【自殺之後，我遇見死神小姐】救贖七個自殺者的故事: Case 7 被愛著的那個人—(44)
自嗰日之後，我內心出現好大嘅變化。
「哥哥，妳返嚟啦？」妹妹見我返嚟，熱烈地歡迎我。
「嗯。」
「哥哥我想同你玩玩具呀！」妹妹遞起個殘舊嘅芭比玩具畀我。
「唔玩啦……」我冷淡留下一句。
「哦……」妹妹失落地放低芭比玩具。
呢啲童年玩物對我嚟講已成過去，我再唔係當日天真無邪嘅細佬。
失去母親之後，我嘅世界變得灰暗，我嘅內心慢慢封閉起嚟，再難以相信其他人。同學當我係異類，老師當我係問題學生，但對我嚟講咩都無所謂了。
無論對任何人付出多少真心，到最後都係被人當係地底泥咁踐踏，得唔到應有嘅回報。
幸福嘅生活從來唔屬於我。我再唔會依靠其他人，喺呢個世界，能相信嘅只有自己，只有令自己變得強大，我同妹妹先唔會再受到任何傷害。
至此之後，我再無向其他人敞開過真心。
好孤獨，但只有咁樣，先能夠成長。
有一日，我放學途中經過公園，我望住啲同學喺公園一齊追逐，一齊打鬧，感覺十分開心，但我理性同我講，呢種生活唔屬於我，我要拋棄天真嘅諗法，唔可以同佢哋一齊玩。
就喺呢個時侯，忽然有把聲音傳入我耳中。
「汪！」
我擰轉身，有隻狗仔企喺我後面吠，我唔知係咩品種，全身被啡色嘅毛包到毛鬙鬙咁。
「汪！汪！」狗狗眼睛碌碌咁望住我。
我第一次近距離接觸狗，心裡有少少怯意，但我見佢人蓄無害嘅表情，嗰股怯意就慢慢退卻。
我踎低，膽怯地伸出手摸佢個頭，佢無縮，繼續眼碌碌望我。
我一邊摸住佢個頭，一邊望住佢舒服嘅模樣。
佢毫無抗拒，係覺得被我摸好開心，好舒服嗎？
我亦不知不覺樂於其中，摸下佢個頭，梳下佢啲毛，幫佢𢯎下痕，望住佢滿足嘅模樣。摸下摸下，原來不經不覺已經天黑。
「我要快啲返去先得……」我望住狗狗，有啲依依不捨嘅感覺，快樂嘅時光特別快。狗狗企喺原地，伸住條脷望住我。
「有緣再見啦。」我留下一句，然後離開。
嗰日我因為太遲返，父親又打我一餐，但相比以前嘅我，而家嘅我已經唔畏懼，再痛亦只不過係身體上嘅痛楚，比起心靈上嘅痛楚，唔算得係啲咩。
嗰隻狗應該係對面村屋嘅流浪狗，咁啱先會跑咗過嚟呢度，睇怕無機會再見佢。
但係，我第二日放學經過公園時，再次遇見佢。
「汪汪！」我行行下忽然聽到背後有狗吠聲，擰轉身一望原來係尋日隻狗狗。
「點解你又會喺度嘅？」我踎低伸手撫摸佢個頭，佢好乖咁俾我慢慢摸。
之後第三日，第四日……我都會喺公園撞到狗狗，有時我會見到狗狗企喺條路上，有時狗狗會等我行到埋嚟時先出嚟吠我。我亦不知不覺樂於其中，同狗狗一齊玩，雖然玩得半個鐘左右，就要即刻趕返屋企。
我唔知狗狗有無名字，所以我幫狗狗起咗個名。
「以後我叫你小獅好嗎？」因為我睇咗書，知道狗狗嘅品種係獅子犬，所以就叫佢「小獅」。
「汪！汪！」狗狗雀躍地吠，佢似乎好鍾意呢個新名。
至此之後，每日放學去搵小獅變成例行公事。
有時我會幫佢梳下啲毛，有時我會同佢喺公園玩捉伊人，有時我會同佢坐埋一邊唞涼傾偈。
慢慢，小獅成為咗我嘅好朋友。
當我同佢玩嘅時侯，我可以暫時忘記一切嘅苦惱。
當我同佢傾偈時，我感覺到我可以敞開我嘅真心，與佢暢談。
當我將我屋企嘅事話畀佢聽先，佢會露出難過嘅模樣，彷彿明白我嘅心情。
我無法對人再次敞開心扉，但對住小獅嘅話……大概可以掛？
因為，只有佢會細心聆聽我嘅痛苦，給予我憐憫嘅反應，帶畀我溫暖嘅感覺……將我心中嘅空洞漸漸填空。
同小獅短暫嘅經歷中，我再次感受到幸福嘅感覺，嗰陣係我第一次覺得自己真正地被當作人咁對待。
呢個習慣一直維持到我升到上中學，自某件事之後我再無搵過狗狗。
我一直去享受幸福，嘗試將心裡嘅空洞填滿，但原來我一直自私地擁抱住幸福，無同我最愛之人分享過。
直到嗰一日，發生咗一件令我後悔不已嘅事情。
我升到上中學之後，我嘅放學時間比以前更遲，而且返屋企嘅路線亦唔經公園，但我依舊每日放學去搵狗狗。由於放學時間遲咗，我同狗狗玩得又耐，所以返屋企嘅時間亦變得愈嚟愈遲。
我一直尋求心靈上嘅慰藉，但我忽略咗喺我身邊最重要嘅人——我妹妹。
當妹妹拎住玩具想同我玩時，我拒絕咗，因為我無法再好似普通細佬咁無憂無慮地玩……但如此同時，我卻忽略咗妹妹嘅感受。
我甚至自私到每日放學自己去搵小獅，扔低妹妹一個喺屋企。
幸福嘅感覺令我沉淪，令我忽視咗事情嘅嚴重性……直到嗰一日嘅來臨。
嗰一日我返屋企，行到屋企門前時，聽到啲吵鬧同碰撞嘅聲音。我馬上心頭一緊，因為我聽到碰撞聲音係由我屋企到傳嚟，我更認出吵鬧聲係我父親嘅聲音。
我腦現唔好嘅預兆，於是即刻打開屋企大門。
當我打開大門後，我除咗見到成地都係嘅雜物之外，重見到企喺房內嘅父親嘅背影，同埋趴喺地上嘅妹妹！
「喂！你做乜嘢？」我即刻怒髮衝冠大叫。
我即刻扔低書包，衝過去父親背後將佢捉住，但無可奈何我嘅力氣唔夠父親大，被父親一嘢就推咗落地，再被父親一把摑落嚟。
我揜住發熱嘅臉頰，雙眼怒視住佢。
「都係你成日太遲返，唔知去咗邊，搞到我呢個父親好擔心，所以我咪嚟問下你個妹囉！」父親重喺度狡辯。
「你要搞搞我咪夠囉！做咩要搞我阿妹！」
「邊個叫你咁遲返，唔好好睇實你個妹啫！如果你喺度嘅話，你阿妹就唔會變成咁喇！」
「變成點……？」望住趴喺地上嘅妹妹，我慌張起嚟。
「唔知呢！你自己睇下啦！」
父親撞開我，行返出房，我馬上衝過去妹妹面前，將妹妹扶起。只見妹妹臉上沾滿淚水鼻涕，喊得雙眼通紅望住我。
「哥哥……」
「妹妹……」我用手幫妹妹抹走臉上嘅眼淚鼻涕，抹嘅時候手上沾咗啲紅色液體，我認真一望……係血！
我揭開妹妹嘅頭髮，發現一道長約兩厘米嘅傷痕喺妹妹額頭上，流住一絲絲嘅鮮血。
「點會……點會咁！」我雙眼發紅望住傷口，然後緊緊地攬住妹妹，「對唔住……對唔住！妹妹！」
結果我咩都守護唔到……
因為我嘅疏忽，無好好睇實妹妹，結果令妹妹遭受到如此傷害……
如果我無掛住去公園搵小獅玩，返嚟陪住妹妹，妹妹就唔會咁……
我明明承諾過會守護住妹妹嘅童年，但最後我咩都做唔到……
我攬住妹妹，任由眼淚同血沾喺我件衫上，我強忍住眼眶中嘅淚水，不停向妹妹道歉。
「唔緊要……哥哥……」妹妹用虛弱嘅聲線同我講。
我聽到呢句，眼淚忍唔住流落嚟……
「只要哥哥喺我身邊就夠……」妹妹伸出佢嘅小手攬住我。
「點可以咁㗎……」我被鼻涕眼淚搞到嘢都講唔清，「女仔臉上有疤痕……會無人要㗎……」
「唔緊要喇……有哥哥就夠喇……」
嗰一日，我做咗一件後悔一生嘅事……我無保護到我最愛嘅人。
至此之後，妹妹嘅額頭多咗一條疤痕，嗰條疤痕雖淺而唔顯眼，卻係不可磨滅……每當我見到呢條疤痕，我就會諗起呢條疤疤對妹妹造成嘅傷害……無論係身，抑或心。
「妳睇下咁樣好唔好睇？」
我用我辛苦儲起嚟嘅錢，幫妹妹買咗個蝴蝶髮夾，將妹妹嘅瀏海夾埋一邊，遮住額頭上嘅疤痕。
妹妹照一照鏡，郁一郁個頭。
「好睇呀！」妹妹雀躍地講。
「好睇就好。」
我摸一摸妹妹嘅頭，妹妹露出牙齒燦爛地笑，望住妹妹笑，我亦從心底裡發出笑容。
妹妹嘅幸福，就係我開心嘅來源。
我發誓……我再唔會畀妹妹受到傷害！
無論發生咩事都好，我都要俾妹妹得到幸福！