無品神探: 第十四節
同一個夢。
發過無數次嘅夢。
但無比真實。
「老豆我返黎啦。」男仔拉開佢屋企嘅門，同佢老豆講。呢個細細嘅唐樓單位，以往老豆都會坐喺廳嗰度睇報紙，等個仔返黎就會除咗老花鏡，講：「衰仔，返黎啦？」
但呢度冇，呢個夢入面冇。呢個夢只得佢一個。
「老豆？」男仔喺門口除低對鞋。
屋企好靜，成間屋只有鬧鐘嘅「答答」聲。細心啲聽，好似仲有啲滴水聲，「的答的答」。
男仔左右環觀，見到佢老豆對鞋喺門口個鞋櫃，照計應該喺屋企：「老豆？我返黎啦？瞓咗？」
「的答」「的答」
屋企唔係好大，男仔行入走廓：「老豆？我今日出糧啦，今晚一齊食餐好架啦！」
但冇人應。男仔突然聞到空氣中瀰漫住一種味。
「的答」
佢行向佢老豆間房。
「老…」
男仔被眼前嘅畫面嚇到講唔到野。佢老豆間房門虛掩，流淌住一啲紅色液體。
血。
間房流出一堆鮮血嘅血，揮發住濃重嘅腥味。
「的答」「的答」
*************************************************************************
岑世英嚇到醒咗，成身冷汗。
「吓…吓…」佢不停喘氣。足足過咗五分鐘，佢先恢複過黎。
唞順條氣之後，佢喺床頭拎個打火機同包煙，點一支黎食。佢撓撓個頭，喺度諗番自己姓甚名誰，呢度係邊度之類嘅問題。
「錢唔係問題。」佢諗起身關芷怡同佢講嘅野。「你如果有咩開支，可以用呢張debit card，實洗實扣。當然，你如果亂咁洗錢，我都會知，所以我勸你唔好咁做。」
佢噴一啖煙，放髮下個腦，摸下張卡喺唔喺床頭。
摸到張卡，岑世英有啲興奮，對自己講一聲：「今次爽！」
終於可以扮下有錢人！享受下做有錢人嘅感覺！
*************************************************************************
「Chris，今次有野要麻煩你。」Veronica將一部手機放喺電腦臺。
同佢講野嘅係一個戴住方框眼鏡嘅男人，坐喺電腦臺，呢度係佢嘅工作室。
Chris拎起杯咖啡飲咗啖，佢問：「飲唔飲咖啡？」
「好啊，thanks.」Veronica搵咗一張電腦凳坐低。
Chris起身去茶水位，拎個杯喺咖啡機度斟咖啡。佢轉身問：「你話有野搵我？喺咪咁好心黎探你嘅大學同學？」
Veronica睇睇呢間稍微有啲凌亂嘅工作室，佢問：「咁呢位同學過得點呢？」
「Living the dream. 美夢成真、夢幻生活。」Chris將杯斟咗嘅咖啡放喺臺面。「日日打program，覆email同畀客炮轟。」
Veronica聽到呢句野笑咗：「你仲係咁識講野。」
「要搞咩？」Chris坐番落張電腦凳，靠好條腰落張凳度，又飲啖咖啡。
「呢部手機。」Veronica指指臺面部手機。「我想你幫我解鎖部機。我入面有啲野想拎番。」
Chris聽到呢句，拎起部手機喺度研究。
「Chris，」Veronica神情嚴肅。「呢部野機密黎。所以我都想你保持呢個秘密。」
Chris眨眨眼，望下部手機，又望下Veronica。
*************************************************************************
所謂「人靠衣裝」，睇一個人係窮人定有錢人，往往睇外表就知道七成。如果一個人著得好好睇睇，再揸架靚仔車出行，咁基本九成喺有錢人。點解講九成？咁唔排除有人好似以下呢位人兄咁，靠有錢人嘅庇蔭而扮有錢人。
岑世英拎住關芷怡畀佢嗰張debit card，瘋狂喺名店消費。啲名店前幾年食慣大陸啲大水喉，唔使用腦諗經營策略，又賺得多，養到佢地肥肥白白兼且唔用腦。而家大陸條水冇咗，佢地自自然過緊「寒冬」，突然見到有人使錢咁大方，都好意外。
而家嘅佢，揸住架Benz SL450，奔馳到比華利會所。比華利會所，廖家豪都係會員，佢個公事包入面，就有一張會員卡。如果佢而家應該喺香港，問下呢個會嘅人，可能會有用到嘅資料。
比華利會所位於市區，因為只受有錢人圈子玩，而有錢人往往唔鍾意同人分享地方，所以附近樹多過人、芳草萋萋。
岑世英揸車到比華利會所嘅門口，係一度西式風格嘅鐵門。大門寫住 “Beverly” ，門口旁邊有兩個保安企喺度。
岑世英探頭出黎，用手架高副超：「我想黎呢度玩。呢度參唔參人玩？」
保安問：「你想入會？」
「係。」
保安又問：「咁我會帶你去見呢度負責人，張生。有冇問題？」
岑世英笑咗笑，擺擺手：「冇」佢心諗，問咩啲廢話，唔通唔入去？
「磁——」保安喺保安亭撳掣，開門畀岑世英開佢架Benz入黎。等佢泊好架車，保安帶佢去一間房。呢間會所唔算特別豪華，反而行骨緻路線，裝修簡潔，只加上少量飾物。
保安等岑世英坐低，斟咗杯水，然後走開搵嗰位張生。一個字之後，一個地中海嘅男人跟住保安行咗入黎。
等保安走開之後。岑世英笑笑，開聲：「呢位應該就係張生？」
個張生有一把溫和嘅聲，佢都坐低：「係。唔知先生點稱呼？」
「姓沈。」
張生清清喉嚨：「岑生，聽講你想入我地Beverly club。」
岑世英摷西裝袋。「呢度食唔食得煙？」
「自便。」張生問：「請問岑生喺點知道我地呢個會所呢？」
「嚓」岑世英點著支煙，望咗個張生一眼。「點解咁問？」
「問下姐。」張生觀察住岑世英反應。
岑世英橫睇掂睇個張生都唔似係「問下姐」。
「哦，其實都唔係咩大件事。咁啱呢排我得閒，咪諗住入個會識下人囉。」岑世英即場亂噏。
「張生，唔好為難呢位朋友。」門口一個男人微笑住入咗黎，著住馬甲，留住一頭清爽嘅短髮。
「溫生。」陳生見到入黎嘅呢個人，神色有啲難做。
個男人笑咗笑，向岑世英伸出友誼之手：「黎到嘅都喺朋友。溫友諒。」
「沈世明。」岑世英都伸出手，同呢個溫友諒握手。
溫友諒。岑世英一聽個名好熟口面，好似邊度聽過咁。
「沈生。頭先我喺門口經過，聽到張生佢話你想入黎玩。既然黎到，就都喺朋友。」溫友諒微微一笑。「張生，不如你畀下面我，帶沈生參觀下我地會所？」
「溫生，一切照你意思。」張生點點頭。佢又同岑世英講：「沈生跟我黎。」
「張生，到底你係負責人，定係溫生係負責人？」岑世英問。
「溫生係持有人。」張生回頭笑笑。「我係管理人。」
張生帶岑世英參觀個會所，個會所設施應有盡有：泳池、spa、有錢佬至愛嘅高爾夫歌場等等。
「張生，呢啲係你地搞活動嘅相？」岑世英見到走廊牆上面掛住一張張相，相隔離仲有啲旁述。
張生停落黎，望下啲相，回頭同岑世英講：「係。比如話，呢張我地搞緊船P。」
岑世英睇下張相，覺得有個女仔幾面善。佢睇旁述，見到個女仔叫「Cindy」。
「Cindy？」岑世英喺心度諗。「咁熟嘅？好似邊度見過。」
但佢一時間都諗唔起。
岑世英隨意睇，睇到隔離張相，又係船P，不過入面嘅人有啲唔同。
佢見到眼都大，相中人，正正就有廖家豪！佢要搵嘅人！
相入面除咗廖家豪，仲有溫友諒。有溫友諒都好正常，畢竟佢擁有成間會所。
岑世英突然諗起溫友諒係乜水，好似係本地一個有錢佬，有名嘅慈善家，成日捐錢做慈善基金。難怪佢聽過呢個名。
仲有…
陳耀華。
點解佢會喺度出現？廖家豪失蹤同佢有冇關？佢會唔會知道廖家豪嘅下落？
岑世英喺腦盤算住呢啲問題。無論係點，冇廖家豪，陳耀華就上到位。而家陳耀華係第一懷疑對象。
再睇個日期，旁述寫住二零一五年七月一日，啱啱好一年前。
一年前嘅七月二日，廖家豪搭飛機去法國做野。七月一日，佢參加咗比華利會所嘅活動。廖家豪嘅失蹤，呢個比華利會所同佢基本上脫唔到嫌疑。
「張生，」岑世英扮隨口問個張生：「因乜解究，兩張相都係船P，但啲人唔同嘅？唔同時間架？」
張生睇完張相解釋：「哦，呢兩張喺唔同日子影嘅。我地會所經常都會搞船P嘅，因為啲會員都幾鍾意。」
「咁一般係邊度玩？」岑世英問。
「都有唔同地方畀你揀，不過最多係西貢同長洲。」張生興致勃勃咁介紹。「沈生係咪都想玩呢個？」
「都幾。」
「我地前排先搞咗次。黎緊下星期會再搞多次。」張生望咗眼岑世英。「沈生，你想玩嘅話，而家跟埋我搞埋啲入會手續。」
「好。」
「陳耀華，到時你會唔會出現呢？」岑世英心諗：廖家豪失蹤關唔關你事呢？」