘅形象有啲出入。即使幾劣都好，佢一向係西裝愛好者。
Veronica見到岑世英，掩住個鼻，個樣有啲不快：「你去咗邊？係咪冇沖涼？」
岑世英好平淡咁應：「冇。」，然後輕輕閂上道門。
然後瞓咗喺地。
落地嘅時候發出清脆嘅「嘭」一聲，貌似落地好重。
Veronica見到岑世英咁，覺得有啲錯愕。
「喂？」Veronica問，睇下對方發乜神經。
見到岑世英冇反應，Veronica湊近過去，睇下佢咩事。
Veronica用手輕輕推咗推岑世英，但對方依然瞓咗喺地，一啲反應都冇。
只見到岑世英背脊微凸，似乎有啲咩喺下面。
Veronica慢慢伸手到佢背脊，一摸，似係某種帶。
佢諗諗下，咬咬牙，掀起岑世英件衫。
一掀，只見岑世英背脊上包住厚厚嘅繃帶，血染滿曬啲繃帶。
*************************************************************************
明愛醫院。
阿強輕柔咁握住佢阿媽隻手：「媽子，等下做手術唔使驚，我會一直喺度陪你。」
李太睇起身有啲憔悴，佢笑笑：「得啦，阿強。我唔驚。」
阿強隻眼有啲濕：「遲啲…等你好番之後，我煮餐好餸畀你食。」
「傻仔，」李太輕輕撫摸阿強個頭。「唔使喊喎。無論喺點，見到你咁生性，我都已經好開心。」
「一直以黎…」李太眼神變得憂鬱。「我咁多病痛，又靠你養，對你應該造成好大嘅負擔。今次…可能對你對我都係個解脫。」
阿強有啲激動咁講：「媽子，唔好咁講…你今次一定會大步𨈇過嘅。」
一個護士行入間房，對阿強兩個人講：「時間到啦，請病人準備。」
阿強深呼吸，平復自己情緒。佢用平淡嘅語氣講：「我會喺出面陪你。」
*************************************************************************
偵探所入面，岑世英悠悠醒番過黎，慢慢睜開眼。佢目光依然呆滯，只可以呆坐住等自己嘅視野聚焦番。
Veronica望到佢醒咗，放低手上嘅iPad，問：「Well. 你醒啦？點呀你？」
岑世英眨眨眼。望望四邊，見到自己打緊側瞓，佢嘆口氣：「發生咗咩事？」
「呢句野應該係我問你至啱。」Veronica講。
岑世英起身，痛叫一聲：「啊屌！」佢唔小心掂到個傷口。
岑世英坐番起身，坐喺梳發度。
Veronica問：「你搞咩？畀人斬？背脊咁大個傷口嘅？」
岑世英拎轉頭，睇睇自己背脊，見到換上咗嶄新嘅綳帶，佢望番Veronica。佢有啲老尷，指指背脊：「喂，eh…我背脊…喺你幫我搞架？」
Veronica凝望岑世英，塊面微微泛紅，講：「…係。我見你傷口咁深…唔處理會發炎…已經…縫埋針。」
聽到呢句，岑世英只係望住對方隻眼，冇出聲。
除咗德廣大廈種種噪音，成間偵探所靜曬，只聽到兩個人嘅呼吸聲。
岑世英撓撓頭，笑住打破咗沉默：「哈哈哈，估唔到你做太子女咁叻，居然熟得處理傷口。」
Veronica將視線從岑世英身上收回，冷哼一聲：「我有take醫療嘅course，唔算得咩。你以為屋企多幾個錢，我就乜都唔識？」
「喂，唔使嬲喎，講下姐。」岑世英苦笑一下：「多謝你幫我搞。我唔係好識搞傷口，求其包紮完就算。」
睇起身，Veronica個樣仲講唔上「開心」。
「喂，而家識嬲咪好囉。嘅唔愉快嘅野由得佢過咗算啦。」岑世英邊講，一邊搵自己包煙。
岑世英自言自語：「我包煙呢？」佢視線落到一個茶几度，上面放住佢包煙。
「喂，呢啲野…都係你買架？」岑世英環視偵探所大廳，先發覺佢偵探所多咗好多唔屬於佢嘅高檔傢俬，包括梳發、凳同臺，佢不禁愕然。呢度根本認唔到係佢嘅爛鬼偵探所。
「係。你叫過我喺度住，我決定學你話齋，喺度暫住一排。呢段時間我間屋唔安全，我需要搵個安全啲嘅地方。」Veronica講。「你呢度咁多人睇住，冇咁危險。我暫住呢度避風頭，又可以順便查案。我租你一間房住，你敢搞我，你死梗。」
「你老豆喺關誠天，我點敢得罪你呀？」岑世英擺擺手指下偵探所嘅傢俬：「不過你睇下？搞到我個偵探所似咩樣？多咗咁多呢啲唔係我嘅野？」
Veronica睥咗眼佢，語帶諷刺：「Well. 我唔知道你只可以喺一個污糟嘅空間生存。」
岑世英雙手抓頭，突然諗起身啲咩，問：「我原本嘅傢俬呢？你…冇掉咗佢地嘛？」
佢神色非常緊張，非常少有，連Veronica都有少少畀佢呢個樣嚇親。
Veronica呆咗一秒，先搖頭講：「冇。我叫人搬曬去你間房。」講完指指岑世英間房嘅方向。
岑世英聽到呢句，鬆咗一口氣。
Veronica見到佢個反應，覺得有啲好奇，佢問：「你啲野…好重要架？」
岑世英只係短短講一句：「你唔需要知。」講完企起身，行到一個角，喺包煙抽一支出黎點著佢食。
佢呢句，搞到對方即使有野都唔想講落去。
食咗幾啖煙，岑世英瞄一眼Veronica講：「喂。多謝你。真係。」
「得啦，我知。」Veronica講。「Anyway, 點解搞到咁？」佢語氣好平淡。
「我查到有新線索。」岑世英呼口煙。佢諗緊點樣講先好，畢竟喺長洲沙灘疑似畀鬼追斬呢件事，要講出黎實在有啲難度。
「不過途中有個小挫折。」岑世英深呼吸一下，開口問：「Veronica,我想問你一個問題。」
「問…問咩？」Veronica個樣有啲錯愕。
「我想問廖家豪有冇吸毒嘅習慣？」岑世英問。
Veronica呆咗陣，同岑世英講：“Fuck you.”表情好痛恨。
岑世英見到佢反應，都覺得有啲不解。
不過佢冇咩時間慢慢解，因為Veronica叫保鑣趕咗岑世英出門口。
岑世英之前畀保鑣一野扑暈咗，而家唔敢反抗。
佢，畀人趕出咗自己嘅門口。