【自殺之後，我遇見死神小姐】救贖七個自殺者的故事: Case 7 被愛著的那個人—(52)
死神小姐並無同我講到妹妹嘅所在之處，如果死神小姐有心收埋我妹妹，佢大可唔講我妹妹嘅消息。
既然死神小姐要我親自搵佢，再加上佢係話妹妹「等」緊我，即係嗰個地方我係應該知道……同我同妹妹有關連嘅地方。
我一邊從天台落去，一邊思索妹妹嘅所在之處。
如果講到妹妹喺某個地方等緊我，我馬上諗到一個地方——我哋嘅秘密基地。
對我哋嚟講，秘密基地係我哋嘅家園，只屬於我哋嘅地方，我同妹妹約定過，當佢搵唔到我嘅時侯，就會去秘密基地度搵我，如果都搵唔到，就喺嗰度等到我嚟為止。
無錯！一定喺嗰度！
秘密基地離我身處位置唔遠，就喺隔離村屋嗰度，想見妹妹嘅心情令我焦急起嚟，我加快腳步跑過去。
呢次係我自殺之後，再一次擁有記憶去面對妹妹，比起妹妹重係「小妹妹」嘅時侯，我嘅心情更加緊張，心不停卟通卟通咁跳。
我哋之間實在發生太多事，之後又喺無記憶嘅情況下再次相遇，一同去救贖自殺者。種種經歷浮現喺我嘅腦海中，我唔知應該用咩心情去面對佢，只知道嘅係我一定要再去見佢。
——『你根本無去聆聽過佢嘅感受。』
我想知道妳心裡面究竟諗咩，我想知道妳係抱住咩心情攬住我一齊墮樓。
我必須要搞清楚，因為妳係我人生入面最重要嘅人，既然重要，就必須要清潔妳嘅諗法，妳嘅感受。
我穿過公園，越過馬路，到達僻靜嘅村入口。天色已黑，呢度附近只有幾盞微弱又殘舊嘅街燈，顯得十分昏暗，不過就算我瞇埋雙眼，都會識得行去秘密基地條路。
「汪！汪！」狗聲突然傳嚟，大概係附近嘅流浪狗感受到有陌生人接近，所以喺度吠。聽到啲吠聲，我不自然諗起狗狗……小獅，呢度係佢嘅屋企。
我回想起救贖嗰六個人時，佢哋無一個人認到我，達叔唔識我係應該，但其他人應該會知道我係邊個，然而佢哋喺最初嘅時侯無認到我，但喺幫Cathy、阿立同Stephanie完成願望之後，佢哋都對我露出驚訝或者愕然嘅眼神，因為佢哋認出我係邊個。
小獅到最後一刻係完成咗佢嘅心願，因為佢認出眼前嘅人就係佢等待多年嘅人，所以先會講出嗰番話，然後不帶遺憾地離開世上。
呢個應該係死神小姐做嘅好事，佢作為「死神」，連將我復活幾次都做到，咁嘅事情對佢嚟講毫無難度。
妹妹都同我一樣被死神小姐做咗手腳，如果唔係Stephanie應該早就認出佢個女。
Stephanie……我嘅母親，佢都完成咗佢嘅心願，而且係不知不覺間完成，而到最後佢都知道佢眼前嘅人就係佢仔女。我明明好憎恨我母親拋棄咗我哋，但呢刻……我感覺唔到自己重對佢有任何恨意……
當我回想返佢嘅內心自白，我發現……其實我恨佢唔落……
我踩入鬆散嘅泥沙路，行到密麻麻嘅草叢面前，一手撥開草叢，穿過草叢到達秘密基地。
「妹妹！」我興奮地叫咗聲。
但喺我眼前只係一片鬆散嘅泥沙地，妹妹並唔喺度……
無理由，如果係妹妹嘅話，佢應該會喺度等我先啱……定係，正如死神小姐所講，我根本就唔瞭解我嘅妹妹。
妳唔喺度嘅話，究竟妳會去邊度先啱？
我踎喺地上，諗起我哋喺度曾經嘅回憶，然後用手將地上嘅泥沙挖走，不停挖不停挖，挖咗幾分鐘，依然係空無一物。望住眼前呢個小坑，我肯定喺呢個位置，我拉高衫袖繼續挖。
指甲好似挖到啲硬物，我即刻加快速度挖。終於，我將嗰樣嘢喺厚實嘅泥沙中挖出嚟，係我同妹妹嘅時間錦囊。雖然鐵盒鋪滿泥沙，但我打開鐵盒，裡面有兩張摺埋嘅紙，如同昔日一樣，無任何變化。
我望住自己嗰張願望，腦海中已經浮現當時寫過嘅句子。
『我要同妹妹開開心心地生活下去。』
一句簡單到連小學生都識寫嘅句字，無太多複雜嘅感受，係我當時寫落去嘅願望。
之不過，到最後嘅路上，我扔低咗妹妹，因為無「同妹妹生活落去」呢個選擇俾我揀。
我將妹妹嗰張時間錦囊拎埋出嚟，打算打開嚟睇，可能裡面嘅內容會係搵到妹妹嘅關鍵。不過……我應承過妹妹要十年之後先可以開嚟睇，如果我而家偷睇就係無守到承諾。
最後我決定唔打開嚟睇。
我拎住我哋嘅時間錦囊，坐喺地下度沉思。既然妹妹唔喺度，我已經無任何線索去搵到我妹妹。
或者……我真係唔瞭解妹妹，我完全無探索過妹妹嘅心，永遠都係自說自話要保護妹妹，一味自我淘醉。
但係，我唔諗住放棄，再多嘅難關我都面對過，無論係生活嘅艱苦，定係救贖自殺者時遇到嘅困難。死神小姐講過，有啲自殺者嘅心願幾乎無可能達成，如果我而家放棄嘅話，咪即係向死神小姐證明呢句話係啱？
我並唔會放棄最後嘅機會，或者我唔瞭解妹妹，但既然諗唔到妹妹會去邊，就將所有有可能嘅地方都去一次！就算走到天涯海角，我都要搵返我最愛嘅妹妹。
我企起身，將我同妹妹嘅時間錦囊袋落褲袋，然後離開村屋，向第二個目的地出發。
妹妹除咗會喺秘密基地等我，重有一個地方！
天色變得完全昏暗，我跑返去屋邨附近，離遠望見掛喺商場上嘅大鐘，而家係八點，離午夜距離四個鐘，我要喺呢四個鐘內搵到妹妹！
我沿住街道不停地跑，雖然跑到上氣唔接下氣，但我無減慢我嘅步伐。我踏嘅每個步伐係何其沉重，周圍嘅景色飄移得有幾咁慢，就好似世界停落嚟，只得我一個人喺度跑動。
我到達學校閘門前，學校早就閂咗門，校舍內嘅燈光只剩低一兩禮係開緊。
我並無望見妹妹喺平時等我放學嘅位置。
望住呢道大閘，我諗起妹妹每日都嚟呢度等我放學嘅時光，因為上到中學之後放學時間遲咗，當妹妹上到中學後，我已經升到高中，開始忙緊公開試嘅預習，結果更加遲先放學，每次放學都係妹妹等緊我。
但我每次都好期待放學嘅時光，可以見到妹妹，聽佢分享佢喺學校嘅趣事，睇下佢喺學校畫嘅畫，整嘅作品，然後望住佢笑逐顏開嘅樣，再同佢輕鬆渡過放學之後嘅時光，可能係去商場或者公園行下，可能係帶佢去麥當勞食雪糕，可能係走去我哋嘅秘密基地瘋狂玩一日。
不過，我從來無同妹妹分享過我喺學校嘅事，因為我無同同學真心交流，我厭惡喺學校嘅時光，我無喺學校度得到好嘅回憶……除咗Cathy之外。
妹妹，會唔會係想聽一下，我喺學校發生嘅事情？會唔會一直期待緊，我將喺學校發生嘅事情同佢分享？
妹妹係想知道我嘅事情嗎？
我望住漆黑嘅天空細思著，但時間唔容許我繼續企喺度發吽哣，之不過除咗學校，我諗唔到重有啲咩地方去。
就喺呢個時侯，一道聲音傳入我耳中。
「咦，點解你又會喺度嘅？」
我擰轉身，原來係我嘅一個同班同學，佢係我幫小獅同阿Yan完成心願時都見過嘅嗰個男仔。
「無，我依家搵緊我妹妹。」
「你唔見咗你妹妹？」
「係呀，唔知佢去咗邊度，我已經去咗平時佢等我嘅地方，但都係見唔到佢。」
「佢會唔會喺原地等緊你呀？」
「原地？」
「係呀，同人失散嘅話，可能佢就喺原地等緊你返嚟搵佢呢！」
原地……呢個無心嘅對答，令我諗起重要嘅線索，或者知道妹妹喺邊度。
會唔會係，妹妹由始至終都無去過其他地方，佢一直喺「原地」等緊我，等緊回復記憶嘅我返到去我哋嘅歸宿。
天台係事情嘅終結之處，我哋生命盡頭最後身處嘅地方，但啱啱喺天台並唔見妹妹，天台唔係原地。
原地……會唔會就係我哋嘅屋企？嗰度係事情嘅開始之地，亦係我哋誕生之處，我哋之間經歷嘅起點。
其實佢可能就喺屋企等緊身處天台嘅我，只不過我忽略咗屋企呢個選擇。
「使唔使我幫下你手呀？我依家等緊friend，不過我早咗到，我可以幫你一齊搵下。」男仔講。
「唔使啦！」我雙手大大力搭落佢膊頭度，誠懇地同佢講，「唔該哂你！」
佢用疑惑嘅眼神望住我，而我離開呢度，向我屋企嘅方向跑過去。
我再一次沿住回家嘅道路奔跑，如同當初追妹妹追到上屋企一樣，今次妹妹無喺我面前引導我，但我知道我應該要去嘅地方。
我上到去屋企，拎出褲袋裡嘅萬字夾將門打開，但屋內卻空無一人。我記得當初妹妹入到屋企後，喺坐喺房間內嘅床等緊我。
然而，我打開房門，妹妹並唔喺度。
妹妹並唔喺原地等緊我，咁佢應該去咗邊度……？我嘗試思索其他嘅可能性，原地會唔會係指我最初同佢再次相遇嘅街道上？
我離開屋企，去到當初我哋相遇嘅街道，不停喺附近地區到搜索，但點搵都唔見妹妹嘅身影，只剩下寥寥無幾嘅路人。
所有有可能嘅地方幾乎搵過哂，但都無法搵到妹妹，我甚至返去天台重新搵一次，希望自己係睇漏眼，但始終都係見唔到妹妹嘅身影。
我返去屋企，無力地坐喺床上，而家已經九點半，離午夜只係剩返兩個鐘。唔通，我真係同妹妹無緣再見？
我意識到自己唔瞭解嘅妹妹嘅時侯，已經太遲，我唔知妹妹心裡面嘅真正諗法，所以我諗唔到妹妹究竟會去咗邊度。
又或者咁樣諗……我再見返妹妹，係咪真係件好事？
會唔會……其實無咗我呢個唔稱職嘅哥哥，佢嘅人生會更加幸福？
我從褲袋拎出我同妹妹嘅時間錦囊，如果打開妹妹嘅時間錦囊，或者我就知道妹妹嘅真正諗法，只不過要偷睇妹妹嘅時間錦囊先知妹妹嘅諗法，我到底重應唔應該再去搵我妹妹？
有時，命到盡頭，倒不如隨緣。
既然我哋之間無真正嘅牽絆，不如就放下執著，俾一切事情完結吧。
由始至終，我想保護妹妹嘅心情，只不過係為咗填補我心中空虛而產生出嘅扭曲感情。
我將我同妹妹嘅時間錦囊放返喺檯上，呢個時侯我注意到檯上面嘅一樣嘢。
呢張紙係……