無品神探: 第六節
廖家豪(Derek)，二十七歲，短髮，戴眼鏡，香港名門關家嘅和實集團CEO。二十七歲做到大集團嘅CEO，有人話，係因為佢本身叻仔，係個聰明人；有人話，因為佢同關家獨生女關芷怡(Veronica)嘅關係，令佢步步高升。
大集團自然問題多，廖家豪上任落力整頓公司不良習慣，嚴重損害公司既得利益者，加上唔少人見到佢青雲直上，心生忌妒。公司雖然派系林立，但對廖家豪睇法幾一致，槍口對齊。反對嘅人入面，領軍者以陳耀華做代表。陳耀華係和實集團董事長關誠天契仔，擔任公司CFO，自成一派，同廖家豪屢生衝突。公司眾人都視兩位為公司接班人嘅有力人選，派系各自歸邊。
廖家豪整頓公司嘅努力，隨著佢嘅失蹤而灰飛煙滅。一年前，二零一五年七月二日，廖家豪因為公司業務原因，出外到巴黎公幹。
二零一五年七月二晚凌晨，廖家豪同女友喺機場禁區外道別後步入禁區，係佢女友最後一次親眼見到佢。開頭一切如常，廖家豪開會，會面，傾公事。
二零一五年七月二十五日，廖家豪跟女友facetime，首次對女友講「好驚，佢黎度搵我，冇得走，冇得避」，女友震驚，連忙追問，廖家豪冇回應cut左線。翌日，廖家豪發訊息安撫女友，表示一切如常，最差已過去。
二零一五年七月三十日，廖家豪最後一次用whatsapp同女友聯繫，開始失蹤。
二零一五年八月二日，廖家豪原定回程日子，於原本預定回程飛機CX836不見蹤影，正式失蹤。女友大駭，即刻報警。
二零一六年七月八日，關芷怡報警搵失蹤嘅廖家豪冇絲毫進展，委托獎金獵人岑世英調查。
「小姐你杯mocha。」侍應放低杯咖啡又走番去櫃台。
「佢係一個有幹勁，有上進心嘅男人。」Veronica繼續佢同岑世英嘅對話。
岑世英拎住支可樂飲緊，玩緊手指。
「爹哋對Derek好欣賞，對佢做公司CEO一向好放心，從來冇插手。」Veronica回憶，「公司好多人對Derek有bias，覺得佢靠關係先咁快撈到CEO做，但其實佢本身好叻仔。」
「聽你講，你男朋友係公司唔算受歡迎喎。」岑世英問。
「佢係一個leader，為咗公司，一個leader要做好多唔受歡迎嘅決定。以前爹哋嗰一輩好重團結，講關係，公司好講呢啲野。Derek上任之後，對呢啲野好睇唔過眼，想公司以才能揀人用，而唔係講資歷、關係，所以好多人睇Derek唔順眼。Derek失蹤咗，佢地冇出聲，但我知道佢地其實好開心。」
聽咗咁耐，岑世英冇出過聲。「頭先你話…有人唔想你搵到你男朋友？」佢問。
…
Veronica沉默咗陣先出聲：「…係。」
岑世英皺眉，用神凝聽。
…
…
…
「關小姐？」岑世英問。
Veronica終於開金口。「係…當Derek冇喺原定回程飛機出現嗰陣，我就報咗警。嗰時係上年八月二日。足足等咗十一個月，都係得個吉。最奇嘅係，當我搵人去問，警察就黑曬面叫個人走，話佢地做緊野，唔好阻差辦公。而我親身去問，又會笑笑口咁話調查中，叫我返去耐心等，但往往等唔到任何嘅update。」
「咁唔代表啲咩。差佬做野一向西。」岑世英不以為然。
「上次個差佬講咗句野，令我好奇怪。佢話：『你條仔都未必搵得番，不如你對自己好啲，唔好咁多事，失驚無神每兩個禮拜走黎問』。」
岑世英打個哈嚏，講：「咁都唔代表警察阻你查你男朋友，呢句野都算幾公道呀。」
Veronica講：「仲有一單。」
「嗯？」
「有人郁過我d file。我發覺少咗啲野。我知道有人摷過我搵Derek嘅資料，佢地偷走咗一部分嘅資料。」Veronica好緊張。「有人…有人監視緊我。」
岑世英望住Veronica，問：「咁你畀我疊資料…」
「完整嘅。我冇咁傻，我做野一向有plan。畀人偷去資料對我冇影響，我有backup。只係我而家唔知家邊邊個人可信。」Veronica講。
「你男朋友…會唔會仲喺巴黎？」岑世英問。
「我唔知…我啱啱先係巴黎搵咗一個月，都係冇消息。但如果我再去，可能會搵到佢嘅消息。我建議你問下公司啲人，Derek成日喺公司做野，佢嘅野，佢屋企人可能冇公司嘅人知道咁清楚。」
「好，就咁。有咩新資料通知我。不過我遲啲都可能會聯絡你。」岑世英起身。
「就咁？」Veronica有啲訝然。
「就咁。你仲有冇啲咩要補充？」岑世英撓撓頭。
「eh…冇。」
「好，拜拜，關小姐。」岑世英開始行。
「eh，關小姐，小心啲。」岑世英行咗幾步，停下黎講。
「我有野想補充。」坐喺度嘅Veronica突然講。
「嗯？」
「雖然我好尊重你做偵探嘅能力，岑生，但下次可唔可以剃咗鬚先，咁樣令我好唔舒服。」Veronica講。
「…我都未同你計，關小姐，你上次兩隻馬仔整爛我度門，知唔知有幾貴？」
岑世英反擊。
Veronica繼續補充。「仲有，岑生，雖然你著西裝，但件西裝污糟都係冇用，我建議你換咗佢，廢事趕客。」
「你知唔知我有幾窮？一個人已經窮到燶，仲要請保鑣要使幾多錢你知唔知？」
…