【少少重甜】《用甜筒打喪屍！！》（完）: 第49回 - 女神
我正打量住係呢個下層展望台——天望甲板既所有人。大部分都係無乜力量既人，女人，老人，就連用武器指住我地既人，都係年紀比較大既伯伯。
一大堆日文交談，我完全跟唔上。我同虧佬只能互望。因為我同佢都知道，最壞打算就係呢度收留唔到我地。唉，本身搵一個有利位置、顯眼既地標等待救援係一個最佳既方案！
「Chris。」師姐叫一叫我，提醒我留意情況。
詩音呢個時候走埋黎：「他們說..這裡已經不夠食物，不能再收留人了。」
「哼。」我話。「咁再上面既展望台呢？」
雖然我我估下面呢度無野食，上面有野食既機會都好微，不過我都照問。晴空塔既展望台有兩層，離地350米果層，亦即係我地身處呢層，叫做天望甲板。而高多100米，即係450米高既地方，就叫做天望迴廊。
「上面...已經被佔領了！」詩音話。
下，邊撚個Hi Hi霸住唔比人上？佢地有野食咩？
「好像是黑手黨之類的..都沒人敢上去。」詩音繼續話。
挑，而家呢個年頭，人類社區都毀滅左啦，黑手黨同普通人有什麼分別？佢地果種以錢做聯系既關系都已經無哂，而家上面分分鐘打生打死，或者一個生人都無添啦。
講係咁講，不過我唔會咁向左走向右走傻的嗎走去同佢地硬碰。
「你們可以去水族館那邊看看，那邊好像也有人避難。」有個係度避難既日本人話。
「好呀。
」我帶點諷刺意味，用廣東話答。 就係呢個時候，有個本身坐係埋一邊既女仔望左過黎！呢個係一個染左啡色頭髮既靚女，有少少似mix得睇得出係化妝影響。係人海之中，我即刻就留意到佢，因為佢就係.....我女神Angel！
