無品神探: 第十五節
舞台上演出完畢，全體工作人員出黎向觀眾鞠躬，台下掌聲雷動。
「天鵝湖睇咁多次都係咁精彩。」陳耀華對住坐喺隔離嘅Veronica講。「柴可夫斯基確實係大師，配樂完全發揮咗套劇嘅神髓。」
「確實係masterpiece。我覺得套劇嘅芭蕾反而係更重要。」Veronica講。
佢地兩個起身，隨住人流步離個劇場。
陳耀華笑住講：「你覺得好睇就得。」
「你請我睇呢套Opera，我應該要講句thanks.」Veronica講。
陳耀華保持微笑：「唔使同我講呢啲。睇套劇姐…」
「唔係，」Veronica有啲低落。「我覺得，我係度浪費緊你時間…」
陳耀華有啲愕然：「做咩咁講？」
「你知道，有啲係冇可能。我…唔想浪費大家時間。」Veronica停咗停。「況且，我唔知你係對我有意思，定係對我爹哋嘅公司有意思。」
「係咪關廖家豪事？」陳耀華面色有啲鐵青。
「係又點，唔係又點？重要咩？」Veronica不置可否。
「佢失蹤咗成年，你報警咁耐都冇消息。你幾時肯move on?」陳耀華有啲忍唔住。
「總之唔係今日。」Veronica講完就走咗，留番陳耀華一個人企喺原地。
*************************************************************************
德廣大廈，二樓。
「喂，錦哥，一個月到咗啦喎，點解我仲未收到錢架？」岑世英又著番佢套污糟西裝。
「岑生，呢排搵錢艱難呀，做雞都生活困難呀。」一個偏瘦嘅男人解釋。
「屌，又唔係你做雞，你收錢之嘛。」岑世英嗤之以鼻。
「咁我代表佢地權益嘛。」錦哥好似好自豪咁講。
「吸人血汗仲咁撚自豪，你不如去選特首呀？」岑世英諷刺。
「喂，冇講笑，如果我做特首？」錦哥拍拍心口。「全港叫雞一律九折，德政啦掛？好過而家嗰個一百倍啦。」
「唔好ff咁多，想唔想我照住先？想就磅水。」岑世英伸手出黎。「唔係難保差佬幾時上黎搗亂架。你知道我識唔少差佬架？」
錦哥冇計，行開去櫃桶度拎咗一疊錢，遞畀岑世英：「唉，岑生。呢度，你點下。」
岑世英點算啲錢，講：「啦，下次記住準時啦。遲啲你就明，其實我收得好均真架啦。」
岑世英將錢收好，行番上偵探所。佢喺西裝褸拎包煙出黎，點著一支煙食。
佢摷番關芷怡畀佢嘅資料開始睇，想搵啲頭緒。
「廖家豪，Derek, blah blah blah…」岑世英拎咗份差佬嘅報告黎睇。份野好枯燥無味，睇幾頁就想瞓。
「屌。」岑世英睇幾頁頂唔順，放番一邊，搓搓太陽穴。
隨手摷啲資料，佢摸到有一張突別硬嘅紙。
岑世英幾好奇下，抽出黎睇下，原來唔係紙，而係相。
張相影緊一間好舊嘅建築物，好似係一座倉庫。
呢張相放咗喺廖家豪嘅資料，應該喺佢影嘅？但諗唔明有咩意思。佢睇黎睇去都認唔到喺邊，放棄咗。
岑世英瞓喺地下，一路食住煙，一路沉思，直到一把聲打斷咗佢。
「大佬—」
係佢保鑣阿強把聲。
「大佬，係唔係度？」阿強喺門出面問。
「係度。」岑世英大聲回應。「做咩？」
「大佬，」阿強行到入黎，「今次…今次弊啦。」
「弊咩？你唔係話請假咩？」岑世英坐起身，覺得奇怪。「做咩咁快返？你阿媽嗰面冇事啦咩？」
「就係因為佢我先要搵你幫手。」阿強有啲黯然。
「講清楚啦屌你…」岑世英差啲講埋「老母」，但呢個時候講出黎唔係好啱，尤其阿強阿媽入咗院。於是佢收咗口。
「個醫生確認咗…」阿強繼續講：「係肺癌。醫生話，要盡快做手術，如果唔係就太遲。」
岑世英靜咗。
「醫生己經盡快安排手術。」阿強講。「問題係…」
「問題係？」岑世英皺眉。
「問題係手術費。成幾皮野，我畀唔起。」
岑世英嘆咗口氣：「就知你冇好帶契。得啦，筆數我幫你搞。」
「大佬，你有錢咩？」阿強納悶。
「冇。」岑世英又點支煙。「不過而家有大水喉。」
「大水喉？」
岑世英講：「你唔好理咁多。錢嘅野，你唔使煩。」
等咗陣岑世英又講：「你知唔知我做人嘅格言？」
「淫賤不能移？」
「我屌你呀！仲講笑。」岑世英一野敲落阿強個頭。
「係：好人難做，所以要做好人。」岑世英一字字咁講。
「大佬，我睇你唔似好人喎。」阿強又係度質疑佢大佬。
佢大佬即刻又敲佢個頭：「咁多野講？」
「大佬，呢句野咩意思？我唔係好明。」阿強搓搓個頭，又問。
「呢句野，係我老豆同我講嘅。」岑世英個樣好嚴肅下。「至於實際意思…」
岑世英諗咗陣先講：「我都唔知。」
阿強靜咗。
「喂。我唔係派膠。句野嘅意思，我老豆從來冇同我講過。佢只係叫我好好諗下。」岑世英係度解釋。「不過我諗，佢意思係想我做人唔好怕難，要迎難而上。」
阿強唔出聲。
「今次只係你人生一個挑戰，無論係點，勇敢面對。」岑世英食一啖煙。
「估唔到大佬你平日不學無術，竟然識講呢啲野。」阿強有啲刮目相看。
「一向都識。」岑世英又一野敲落阿強個頭。
*************************************************************************
「嘟…嘟…嘟…」
「喂？」
「喂。係我。陳耀華。」
「陳生，你想點呢？」
陳耀華講：「冇，你手頭上和實集團嘅股票，我好有興趣買落黎。」
一把男人嘅聲拎起電話：「做乜而家又話買？之前傾傾下話買，最尾又冇咗回事。」
陳耀華解釋：「哦，之前我因為某個人而改變諗法，而家唔需要再理嗰個人。」
男人問：「係咪因為太子女？」
陳耀華用把異常冷酷嘅聲講野：「我建議你照我提議去做，其他嘅野你唔使理。你理番自己其他生意仲好。你應該好明白，我係一個點嘅人。」
男人應：「…係。就照你意思。」佢聲調透出陣陣恐懼。
「就咁。」陳耀華收線。
*************************************************************************
關氏豪宅。
Veronica喺佢同陳耀華不快嘅對話之後，返到佢屋企。
「小姐，如果你肚餓，可以叫廚房去準備宵夜畀你。」管家見到Veronica返黎，即刻問。
「唔使啦，我唔肚餓。」Veronica擺擺手。佢一啲食野嘅心情都冇。
講完佢就上樓梯，行番自己間房。
Veronica打開房門，喺書臺度坐低，整理番自己嘅思緒。
佢望向窗外面，一個無敵大海景就喺出面。靜謐嘅海面同佢起伏嘅思緒成鮮明對比。
搵咗一年，而家終於有新突破。個偵探似乎真係名不虛傳、有啲料到，咁短時間就搵到新證物。
而家知道廖家豪喺香港，雖然唔知係生係死，但自己有個預感，自己好快就可以搵到佢。
Veronica諗極呢啲野嗰陣，佢部iPhone突然開始震，打斷咗佢思路。
佢拎佢部手機出黎，冇來電顯示。
Veronica皺咗皺眉頭，覺得奇怪。佢冇聽，由得佢震。
「嗚—嗚—嗚—」佢部iPhone低沉嘅震機喺深宵突別刺耳。
Veronica忍唔住，收咗條友線。
佢望住部iPhone。
部iPhone又開始響。
「嗚—嗚—嗚—」
又係冇來電顯示。
Veronica忍唔住，又收咗條友線。
只剩低窗外嘅波浪聲，同埋風聲。
同埋電話聲。
Veronica部手機又開始震機。
「嗚—嗚—嗚—」
Veronica隻手不停顫抖，佢覺得要聽呢個電話。
佢拎起身部iPhone，但冇出聲。
手機第二邊傳黎沙啞嘅聲音：「喂？」
Veronica冇出聲。
把沙啞嘅聲音乾笑一下：「喂，阿怡。我知你喺度。」
Veronica依然沉默，但個心已經震咗下。
「你唔出聲都冇所謂。我反正，係黎打個招呼姐。」沙啞聲繼續講。「而家唔介意嘅話，望一望你張床。慢慢拉開你張床被。」
Veronica顫抖住拎住部iPhone，突然留意到佢床被己經染紅。有種不安嘅預感襲上心頭，佢走過去，用第隻手慢慢拉開張床被。
映入眼中係一團野。
一團肉色嘅野。
一隻手。
Veronica嚇到講唔到野，千情萬緒卡喺喉嚨。
「Surprise！哈哈哈哈哈！」沙啞聲慢慢講，一路講，一路邪笑。佢似乎好享受對方呢種沉默，亦知道電話第二邊嘅人見到啲咩。「呢個，就當係見面禮。我好清楚你，亦非常了解你嘅野：我知你住邊，我知你行蹤，我知你做過啲咩。」
Veronica成身係咁震，佢控制唔到自己嘅恐懼。
「我之前叫過你收手，你偏偏要多管閒事。或者我之前講得唔夠清楚。我而家就親口同你講一次：今次就係咁，下次我唔擔保會送咩禮物。或者我會將你當係禮物，分成一份份咁送畀人。」沙啞聲縱聲大笑。
“I’m watching you. Babe.” 沙啞聲講完就收咗聲。
Veronica眼淚滿面、成身顫抖，想叫但叫唔出聲。