無品神探: 第十七節
Vivian將一包白粉倒喺佢嘅心口上面，岑世英嘅目光不自覺落喺對方嘅比堅尼胸圍度。
岑世英頓時感到一種無型嘅壓力，佢側眼望望，見到紫髮男人壞笑。
Vivian輕聲講：“Try me.”
聽到呢句，佢心諗：「屌。驚西啊！」
岑世英慢慢行前，將Vivian心口上面嘅粉統統索入鼻度。
一種極度強烈嘅歡愉感，即刻灌入佢嘅身體。
岑世英感到自己就黎爽到要上天！佢好似生咗對翼，喺原地向上升：穿過天花板、飛上大氣層、同太陽爭光、同月亮鬥明！
岑世英已經唔知道，自己係人世，定係天堂。
*************************************************************************
中環。臨門餐廳。有錢佬好鍾意去嘅飯堂。
一個中年男人喺餐廳食緊飯。佢眉頭緊鎖，頭髮半白，面容枯瘦。佢一路食，一路睇緊自己部手機。
突然間，兩個光頭彪悍男人喺中年男人隔離坐低，一左一右。
中年男人神色有啲驚慌，望咗望佢身邊兩個男人，唔知點算好。
「翁叔。你好」一個短髮嘅幹練男人喺中年男人對面拉一張凳坐低。
「耀華，咁係咩意思？」翁叔望咗望身邊兩個男人，又望面坐佢對面個人。
陳耀華將手靠喺凳背度：「翁叔，你仲係咁風趣。你明明就知道我咩意思。」
「你咁樣，都係想要我手頭上嘅股份姐。」翁叔講。
「翁叔，人辛辛苦苦做野，都喺為咗退休享受人生姐。」陳耀華講。「而家就有咁樣一個好機會喺你面前。一大筆錢畀你過世。就等你伸手。」
翁叔皺眉頭：「耀華，你咁樣做，何必呢？和實嘅未來，一定有你份。」
「我唔鍾意大家浪費時間。」陳耀華坐直個人，黑曬面。「你，會賣股份。」
隔離兩個彪悍男人搭曬翁叔膊頭，翁叔唔敢出聲。
隔離臺嘅人只喺望咗一眼，又各自各低頭食飯。
*************************************************************************
「咳，咳，咳！」
岑世英睜大眼。
呢度喺邊？
岑世英視線仲好模糊，模糊中只係見到環境好暗。
自己瞓喺張床度？岑世英周圍望。
佢留意到，隔離瞓咗個人。
有一個人嘅身影。
個人有住一頭波浪長頭髮，均爭嘅身材。
岑世英個頭好暈，但係仲知道呢個邊個黎。
Vivian。佢個名叫Vivian。
自己喺去咗比華利會所嘅船P？
係。冇錯。
岑世英開始整理到自己喺邊。
佢索一索啲白粉，覺得非常興奮，之後就不省人事到而家。
岑世英諗番起，都心有餘悸。白粉呢啲野，都係少掂為妙。
話時話，Vivian瞓咗喺佢隔離，除咗張被之外一絲不掛。岑世英望望下佢，又望望自己又係冇張衫，即刻明白頭先索咗野之後，自己做過乜野。
岑世英撓撓頭，有啲無奈。你話清醒就話姐，而家都唔知自己做咗啲乜，爽又冇感覺到。
佢個腦開始清醒。突然有一種不祥嘅感覺，湧上心頭。
Vivian瞓咗喺隔離，會唔會瓜咗？岑世英諗到呢點，即時起雞皮。
做得呢行，小心永遠冇錯，你唔會「太小心」。英文講：“You can’t never be too careful.”
岑世英閉氣，慢慢伸隻手指過Vivian嗰面。
「呼。」有呼吸。一道氣吹落佢隻手指度。
岑世英鬆咗口氣，即刻著番啲衫。而家係幾點，佢唔知，不過冇乜理由仲留喺度。
佢檢查一次有冇野留低之後，放輕手腦，慢慢推門出去。
「唔。」
突然有把人聲。
岑世英停住，望一望環境。
原來只不過係Vivian發開口夢。
岑世英輕輕呼口氣，推開度門，行到走廊。
行到走廊，依然燈光昏暗，好難判別時間。成條走廊好靜，雖然有唔少房，但冇乜聲。
行到出面大廳，只見到一個個人瞓咗喺度。梳發有、地下有、角落都有。岑世英見到呢個場面，都覺得幾佩服下。明明呢度喺一間有錢人嘅游艇。
個個瞓曬覺，而家唔通係夜晚？
突然一道紫色吸引咗岑世英嘅目光。
岑世英定睛一睇，先發覺道紫色係頭髮，係嗰個紫色頭髮嘅男人嘅頭。就係佢帶啲白粉出黎，而家佢都瞓咗喺度。
望住個男人，岑世英諗起身個男人對佢講嘅野。佢話，索粉喺呢個會所活動嘅精華。究竟係真係假？負責人張生同個擁有人溫友諒知唔知？
講起溫友諒，自從同佢吹完水之後，都冇見過佢。莫非呢個有錢佬會所其中一個最受歡迎嘅活動，只係一個吸毒同性愛派對？姑勿論陳耀華，廖家豪係呢個會所嘅會員，佢又有冇沾染呢啲野？
岑世英諗到呢點，佢覺得，實在有必要去問一問呢個紫髮男人。
佢行到紫髮男人面前，啱啱想開口問。
「飲！」
紫髮男人突然開口，舉高右手，好似真係舉一個空氣杯咁。
條男人好似飲多咗，既然係咁，不如將計就計，灌到佢醉啲先再問。咁樣又可以降低對方戒心，又可以得到自己想要嘅野。
紫髮男人隔離有一個杯，雖然喺乾嘅，不過個男人應該就係用呢個杯飲。
岑世英掃視個廳，見到一張臺上面放咗佢需要嘅野：酒同酒杯。佢求其拎咗個杯，同一支酒。環境有啲暗，睇唔清楚係咩酒，好似係威士忌。
拎住個杯同支酒，岑世英行番去紫髮男人度。
見到岑世英拎住支酒同個酒杯，紫髮男人舉高右手：「飲！」
「好！飲！」岑世英打開樽蓋，將酒倒落紫髮男人個杯度。
佢將嗰杯酒塞入紫髮男人個杯度，然後自己拎起自己個空杯。
岑世英講：「飲！」然後將個空杯放到嘴前，扮到一飲而盡。
紫髮男人見到岑世英咁快飲完，畀佢嘅豪氣幹雲感動咗，應咗句：「好！飲！」講完又將酒乾曬。
岑世英見到呢條橋得，舉大姆指讚「好」，然後又照板煮碗，灌對方飲酒。
如是者，岑世英滴酒不沾，紫髮男人酒過三巡，面紅耳熱，係時候問野。
岑世英問個男人：「老友！你叫咩名？」
「我係喪榮。飲！」紫髮男人又舉高右手。
「好！飲！不過我地傾下計先，冇理由飲酒唔吹水架嘛？」岑世英講。「喪榮，你係咪專賣粉畀船P啲人？」
「哈哈，唔止粉。我乜都有，新嘅、舊嘅、小品嘅同狂野嘅都有。唔係點解我叫喪榮？」喪榮指指自己，好似好自豪咁。
岑世英問：「咁係咪次次黎船P有得爽先？」
「梗係！每次我都會黎，畀大家爽。唔係我，船P就冇人去，就冇人畀會所嘅會員費。」喪榮醉醺醺咁講。「某程度上我都算重要成員。哈哈。」
岑世英諗咗陣，問：「我聽講廖家豪都係呢個會所嘅會員。佢有冇喺你度幫襯過？」
「梗係有！佢…」喪榮講講下，突然諗起身一啲野咁，停咗冇講，只係話：「飲！」
岑世英心諗：「仆街仔講啲唔講啲。」現實中就對喪榮講：「好！」然後再斟一杯之後，再隊佢一杯。
「呀！」喪榮將杯酒飲完之後，呼咗口氣。
「喂，喪榮，廖家豪佢點？」岑世英嘗試再問。
「呼…」喪榮飲完杯酒，瞓著咗。
岑世英搖搖喪榮，試圖叫醒佢：「喂！」
「呼…」喪榮依舊頭歪歪。
「喂屌你老母！」岑世英用力搖晃喪榮。「屌你講埋先瞓啦！」
「呼。」喪榮呼呼大睡，瞓到隻豬咁，搖極都搖唔醒。
岑世英覺得好失望，本身可以問到有關廖家榮嘅野，但叫極都叫唔醒喪榮。
冇計，只可以放眼遠啲，睇下之後有冇機會可以查到。而家佢只想離開呢架游艇，畢竟已經喺度逗留太耐。
佢摷下喪榮嘅袋，睇下有冇啲知道佢身份嘅野。搵搵下，搵到張身份證。
原來喪榮個名叫馬漢榮。
岑世英記住個名之後繼續搵，搵到張卡片。
佢差啲笑咗，心諗喪榮做毒販都有卡片。拎起張卡睇，佢寫住Y-Art Studio。原來喪榮有份正職搞藝術設計。
有咗真名同職業，之後要搵佢應該冇咩問題。
岑世英將卡片裝入袋，行番出大廳，睇到天空上星羅棋布，果然已經喺夜晚。
而咁澄亮嘅夜晚，喺香港市區好難睇到。
已經深夜，架游艇已經靜靜嘅泊喺海旁。
岑世英行落架船上岸，想食支煙、散散心。
一班有錢男女吸毒，吸完就扑野嘅船P，仲要成日搞，岑世英諗起身自己參與其中都覺得黐線。
岑世英拎支煙出黎，點著然後叼住佢，沿住條海岸度行。
從泊船位行上黎，係一個海灘。
海灘上面冇乜人，係樹多。
岑世英見到冇乜人都幾好，畢竟夜晚散心都係求個清靜。呢點喺香港鬧市，尤其係深水埗，好難做到。
岑世英食住支煙，望住海面，敲敲自己個頭，等索完粉嗰種不適感退散。
海面上波光粼粼，天空上銀月澄照，確實充滿詩情畫意。
下一步，應該點行呢？問比華利會所嘅其他人，繼續調查呢個會所？定係調查個毒販喪榮？
岑世英喺心入面盤算住。
突然，支煙嘅火光，陷咗個角。
接下來喺一個影。
一個拎住野嘅黑影。
岑世英反應到有危險，即刻向右閃避。
但佢反應唔切。
「擦！」
岑世英聽到衣衫破裂嘅聲，跟住喺背脊傳黎火炙嘅疼痛，鮮血流咗一地。