【少少重甜】《用甜筒打喪屍！！》（完）: 第43回 - 武

「キャーキャー!!!!!!!!!!!!!!!!」女人尖叫聲好嘈。估唔到喪屍唔係光明正大咁，係條馬路度度比人望到咁黎，而係由暗巷走出黎咬人！咁就咬一件，人命真係好跪弱。 

睇得電影多，以為喪屍會一大群咁出現。不過現實係，有一隻係你面前都已經淆到震！！ 

「喂..怎辦好？」詩音問我。但我地已經離喪屍十米遠，食緊花生既距離。 

「走！」我即刻話。 

我記得學武既時候，最好打果個師傅第一句教我地，要識「走」！！因為就算幾好打，打得贏唔代表唔會受傷。加上係香港大打出手，後果都只會係差館見。所以有得走，一定要走。三十六計，走為上計，呢個定理係無錯！！ 



「但呢度係我地據點喎！」跟住我同詩音係後面跑既師姐話。 

「咁希望民間自衛隊有用啦。」 

我地再跑遠D，然後再離遠觀察。唔知係咪打得機多，或者睇得電影多，眼前既畫面總覺得唔係真實，然後催眠自己係假既，然後真係無乜緊張感。當然呢個只限距離遠，夠安全既情況啦。 

「屌，又咬一件呀？」我用望遠鏡望實。「睇路先得架，鳩下鳩下咁咪比人咬囉...」 

「不去幫助嗎？」詩音個樣好焦急。本身我都無諗住要出手，不過見到離喪屍3米左右既旅館門口，有個好熟悉既面孔... 



「京香！」我大叫。仆街，點解呢個時候走出黎架？  點解唔留係入面呀？  

唉，要要出馬了！終於有點兒緊張！！ 

「虧佬！睇住詩音！師姐同我一齊黎！」我講完即刻向喪屍方向直跑！！