【自殺之後，我遇見死神小姐】救贖七個自殺者的故事: Case 7 被愛著的那個人—(41)

我緩緩打開雙眼，審視一下我身處嘅地方。

呢度……係我一開始醒過嚟時身處嘅大廈天台，周圍景色並無不同，除咗蔚藍嘅天空已經被換上一片金黃嘅夕陽。

呢度係我自殺嘅地方。

『你醒喇？』一把聲音從我上空傳過來，死神小姐翹住腳從空中慢慢降落我兩米之上。

「代價已經實現咗啦……？」我抬起頭。





『嗯，已經實現。』死神小姐微微點頭講。

我最後嘅記憶就係望住阿Yan化為光點消散嘅一刻，跟住我就昏倒地上。

如果代價已經實現嘅話，至嗰刻計起，而家已經係一日之後。

雖然付出咗代價，但終於令阿Yan得到救贖，而我亦走到呢一步，剩低最後一個自殺者。

「咁妳依家出現喺我面前，係同我講第七個自殺者嘅地點？」





『自殺輪迴已經結束，你再拯救唔到第七個人。』

「咩話……？」我驚呆地望住死神小姐。

『你記得我同你講過你要把握時間，同埋有無聽過「頭七」？』

唔通……雖然我有預感時間的確無多，再唔快啲就會有無可挽救嘅事發生，但我無諗過個意思會係咁……

「妳最初話自殺輪迴唔係永遠嘅咩，點解會有時間限制？」





『我只係想睇你會唔會認真去救贖其他人，況且……等唔切嘅人並唔係你。』

「妳講嘅嘢係咩意思……？」

『如果你諗下「頭七」係咩意思嘅話，或者你會明我講緊啲咩。』

頭七……係指死者會喺死後嘅第七日返去自己嘅屋企，之後閻王就會根據死者生前功德做裁決，給予報應並投其生於六道中。

第一日，我遇見Cathy。

第二日，我上晝遇見阿立，下晝遇見小妹妹同達叔。

第三日，我再次遇見小妹妹，並且搵返達叔筆錢。

第四日，我上晝幫達叔完成心願，下晝遇見小狗狗。





第五日，喺不自覺情況下完成小狗狗心願，晚上遇見Stephanie。

第六日，我上晝幫Stephanie完成心願，下畫遇見阿Yan，之後就昏迷到而家。

今日係第七日嘅黃昏。

「今日係第七日黃昏，第七日重未過呀？」我講。

『頭七係指死者喺死後嘅第七日回家探望親人，但實際上係第六日既晚上至第七日嘅清晨，換言之頭七已經結束。』

「你……！點解唔同我講清楚？」我不忿地問。

『啊？我只係負責監視住你，救贖任務係你為咗拯救自己而做，我無義務去幫你。』死神小姐不屑地講，『不過，承諾就係承諾，我會將記憶還返畀你。』





死神小姐指住我嘅頭，下一秒我個頭突然變得頭痛欲裂！我痛得跪喺地上抱住頭，一段又一段影像喺我腦海中浮現起來，喺屬於我嘅記憶，有關我嘅一切……

我大大啖氣呼吸，整理喺腦海七零八舍嘅記憶碎片……我嘅記憶十分混亂，但我……慢慢記起所有事情……！

我記起一切，記起嗰段不可磨滅嘅過去，記起嗰段艱難困苦嘅生活，記起我那罪大惡極嘅雙手，還有……記起曾經想守護嘅笑容……

『你知唔知點解你要救贖呢七個人？』

「點解？」我企返起身。

『因為你犯下嘅過錯，令到有七個人選擇自殺。』

「我令到七個人自殺……？」我嘗試將我嘅記憶整合，再回想起前六個自殺者嘅經歷……

『好可惜，就算你記返去所有事情都無用，雖然你拯救咗當中六個，但最後一個，你卻無辦法再拯救。』





第七個自殺者……唔通係……

「最後一個自殺者係小妹妹？」我激動地問。

『就算你依家知道第七個自殺者係邊個都無用，因為你已經無法拯救佢。你為咗逃避所犯下嘅過錯，蔑視自己嘅生命，以死去逃避一切。連生命都唔識珍惜嘅人，呢個就係為你投下嘅最終懲罰。』

「咁……無法被救贖嘅人會點？」

『得到救贖嘅人可以脫離自殺輪迴，而無法得到救贖嘅人依然會喺自殺輪迴之中受苦，直到永遠。』

「點會咁……！」我無法將小妹妹從自殺輪迴中拯救出嚟。

『你記得我同你講過，喺你救贖其他自殺者時，好好反思一下人生嘅道理？依家你就好好反省一下你嘅所作所為，順便反省一下自己嘅自殺。』





「但……點解妹妹會自殺㗎……點解！」

『睇嚟你重未完全記返起所有嘅事情……你就好好喺度回想返過往嘅事，然後企喺原地盡情後悔……後悔自己最心愛嘅妹妹自殺，後悔自己拯救唔到自己最心愛嘅妹妹。』


嗰日，究竟發生咗咩事……


妹妹點解會因我而自殺……


重有……我同妹妹過往嘅經歷……


嗰段再不能面對嘅悲慘嘅經歷……


以及，我犯下嘅罪……