【少少重甜】《用甜筒打喪屍！！》（完）

水族館設計都黑媽媽係有佢既原因，一，係因為令光集中係展品上面。二，係唔會太騷擾到水生物，因為外面暗少少，難D睇到人。當然除左章魚..當你望住章魚既時候，你好快會發現佢既動作係配合住你既表情、動作、心跳速度、呼吸速度，甚至情緒....章魚係我最怕既生物。最恐怖係佢對眼，望見都打冷震。

「好靚....」Angel企係大魚缸前面睇魚，蔚藍色既水照到Angel，令佢散發出一種仙氣。

我地真係勁好彩，一路行過黎真係一隻喪屍都無。但係調返轉，都係一個人類都無。我覺得有d奇怪，如果展望台上面既人叫人黎水族館避下，應該有其他人黎過先岩？定還是佢地9 up？

突然有腳步聲傳黎，我即刻走去拉住Angel，拖佢埋暗角！！

「你...」Angel話。

我唔出聲，望住遠處既出口位置。

出乎意料。

係喪屍！！

豈有此理，即係我頭先既假設唔成立，喪屍仍然可以生存係電波之下！！更加令我痛恨既係，喪屍同甲由一樣，見到一隻，好可能代表呢度有100隻以上！！

我好嬲，心跳即刻加速，好想即刻衝出去殺Seven隻野。但係衝出去殺左佢其實無補於是，因為佢後面可能仲有其它喪屍。而家唔係打緊機，我刀仔都無，得拳頭，點打十隻？

不過好彩既係，隻喪屍又行返轉頭，由出口度出返去徘徊。喪屍就係咁傻的嗎，又唔識坐下，成日咁樣行黎行去行到累。

「..你可以放開我未。」Angel話。我忘記左原來將Angel攬到好實。

「Sorry。」我話。

「果然你已經唔係以前既毒男啦...」Angel話。

我知道Angel因為摸到我胸肌先咁講。

「為勢所迫姐。」

「喂..你同果個日本妹，有無搞野？」Angel咁直接，都嚇左我一跳。