［回憶］［校園］一個信息改變左我嘅中學生活: 大結局（三十七）離別
係一片朦朧低下，我只係見到一個著裙嘅女仔行左去旁邊。我睇唔清楚係邊個，但我可以好清晰咁聽到一句，對唔住。
雖然我睇唔到依個係邊個，不過我可以好肯定依一個係阿心，因為只有佢先可以有一把咁獨特嘅聲音。我擺左兩下頭，希望可以變得清醒D可以令我睇野變返清楚，然後再用盡所以嘅眼力去睇清楚依家所發生嘅一切。
阿心：阿銘，你send比我個一段錄音，我聽哂啦，我今次黎就係為左解答你嘅問題。
我覺得好驚訝，點解佢會咁淡定嘅？
相反，我就咁驚訝，唔通我地真係緣盡？
我先拋開情緒嘅問題，我只係合埋眼，問阿心一句：點解我地要分開啊？阿心。我由一開始嘅正常音量變到愈講愈細聲。
我見阿心無即刻答我依個問題，反而先係用手擋住自己塊面，係佢擋緊嘅時候，我已經睇到一滴又一滴嘅眼淚，係阿心嘅眼眶入面湧出黎，同時我都好細聲咁聽到阿心講話：因為我阿爸啊。
原來阿心佢並唔係好淡定咁睇依件事，而係一直壓抑住自己嘅情緒，等我唔洗見到你喊。點解啊？點解到左依D時刻你都仲咁關心我啊？如果我無左你嘅生活要點過啊？
我諗下諗下都流出左眼淚，同時我都追問落去，點解會同你阿爸有關嘅？
阿心：你仲記唔記得你撞車個一日啊？我地係醫院講野個一日啊。我同你講野嘅成個過程都比佢睇到哂啊。
阿心：因為我話要出黎探你嘅時候，我果時原本係要補習架。但係我就無去到補習，Miss就打電話比我阿爸。於是佢就用我手機嘅追蹤軟件黎揾我去左邊，所以先會比佢發現到。
我：吓？點解會咁架？我的表情即刻由傷心變到錯愕。
阿心：仲wts有個件事啊，我個時咪講話返到屋企wts你嘅，但係正當我擺低哂所有野，想攞部電話wts你嘅時候，我部電話已經比我阿爸攞走左，仲睇哂入面嘅對話。我已經好落力咁叫佢比返部電話我架啦，但係都。。。
一晏間太多野比我知道，我唔單止黎唔切反應，亦都接受唔到，但係唯一令我安慰嘅係阿心佢唔係有心同我分手。
我嘗試同自己講：依家所聽到嘅野全部都係假架。希望可以變到冷靜D。但我完全無辨法接受得到依家所發生嘅事。
我接受唔到今次嘅分手係自己一手一腳造成，我唔甘心睇住自己無力挽回依一切。
我只係好無奈咁問阿心：咁之後你阿爸點講啊？
阿心：佢話我地唔可以拍拖，即使做朋友都唔得，仲有佢已經向學校申請，我地係f6之前都唔可以再同班。
我：點會咁架？點解要做到咁絕情啊，究竟我地兩個到低有咩問題啊？同埋點解到f6先可以再同班？
阿心：因為依件事之後，佢就打左比班主任，想了解你係邊一個，就係佢知道左你之前係一個成績差，成日都唔交功課嘅學生之後，就禁止我地做朋友，話驚我成日同你一切會變到好似你咁。
我：原來依一切都係我親手造成嘅。唉，最衰都係自己啦，我都係襯你唔起架啦。依一句說話居然無端端沖口而出。我個人突然變到好灰,好哂心機去面對眼前嘅野，只係可以無奈嘅接受。
阿心：點解你要咁講啊？我做錯左D咩啊？你點可以咁樣話放棄就放棄架，你有無理過我嘅感受啊？你仲記唔記得到初你應承左我D咩啊？
我：阿心，做嘅唔係你啊，而係我。所有嘅野都係我造成，依家我只不過乘擔番依一個責任。之於我對你嘅承諾，我一直都無忘記，我只不過。。。
我無奈咁一下打左落張抬度，發出嘅聲音唔單止無將我冷靜，返而令承諾嘅回憶變得更加真實。
（林嘉銘同學，你做咩又唔交功課啊？）伴隨著大叫嘅係一下拍抬嘅聲音。
原來頭先嘅拍抬聲係將我拉返去幾個月之前嘅回憶。依一段嘅回憶令我對住面前嘅阿心嘅時候變到更加難堪。
阿心：阿銘，做咩又唔交功課啊？你又話應承我下年再讀精英班？
我諗返起依一個嘅承諾，我記返起我地個時嘅日子，雖然過得好頹廢，但係都帶住一份嘅
沖勁。
阿心見我無端端唔理佢，於事就搖左我幾下，將我拉返黎現實。
阿心：做咩唔出聲啊？
我將頭先我回憶起嘅野都同哂阿心講，佢聽完之後唔單止無覺得傷心，反而可以令到佢嘅心情變得期待同開心。
唔通依一個就係回憶嘅魅力？
咁你仲記唔記得有D咩承諾啊？阿心佢拖住我隻手講。
我聽完之後停左一停，我見到好多好多嘅畫面都歷歷在目。一大段嘅走馬燈突然係我腦海飛過。而因為阿心拖住我隻手嘅關係，我嘅回憶都同時返左去嗰一個嘅時間點。
（依一對嘅戒指，係我地永遠一齊嘅見證人）
（第時我戴係你手上嘅唔再係依家嘅假戒指，而係一隻真正嘅鑽石戒指。）
我兩句野不停咁係我耳邊重播，令我好似穿越左時間反返去個一日咁樣。
我心入面諗：如果依個承諾真係可以實現，咁到低會係幾好呢，只可惜我眼前咁係殘酷嘅現實。
我：阿心，你仲記唔記得戒指嘅諾言啊？
阿心佢望一望手上嘅戒指，然後就細細聲咁講左一句：永遠都一齊？
我：係啊，我地當初勾手指尾互相承諾過依一樣野架。我地要好似依一對戒指咁，永遠都一齊啊。
阿心：依個的確係我地嘅約定，只可惜再唔會有機會維持住依一個約定啦。
阿心講完左依一句之後，我嘅電話突然響起。
我聽到手機嘅鈴聲之後，忽然覺得傷悲。
（那天我共你勾手指尾，答應過會更愛你。）
依一段嘅音樂，係我耳邊傳黎，我首先留意到嘅並唔係打黎嘅電話號碼，而係依家嘅時間。我望一望電話嘅時間，比我發現仲有五分鐘就完結探病時間，我立即拋開手上嘅電話，去同阿心共度依珍貴嘅五分鐘。
我馬上將部電話cut線，然後打開音樂播放器，重覆播放我地嘅紀念之歌—勾手指尾。
我：阿心，你覺唔覺得我地好似返左去個一日咁啊。去返我地承諾嘅日子，好好咁懷念返個個一日。
阿心：嗯，真係好似個一日咁啊，個情境好似我地一齊戴上戒指個一刻咁夢幻。
阿心講起紀念嘅戒指，我先醒起我之前整好嘅最後禮物。
我：係啦，阿心你合埋眼啊，我有D野想送比你啊。
我即刻係櫃度攞出我銀包入面嘅一張一百蚊，再將佢摺成一個心心，然後擺係阿心手上。
阿心：係一個用一百蚊摺成嘅心心？
我：依一百蚊，係我特登蓄黎諗住同你再去多一次街架，但我見依家都用唔著，所以先將佢送比你，而且係一百蚊係有一份特別嘅意義係入面。
阿心：特別嘅意義？
我：你記唔記得你送戒指比我嘅意義係咩啊？
阿心：唔通你依張一百蚊係我地永遠一齊？
我笑住咁講：唔係，我依張一百蚊嘅意義係希望阿心你係依100年內都唔好忘記呢一段咁好嘅時光。
我聽到音樂都唱到尾段，亦即係意味住，剩低最後嘅一分鐘。
我：阿心，你可唔可以坐埋小小同埋托一托背脊幫我起身啊？
我睇住阿心好落力咁幫我托起我背脊，我覺得好心酸，因為我要眼白白咁睇住一個對我咁好嘅女仔唔再出現係我身邊。
我見阿心已經托起左我，我就即刻攬住佢講：阿心，我有一句野一路以黎，我都無同你講過啊。
阿心：咩黎架？
我細細聲咁係阿心耳邊講：我愛你啊，阿心。
我講完之後，我係無得到阿心嘅准許下，我將我嘅初吻比左阿心。
但係佢唔單止無反抗，而係好接受咁同我講左一句：阿銘，多謝你啊。
我地相擁左10秒之後，我已經見到有護士行緊過黎。阿心，夠鐘要走啦。我喊住咁講。
阿心：再見啦，阿銘。總有一日，我地可以再次一齊架。
我睇住阿心嘅身影變到愈黎愈細，我面上忽然流出左一個滿足嘅笑容。然後心入面諗：阿心，我可以由一個廢青，變到一個有目標，願意奮鬥嘅學生，一切都因為你，如果唔係個一嘅一個信息，可能我依家仲係一個打緊機嘅廢青，而唔係係度同你講依一番嘅說話。
我望著係門口依依不捨嘅阿心再用一個既感激又感動嘅語氣大叫：多謝你啊，阿心！
阿心，雖然我地依幾年都要分開，但我知道你一直都無離開我，我打波嘅時候，我考試嘅時候，你嘅身影都會陪伴係我身邊。
（唔好意思，我要咁遲先可以出到個結局，但係都好多謝咁多位讀者一路嘅支持，希望你地唔好介意小弟寫得唔太好啦，同埋希望你地可以留言番你地睇完嘅感覺，等我可以改善下啦。多謝。）