有一晚一個來電外傳: 第四章 - 那一夜 (下)

就係咁，我同阿欣第一次以情侶既身份，
入去我間房．．．

入房後，我開左冷氣，然後大家就上左床度，
一路蓋住被，我就緊貼住佢膊頭。

我冇出聲，阿欣係果時亦都保持沉默，輕輕依靠住我。
被入面，我同佢都拖住手，我拖得比以前緊，比以前用力。
依靠住阿欣既時候，就好似有一股魔法一樣，
之前既失落，不悅，擔憂，害怕，哀愁通通都消失，




取而代之既係，平靜，信賴同安全感。

阿欣稍稍轉換姿勢，上半身訓係我胸口上，
用手掂住我個心。

係果刻，我感受到阿欣既重量，亦都感受到愛情既重量。
我撫摸住佢既髮絲，由上而下，由上而下．．．
草本花香味既洗頭水依舊清新撲鼻，
就好似處身係一片花海之中一樣。





因為呢種熟悉既氣味，熟悉既身體，熟悉既面孔，
我先至能夠有十分既安全感。
虛弱既我，我就好似失去晒所有免疫能力咁，
再無法抵受外界環境任何一秒既轉變，
以及突如其來一波又一波既襲擊。

阿欣伏係我心口上：樂，可以講你尋晚發生咩事比我知嗎？

我：嗯．．．我已經有心理準備．．．





阿欣稍稍起身上前錫左我咀一啖：我比勇氣你。

我：其實尋晚．．．
跟住，我就原原本本咁講出尋晚發生咩事比佢知．．

佢一路聽，聽得出奇地入神，出奇地代入．．
當佢知道我媽咪為我受左傷果刻，
佢亦忍唔住雙手捂住咀巴，一副難以置信既模樣，
同時流露出哀傷既神色。

愈講我就愈難以忘記，到完完本本都講完既時候．．

我話：其實，果一下，原本應該我擋，應該我受，
換轉係重覆發生幾多次，我都會願意代我媽咪
，我受傷好過佢受。佢一直以黎已經傷害夠多，




點解個天仲要咁對佢？我實在好心痛，好心傷，
尋晚既事一直一直係我腦入面係咁重覆．．．
一直折磨我．．

阿欣貼近我，同我講：

樂．．你已經好勇敢，已經盡左你一切既努力．．
我相信你媽咪一直都感受到，你屋企發生呢ｄ事，
我聽到都好唔開心，做你女朋友我咩都幫唔倒手。
只要有你同家姐一直陪住佢，
已經係佢最大既幸福同快樂。

然後，阿欣就攬住我，攬得好緊，同我講話一直都會係我身邊支持我。
果時呢一句說話，呢一個擁抱，
令到我心完完全全溶化，




我再控制唔倒自己既情緒，
眼淚淚如泉湧咁不斷滴下．．．

我攬得佢更緊，更緊，緊得唔想再放手，
唔想再比佢離開我，我想一直將安全感留住係身邊私有。
阿欣係我耳邊低聲：樂，你用力攬緊ｄ，唔緊要架，我唔會痛。

一直以黎抑制住既種種負面情緒，
都係果時一次過爆發．．．
我痛哭起黎，
我啜泣起黎，
我再無顧忌，歇斯底里咁，
係阿欣膊頭大喊一場．．．．．
就好似受委屈既小朋友一樣。





我喊得身體有點抽搐，
阿欣想鬆開懷抱，幫我擦眼淚。
果時我攬得佢更緊，唔想比佢見到我喊到豬頭既樣。

然後我即刻拎轉身，背住佢。
阿欣就話：哦，你唔理我啦。

我：唔係，只係我唔想．．

阿欣：唔想比我見呀麻。

佢從後攬住我，胸前緊貼住我背脊，
然後話：傻佬，我點會介意呢，乖啦，擰轉面好嗎？

咁我惟有乖乖地聽服，




佢見到我之後，會心微笑：
陰功豬啦，喊成咁，對眼腫晒。

我：你今日有冇帶相機？

阿欣：冇呀，做咩？

我：咁我都放心ｄ。

然後佢get到我講咩，就哈哈大笑起黎。
阿欣：嘻，本來應該係我哄你至係．．

佢一路幫我抹眼淚，
我搖搖頭：唔係啦，你已經幫左我好多．．
喊完出黎個心舒服ｄ，對我黎講已經好夠。

阿欣：係嘛？我又唔識溫柔．．．

我握緊佢雙手話：唔係，今日既你係最溫柔。

然後佢就甜甜咁，同我擁吻起黎。

果時，我望住佢，心入面一直覺得，
阿欣，對我黎講根本係一個折翼天使。
佢有天使一樣純真又令人難忘既面孔，
縱然身材係屬於魔鬼。
但更難得既係，有一顆真誠，真摯既心。

佢係一個擁有無限正能量既女仔，
亦都係我心靈救贖者。
我愈諗愈覺得佢黎得夢幻，
此女本應天上有，
更同我牽上紅線，
而家比我擁在懷裡，
機會更屬曇花一現。

然而，折了翼既天使，
總有一日會返回天堂。
係佢拍翼展翅之前，
我地尚有二十五日既見面時間。

二十五日，我應該點樣去珍惜？
可以乾脆變成人類同我一齊永永遠遠嗎？可以嗎？

我同佢相識左數百日，
真正拍拖卻只有四十日。

呢段愛情受住限期束縛，
受住時間束縛，日後就更加受住地域所分隔。
係咪因為呢段愛情被定上食用期限，
所以大家想會咁珍惜對方？
先會相處得咁美好？
先會過得咁甜蜜？
先會將一切熱情放於期限前?

如果一開始並冇時間所限制，
仲會唔會黎得咁夢幻，黎得咁自然，黎得咁溫馨？
大家又會唔會咁放得開去表達自己？

然而，
我地既擁吻，擁得激烈，吻得天昏，吻得地暗．．．
之後．．．

唔知係咪因為喊過，
我更想將激動既情緒，融入我對阿欣既愛意之中。
我放開一直以黎對愛情既理性同原則，
對佢變得渴求起黎。

我貪婪咁鍚著佢雙唇，
唔比佢有任何喘息既空間。
舌尖不斷向前探索，
並互相纏綿著，
果種濕潤同溫暖既快感令到身體突然變得刺熱。

錫得愈肉緊，雙手亦攬得愈肉緊。
我將阿欣整個人都壓係我上面，
再深入感受住佢既重量，
以及身體之間微妙既觸感。

我不自主，慢慢將手伸入佢背脊，
溫柔係佢刺熱既肌膚之間不斷游走，
質感有如絲絹一樣順滑，
實在令人愛不惜手。

我用指尖輕輕咁沿住佢微微Ｓ型既背紋滑落，
去到佢腰間既時候，就吱左佢一下，
佢亦即刻縮：喂喂，唔好吱，好痕架。

我：哈哈，係咩，咁要吱多幾下啦。

阿欣：唔好～～唔．．．好痕～～縮手．．

見佢比我吱到身體都縮埋個樣，我就覺得好好笑，
真係唔明個個女仔都咁怕吱，好彩我係免疫，除左腳板外。

佢見我吱完佢，就拍左我一下：
阿樂你好衰架，叫你唔好仲係咁。咦～唔理你啦。

然後佢好似一個淘氣既細路女咁，背住我訓。
我用手指dook一dook佢背脊，佢扮晒野冇理我。

我話：喂喂，你唔理我啦？

阿欣用被蓋住佢個頭話：唔理唔理唔理～

我就順勢貼近佢背脊，雙手從後緊緊抱住呢個淘氣鬼。
放輕聲線係咁耳邊話：你唔理我，冇人理我架啦喎。

阿欣：你搵ａｍｙ理你啦！佢仲好攬ｄ添！

我笑左出聲：哈哈，佢點同你呢。
你咁得人鍾意，又咁錫我，我只係想要你咋。

阿欣：咁．．我係邊個？

我：你係我最愛果個。


跟住我就鍚左阿欣耳珠位置一啖，
佢身體微微咁震左一下，然後開始縮。

我變本加厲，用舌尖挑逗佢耳珠位置既敏感帶，
之後移向頸，並吸吮起黎。

阿欣既呼吸開始急速，開始亂，
佢喘息既聲音雖然好微弱，但我依然聽得好清楚，
而且不斷刺激住我腦部神經，挑起心中既慾火。

阿欣開始抵受唔住我既進攻，
佢亦無法就手旁觀，雙手總要搵Ｄ寄託，
於是就擰轉身攬住我，然後伸手入我背脊輕輕用指甲捉實。

我地繼續濕吻，延續彼此前所未有既激情，愛慾。
期間，佢溫柔咁咬左我下唇一下，
同我講：樂，你今日好壞耶，係咁錫我。

我：好壞咩？咁你好好錫呀麻。

阿欣：唔得喎，容咩易比你．．．唔．．．
我冇耐心等佢講完，已經用雙唇封住佢個咀唔比佢再多口，
而佢亦都乖乖地面紅就範。

阿欣不斷用指尖掃我背脊，我亦不甘示弱係佢腹間撫摸，
慢慢，慢慢咁向上移。

心跳不斷加快又加快，快要超出我既極限，
呢種速度就好似我岩岩用力跑完一百米一樣。

終於，右手指尖已經到左佢bra既邊緣。

我心入面有ｄ膽怯，心諗如果掂到既，
阿欣既反應會係點？佢又會唔會介意？會唔會因為咁而嬲左我？

我腦海入面出現左兩種聲音，出現左一場角力既對話。

天使話：樂，你咁樣會唔會太快？畢竟你地發展左唔係好耐咋喎！
都係規矩ｄ好。

魔鬼就駁咀：你咪扮聖人啦！知你想揸好耐，黎啦，今次係好機會。
執輸行頭慘過敗家呀屌你！你係男人就同我上！上呀屌！

最後．．

我當然將靈魂賣比魔鬼，畢竟阿欣既身體原本就係屬於魔鬼既。
況且，我知道自己對阿欣，一直都係以愛行先，
我並冇對呢種有ｄ過激既行為感到內疚。

我將手指慢慢沿住佢胸罩上游移，憑觸感可以斷定係屬於蕾絲質地，
當然無辦法判斷係咩顏色。

記得我有個朋友，
話佢自己單憑感覺已經可以知咩色，
仲話咩單手除bra扣會令女仔high d，真係痴撚線！

當我接觸到佢個bra既時候，
一種無法抗拒既柔軟感充斥住我掌心所有神經，
不禁驚訝呢種軟屬係世上任何一件物件都比唔上。

阿欣並無任何反抗既動作，可能係因為大家keep住錫既關係。
我放輕動作搓揉住佢胸脯，
用心感受住呢一份女性獨有既觸感，
以及女性身體既奧妙，
簡直就好似一件珍貴既藝術品一樣，
唔捨得將佢摧殘。

佢胸脯起伏隨住我既撫摸亦愈黎愈大，佢亦捉得我愈黎愈緊。
我係果時稍稍停低手上動作，
感受住佢既心跳 － 瀑瀑，瀑瀑 －
唔知阿欣佢，緊唔緊張呢？

正當我想進一步，伸手入去bra裡面既時候．．．

正當我想進一步，伸手入去bra裡面既時候，
阿欣輕輕阻止我，細細聲係我耳邊話：合約暫時唔包架喎。

我愕愕然：咁點先包埋呢？包租婆。

阿欣擺出若有所思既樣，用手指掂掂咀唇：
嗯．．升級做vip啦。

我：係呀．．點先可以做到vip架？

阿欣：要得到我既賞識先得。

我：我仲未得到你既賞識咩？

阿欣掂一掂我個鼻：嘻，未喎未喎。

我：咁我要點做呀？

阿欣：我要你，全心全意咁愛我，比我感受倒。
係合約前完成倒既話，就可以獎勵你咁做。
如果唔得既，噢．．咁就無辦法啦。

我：咁抽象，好難架喎。

阿欣：咁就要睇你啦！如果你係真心真意既，一定可以比我感覺到。
我冇咁易就範既。

妳，果然係一個耐人尋味既女仔。

我：咁，我而家可以訓係你心口上嗎？

阿欣有ｄ怕醜點點頭。
我訓係阿欣既雙峰上，
感覺就好似一個枕頭一樣柔軟，有彈性。

原來，比一個愛人緊緊擁在懷裡既感覺，
係咁幸福，咁安逸。

我明白我對阿欣既愛並唔表面，亦都唔係膚淺。
每拍一次拖我都唔係為肉體上既快感而去愛一個人，
所以性對我黎講其實係僅次於愛既附屬品，對我黎講係一個bonus。

比起肉體以上，我將愛情視為對我自己心靈上既救贖。
好坦白講，其實我，並唔一個樂觀既人，諗野方面傾向悲觀，傾向消極，
可能因為成長環境既影響。

愛情對我黎講，
係一種心靈上既支持，
係我缺乏安全感上既補給，
係我生活上動力既來源，
亦係構成我去愛一個人既原因。

我知道阿欣佢，
無論係性格上，家庭上，背景上，
都係好適合我，都同我有住好大既共鳴。
所以，我盡量都想好好珍惜佢。

我遲遲唔掂佢肉體，並唔係因為我冇需要，
亦唔係因為我膽怯，唔係普通人眼中既愚蠢，
只係我想以佢既感覺行先，
想呢一切一切都黎得自然，
而唔係咩都為做而做。

我亦知道我自己開始倚賴住阿欣，
倚賴佢對我既溫柔，
對我既體貼，
對我既關懷，
以及佢既安全感，
然而我知道二十五天戀愛有限期。

到時我可以點放手，放開呢種倚賴？

我係溫柔鄉入面，泛舟靜靜躺住，
感受阿欣起伏有序既呼吸，
聆聽佢心如止水既跳動。

係呢個無風無浪既心境，
伴隨有節奏既心跳拍子，
我甜甜咁，訓著了。
心裡默默唸著：欣，早抖。

訓醒果時，我望望手錶，
原來五點半，唔經唔覺訓左個半鐘，
好耐都未試過可以訓得咁好。

我起身望望佢，原來佢仲訓緊。
我唔想嘈醒佢，靜靜咁係佢旁邊，
欣賞住佢既睡姿，同埋佢面孔。
望住一個自己鍾意既人訓覺，
心入面都會不斷湧出一股股甜甜既感覺。

唔敢相信眼前既阿欣，
可以同我走得如此靠近，我係發緊夢嗎？
無論夢又好，真實又好，都唔重要，
我只係想好好留住呢一個時刻，
比我見多ｄ阿欣唔同既一面。

望住佢呢一個完美既面孔，
並冇因為天開始暗而令佢黯然失色，
我不禁伸手撫摸住佢暖暖既臉頰，
低頭錫左一口。

動作可能有ｄ大，佢比我整醒左。
我：唔好意思呀，整醒左你．．

阿欣：唔係．．唔覺意訓左添。

我：我知呀，仲訓到成個小朋友咁，
流晒口水．．

阿欣：真架！？

我：假既．．

阿欣搣一搣我，
抱怨咁話：都係你，整到人地咁攰。

我：．．．．嗯．．我唔係好明你既意思．．

阿欣：哎呀，仲扮傻呀，好囉。
係呢，你媽咪未返嗎？

我：未呀．．

阿欣：而家幾點？

我：五點四十五分倒啦。

阿欣向我提提議：
嗯，不如我地整定晚餐等你媽咪返黎食囉？
佢手又傷左唔好叫佢咁操勞啦．．

我點點頭：好提議喎，而家一齊落去買餸囉。

心諗：我亦係時候為媽咪做返ｄ野。

整理一下儀容之後，我地就雙雙拖住手，
去街市，去超級市場，整我地倆人首次既晚餐。

我地手指緊緊扣著，扣著。
我冇試圖放開過佢一分一秒，
走到街市，走到媽咪每日都會為仔女步入既地方。

呢次，係我頭一次，
真真正正為左屋企而去，
真真正正為屋企人煮一餐飯，
真真正正，去投入我媽咪既世界。

我地倆人用心留意每一家檔口，
走過一排排脂肪均勻既肉鋪，
走過嫩綠得令人注目既菜攤，
走過腥味濃烈既魚檔．．．．．．

咩係鍾意食，咩係討厭，
邊ｄ新鮮，邊ｄ唔新鮮，
邊ｄ易煮，邊ｄ難熟，
我同阿欣都各自比左一大堆評價，
兩個新手互相交流各樣各樣既意見。

賣餸既老闆們無不向我地兩個陌生面孔投下好奇既目光，
可能覺得我地年紀太細吧，
但我反而樂在其中，身旁既係我的最愛。
我冇迴避，因為一直緊扣既雙手，
已經為佢地既好奇定下答案。

熱鬧，人山人海既街市，
每位擦身而過既，
或者都費住同樣既心思，
想煮一餐最好既比最愛既，
包括自己既父母，老公老婆，仔女。

以前，我曾經覺得煮一餐飯係一件好容易既事，
未能夠體會到果一份心機，莫講話去欣賞？
當而家親身去感受既時候，原來係咁困難。
將各式各樣食物都要瞭若指掌，
要識得分辨新鮮與否，
逐家逐家去價格，
同打好關係，
以上都係一門學問，而唔係以理所當然既態度可以做倒。

每位媽媽每煮一餐飯的而且確係辛苦，亦唔係必然既事。
以前既我只係識得坐係凳上等食，
開台拎碗拎碟拎筷子通通都唔做，
食既時候又會抱怨成日黎黎去去都係呢ｄ餸。

到呢次真係自己去揀，去挑選，去落手落腳既時候，
先知道小小既街市，平民既菜色，根本冇可能每日整到唔同既餸。
果時先明白，媽咪能夠整倒咁多款出黎，已經好叻。

而令我了解到呢一份心思既人，係阿欣。
愛情對我黎講並唔係膚淺既事，
多得佢，我先可以成長，
脫離一直以黎無知既稚氣。

冇左佢，我唔會用心去踏入家人既世界入面，
係佢教識我要多ｄ孝順，多ｄ錫屋企人。
到而家，廿幾歲人，
我好慶幸自己因為佢而變得識諗左，
而唔係以前一度反叛既自己，
我仍然，仍然好珍惜家人每煮既一餐飯。

買完餸後，我地就去超級市場隨便逛逛。
我推住車仔，阿欣佢就係後面雙手推我膊頭，
我地停過零食區，停過飲品區，
停過雪藏櫃，停過試食位置。

因為有佢，連超市都變得有趣得多，
就連一包零食都變得有生命起黎，
拎起討論討論再討論。

一個人時既沒趣，兩個人湊起就變得有意思，更為甜蜜，
連一家經已行到爛既超市都可以行夠個幾兩個鐘。
將平凡變為不平凡，正正係愛情既能力。
將不簡單變成簡單，亦係我最想要既愛情。

有時候，平淡，寫實，脫離利害既關係，
的確係生活上既一點清泉，
人愈大就愈難搵到。

返到屋企，
我同欣分好工，
我洗米既時候，佢就洗菜。
到要切野果時，我唔想佢有咩閃失。
於是．．

我：等我切啦，費事整親你呀。

阿欣從後攬住我：嘻，你真係細心呀。

我：你一直攬住我我做唔倒野架喎。

阿欣：做咩？你都會分心架咩？

我：梗係會，你吸引力大咁多，
成個心都比你吸走啦。

阿欣：我而家就要訓練你既定力呀麻，唔準擰轉身架。

然後佢輕輕係我耳邊一吹，成個人即刻好似打尿震咁震左一震。
我一路專注唔好切倒手指，一路承受住阿欣既攻擊。

佢挨著我膊頭：我想一世都痴住你。

我笑住話：可惜我地唔係連體出世呢．．．

佢話：邊有男女連體出世架．．連體嬰通常都同性架啦！

我：又係喎可。
男女都有連體其實，但唔係出世果時。

佢諗左一諗，然後一邊捏住我條頸話：
哦！你個咸濕鬼又講衰野！

我：哈哈，醒左喎！知我講咩！

阿欣：唔理你啦死變態佬！
然後佢就行出廚房。

我切好晒所有野之後，
就大聲叫佢入黎：喂！變態婆！到你煮野啦！
然後佢唔應我，咁我就出去睇下咩事啦！
呀！點知見佢坐下梳化度望住我喎。

我：哎，做咩唔應人架？

阿欣：車，呢度都冇人變態，鬼應你。

我就行埋佢一路吱佢一路話：冇人變態呀拿！

阿欣：哈哈，救命呀！變態佬呀！！

我：投降未？
佢微微擰頭，我就用多幾錢肉緊。

我：咁硬頸呀拿。

阿欣：哈哈，投降啦投降啦！
唔玩啦，我要去煮飯。

我：咁我洗唔洗幫手？

阿欣：講明你切野我煮架嘛。
乖啦！今次你靜靜坐係度，見識下我既手勢。
唔准入黎廚房架！除非我叫你。

我：哦，好啦。
咁神秘做咩呢．．

阿欣：係喎，樂，你係唔係唔鍾意食紅蘿蔔？

我點頭：嗯嗯嗯。

然後佢就入左去煮野。
每隔一段時間就會叫我入去試下味，
然後就趕返我出黎。
我：喂！係得喎！ｄ味岩岩好。

阿欣：嘻，係咪架？呃我我唔放過你架喎。

我：點會呢，真係好好食！貌相又同你一樣．．

阿欣：即係點．．？

我：都係咁得囉。

阿欣：咦～快ｄ出返去啦死傻佬，就快有得食架啦。

臨出去前，我一直默默咁望住阿欣既背影，
今晚我見到既，係佢賢良淑德既一面。
我心入面諗：將來，佢一定係一個好老婆．．．

冇幾耐媽咪返，
我就同佢講唔駛操心，
今晚我同阿欣煮，
叫佢好好休息返一日。

開台拎晒ｄ碗筷出黎，家姐今晚有約唔返黎食，
我地三人就一路開住電視睇，一路食飯。
阿欣：親熱食啦，凍左就唔好食架啦。

媽咪：呢ｄ都係你煮既？

阿欣有ｄ怕醜：係呀姨姨，唔知好唔好食呢．．

媽咪：一定好食，咁細個識煮野已經好叻女啦！

我見媽咪一直望住ｄ餸，笑容由心甜到出黎，
好耐都冇見到佢咁開心，果時既我亦都好心滿意足。
估唔到簡簡單單煮一餐飯，已經可以令佢咁安慰。

媽咪：不過我個仔就唔得啦，咩都唔識煮！

我：邊有．．．

阿欣：咁又唔好咁講，阿樂佢有份幫手洗同切架。

媽咪：哈哈係呀，唔怪得ｄ豬肉一岩一忽咁。

阿欣：哈哈。

我：．．．．．．．

阿欣同我講：係喎，差ｄ唔記得左．．
我為左你煮左一樣特別既比你食，
你等我拎出黎呀。

我：咩黎架？

阿欣：嘻，你一陣咪知。
姨姨，食條菜呀。（然後阿欣就夾左去媽咪個碗上）

媽咪笑住口話：唔該晒。
阿欣起身走入廚房。

係佢入左廚房咁剎那，我媽咪比左個good既手勢比我。
我：ｄ餸好食？

媽咪：點止，仲好生養！
我不禁笑左出黎，原來媽咪讚好主要唔係餸，反而係好生養。

阿欣一邊拎碗野出黎，只見碗上面搵左個蓋蓋住，
我冇法睇得到入面係咩黎。

我：咁神秘架！

阿欣：登登登登！
然後就張個蓋打開．．．

我：．．．．．．．．！！

心諗：屌．．竟然係！！．．．．

阿欣：嘻，紅蘿蔔呀樂！！

我：．．．．．．．．（屌！哇呀！）

我媽即刻笑到出唔倒聲．．
我抱住絕望既心情：頂．．仲要就咁白焯添．．．
邊有人咁煮法．．架．．．

阿欣：咁人地覺得咁煮可以保留倒最多營養呀嘛．．
唔食紅蘿蔔點得架．．

我：仲要成碗都係．．．

媽咪：岩啦！一次過食返夠本。

我：呀．．見到都毛管凍．．紅蘿蔔．．
即刻冇晒食慾，連性慾都冇埋，今晚打唔倒飛機啦！

阿欣一副可憐既眼神望住我：
樂，你係咪唔食呀，你係咪要糟蹋我既心意呀？
然後台底一邊用力搣住我大髀。

我一路忍痛一路暗屌佢：唔係．．唔係．．
你對我．．真係好好！哈哈！！好好．．

阿欣：梗係啦，等我餵你食紅蘿蔔。

我拱手：欣師妹！客氣啦！為師．．實在食唔落啦．．！！
然後阿欣襯我講野時一下就塞左落我個口，令我反應都反應唔切。

阿欣：姨姨，我地繼續食飯啦。

我一路食，一路流眼淚，真係好撚難食，唔係講笑．．

阿欣：樂，我知你好感動，紅蘿蔔．．一定好好食。

媽咪：有妳係度我就放心，
可以令佢食返佢平時唔食既野．．

阿欣：咁阿樂平時仲有咩唔食架？

我猛咁擰頭，示意叫我老母唔好講出黎，
點知．．
媽咪：好多架喎，魚呀，苦瓜，青椒．．

阿欣聽完之後，即刻用狡猾既眼神望住我：
哦哦～咁下次要食多ｄ啦真係！

我：嗯，我打算以後落黎既日子都留係屋企比較安全。

阿欣：嘻，你敢！

媽咪：係囉，多ｄ帶我個衰仔出去！
唔好成日屈係屋企嘛。

我心諗：你究竟係咪我阿媽黎．．手指咬出．．

呢餐飯，
雖然只係好地道好平民式既住家菜，
但卻滿滿洋溢住溫馨，融洽既氣息，
呢種曾幾何時係屋企失去過既感覺，
而家再次因為愛而慢慢建立返起黎。

食完飯後，
阿欣話仲有樣神秘野整左，
叫我一齊入廚房去幫手拎出黎。
入到去，
我問：欣，又咁神神秘秘．．咩黎架煲野？

阿欣：嘻，係湯圓黎架。

我心頭即刻震一震：
唔會係紅蘿蔔湯圓掛．．．
（千祈唔好呀，咁同魚蛋雞翼湯真係同出一轍 ）

阿欣：哈哈，你諗野都幾特別喎。係就好啦．．
你睇。（佢打開左個蓋）

我：．．．紅豆湯圓．．？

阿欣：嗯。鍾意嗎？

我：鍾意呀，成日都食紅豆沙既。
係呢．．點解會揀紅豆湯圓黎煮．．？

阿欣溫柔咁話：你冇聽過紅豆寄相思咩？

我：紅豆．．寄相思．．？

阿欣一路拎碗，一路將湯圓逐粒裝落去，
一路話：我想你，永永遠遠都咁記掛住我呀嘛。

佢繼續話：而，湯圓．．
媽咪成日話湯圓湯圓，團圓團圓。
希望你地食左之後，以後你屋企可以
融融洽洽，團團圓圓。

我聽完之後，不禁感動到啞口無言。
萬萬都意想唔倒，一個飯後甜品阿欣佢都可以咁費心思。
無論紅豆，定係湯圓，都有本身既意義係入面，
因為阿欣，令到意義更加活起黎。

阿欣望住我雙眼講：
所以呢，紅豆就係for我同你既，
湯圓就係for你同家庭既。
黎啦，唔好發呆啦，拎出去啦。

佢補充：呀！仲有包有剩既紅豆送比你呀，
得閒掛住我又冇野做就逐粒逐粒去數啦。

一物寄兩情，單係呢一份心意已經唔簡單。

紅豆本身既色素令到湯都變得微微暗紅，
簡直就好似被濃濃愛意填充住一樣，
碗既體積雖小，但深不見底。
我望住嫣紅如淚珠既紅豆，
以及純白似珍珠既湯圓，
係白熾光線輝映下變得份外晶盈。

我喝了一口紅豆湯，吃了一口湯圓，
兩種鮮明對比係口裡互相襯托，
味道更出。
愛與家庭既甜蜜，
切切實實係我口裡蕩漾，
係唇邊回味著。

一碗滿滿既愛，令到我眼眶亦頓時刺熱起黎，
多謝妳，我好感動。

食過湯圓後既媽咪，當然仲甜過我啦。
從此後，我就愛上了紅豆湯圓，
亦愛上了紅豆。
食完之後已經算夜，
阿欣都係時候要走。

媽咪：咁快走啦？唔係度訓一晚？有床喎。

我即刻拍一拍我老母：
哈哈．．．唔駛理佢架，佢係咁”好客”。

阿欣：哈哈，唔好再打攪你地啦，
下次下次。

媽咪：哦，咁係架啦。下次一定要過夜。

之後，我就送阿欣走。
我地慢慢行當散步，
阿欣一邊話：
你媽咪都幾得意喎。

我：邊係呢，佢都係玩玩下，
你唔駛太過在意。

阿欣：唔係呀，咁樣幾開心呀。
有一位咁開通咁玩得既媽咪。

我：嗯嗯，的確係。

阿欣撫一撫弄自己既秀髮，
我：係呢，多謝你今晚餐飯，煮得好好食。

阿欣微微展顏：最緊要你鍾意。

去到車站，我地相擁一陣，繼而吻別。
返到家，沖個熱水涼，同阿欣傾左一陣電話後，佢就去訓。

我就拎左剩底既紅豆出黎，
逐粒逐粒放係書台上面，
我冇刻意去數。
但發覺睹物真係能夠思人，
紅豆真係可以寄入思念，
冇幾耐，我就不經意砌成一個心型。

我出去廚房，拎左一個玻璃樽入房，
將我呢一份思念，滿滿填充著空瓶。