無品神探: 第四節

一走入關氏豪宅，就可以見到一個精雕細琢嘅大廳，間屋既主人係一個好有品味既人，廳入面放咗唔少西方藝術家既石雕、石像。大廳旁邊有一條樓梯上二樓，上面主要係私人用，例如有睡房同書房。下層就主要做會客同宴飲等等嘅公家用途。
 
Veronica兩個保鑣乖乖地識做閃埋一二邊，佢地呢啲卒仔，往往係等關氏一家食完，先到佢地食。門口企住另一個男人，不過唔係管家。係一個中等身材、蓄一頭短髮、個樣精明幹練既男人，但講唔上係靚仔。佢就係管家口中既陳生，個名叫陳耀華。
 
陳耀華對住Veronica笑咗笑，講：「阿怡，契爺同我都等咗你好耐。」
 
「我都係prefer你叫我Veronica。」Veronica冷冷咁回應。
 
「咁生保做咩呢？我地識左咁多年。今次你去法國去左成個月，我專程搵人運咗啲上等燕窩畀你補下，驚你喺法國太耐食唔慣當地嘅野食，搞到個人瘦曬。」陳耀華熱情咁講。
 




「有心。我地唔好再要爹哋等。」
 
佢地兩個行到大廳後面既宴會廳。廳入面經已開好檯，排好餸。坐喺呢張長檯主人席嘅，係一個有威嚴嘅中年男人，叫關誠天。坐係佢旁邊嘅，一位長髮嘅中年婦女，係佢太太，叫溫學儀。
 
「爹哋，媽咪。」Veronica向佢嘅老豆老媽示好。
 
陳耀華幫Veronica拉開張凳，等佢坐低之後自己先坐。
 
「阿怡你黎得啱啱好。我地食飯啦。」關太太笑容可掬咁講。
 




關誠天睥咗老婆一眼，有啲晦氣咁話：「啱咩啱啱好。明明就等左好耐。都係你，縱壞曬阿女。」
 
「阿怡你前排先喺法國返，呢幾日又頻頻撲撲。耀華份人好好，專程運咗啲上等燕窩黎，等你補補個身。」等到大家開始食飯之後，關老爺繼續講。
 
「契爹你過獎啦，呢啲野唔算得係咩。」陳耀華好謙虛。
 
「阿怡你呢排係咪又去搵Derek?」關老爺食食下又問。
 
「老公個女想點就點啦，唔使畀壓力佢。」關太插嘴。
 




「我就係要問。阿女嘅野，我冇理由唔理。」關誠天語氣好堅決。
 
Veronica停咗食，放低碗，但唔出聲，無疑係默認。
 
「其實阿怡佢想搵Derek都係情理之中嘅。契爺畀啲時間佢啦。」陳耀華幫口。
 
「阿怡，」關老爺改變語氣，變得語重心長。「唔係話要畀壓力你。我都明，Derek好好仔，有上進心，肯拼搏。之但係，你為佢經已放咗好多時間，連自己份工都唔理，東搵西摷，到而家連佢嘅影都冇。」
 
Veronica聽到有啲眼濕濕。
 
「你係個叻女，大把世界。」關誠天繼續。「同埋你都唔細，係時候為將來打算下。世界好大，唔只得Derek一個男仔好。」
 
「Derek係咪安全，爹哋唔知。但而家既情況係，佢一係聯繫唔到你，一係唔想聯繫你。呢段時間，你媽咪話由得你，但再過一排，爹哋就唔想你再咁落去。希望你好好諗下。」
 
「我唔食啦。」Veronica淚水已決提，跑開咗。陳耀華亦跟住去。




 
關誠天搖搖頭，摸住太太嘅手，阻止佢去追個女。
 
*************************************************************************
 
深水埗。合和茶餐廳。
 
「阿英你呢排又撈緊新case？啱先見你屋企又一堆文件，好勤力喎。」一個短髮皮膚黝黑嘅男人一路食野一路講。呢個男人，叫張德明，係麻甩佬嘅死黨，同佢一齊喺會考壯烈成仁咗，但佢又好好彩做到差佬，家下生活無憂。
 
「ok啦。啱啱先有人委託，未開始睇條粉皮仲扑濕我，不過冇乜野，睇錢份上，就當一場誤會。阿明你有咩搞？」岑世英啜一啖凍奶茶。
 
「咁好笑畀人扑濕？我冇乜特別野搞啊，就搞女囉！」張德明邪笑一下。「做呢行壓力唔細下。尤其呢幾年，特別多濕鳩政治任務。我心諗，關我撚事咩！好彩前排起個雙飛，出下火，唔係阿哥實燥底。」
 
「屌！講呢啲！」岑世英冇好氣咁笑。「特登上門搵我講呢啲？正經啲啦。」
 




張德明抗議。「屌！好正經架。你估咁易做！好似你死鬼老豆以前成日同你講，『好人難做，所以要做好人』。我而家諗，真係有道理，尤其做呢份野，特別喺咁。有時好難做。」
 
「有咩咁難做。唔做囉。」岑世英不以為然。
 
「你估咁易？唔做咪對屋企人唔住？」張德明食啖飯，又反擊。
 
「你出去玩又對得住阿嫂？仲有，阿明，你知我唔係咁想傾我老豆。」
 
「阿英你唔使咁頹喎！你之前查你老豆衰咗姐，唔表示之後…」張德明見到岑世英本身散漫嘅眼神變得不悅，即刻收口。
 
「再講我就話畀呀嫂知。」岑世英嗰樣好認真。
 
兩個人一下靜咗，睥住對方。
 
「哈哈哈哈！」兩個麻甩佬不約而同大笑起來。佢地笑到其他檯嘅人望過黎先講收聲。




 
「總之你唔講我，我唔講你，ok?」張德明做個「ok」嘅手勢。
 
「嗯。」岑世英哼一聲，飲住凍奶茶，望住檯面沉思。
 
「阿英，」張德明轉為嚴肅。「我都有單case，想問下你意見。」
 
「嗯？」岑世英咬住吸管，皺皺眉。