天使原來是男生（舊名：魯莽天使）[小甜][變身][男變女][籃球]: 52
~「死啦...搵極到冇嘅....」我依家喪摷緊我個手袋囉...
明明頭先買生蝦果陣仲喺度架...點解會冇左架。
「...唔好意思呀...我唔買住啦。」於是我就放返低件衫，
九秒九仆返出間舖頭進行(地毯式搜索)啦。
沿途我好似ptu咁，細細步咁一路行一路望住個地下，
連蟻都逃唔過我法眼呀...，皇天不負苦心人呀...，
喺我行到返超市附近果陣，我離遠就見到有個男仔執起左我個銀包，
而家拎緊入面啲野出離睇緊。
「...喂....個銀包係我架。」我一邊大叫，
一邊急步行緊埋去個男仔度。
原本側側地身嘅男仔，聽到我大叫而家擰左個頭過離....。
「...吓....俊哥。」我講，原來係泳琳阿哥俊哥離架。
「…你架...小欣，唔好意思呀，啱啱諗住望下入面有啲咩之後就諗住交比警察架啦，
咁而家比返你啦。」俊哥份人咁正直我點會唔信你喎。
「...哦...唔...唔緊要，嘻嘻...唔該俊哥。」我好開心咁答俊哥。
搵返個銀包喎，緊係開心啦...，
如果搵唔返一陣又話要整過啲身分證你話幾煩呢。
之後我就同俊哥一齊行返屋企。
「…嚓。」俊哥開門，而我就跟住喺後面。
「....咦...小欣，點解你會同阿哥一齊返嘅?」
泳琳見到我同俊哥一齊返，有啲疑惑咁問。
「…吓...冇呀，喺商場撞到咋嘛。」我答泳琳。
喺依個時候，房入面有個人行左出離喎。
「…er....姐姐你好。」係芝姐呀...俊哥女朋友，雖然平時好小會上泳琳屋企，
但係我都見過佢唔小次，當然依家嘅我要扮唔識佢啦。
「...。」芝姐冇應到我，只係黑口黑面咁對住我，
眼神仲好似好仇視我咁。
等埋泳琳阿爸返離之後，我地就開飯啦，
...wu...泳琳媽咪煎嘅蠔餅真係好好食呀....外脆內嫩咁，好juicy架。
雖然係好好味，但係全餐飯我都比芝姐嘅氣牆所壓迫住，
每次我望過去佢同俊哥果邊，芝姐都會用凌厲嘅眼神震懾住我，
好彩未食完，佢同俊哥兩個就提早離場，
話要落街買野喎，總算鬆一口氣啦。
我繼續享受我嘅蠔餅。
「…吖...小欣，你都好鍾意食蠔餅吓喎。」
泳琳阿爸望住我食蠔餅望到眼都定埋。
「…嘻嘻...，係呀 uncle。」我笑笑口講。
「…吖...下次我地入南丫島食飯，
小欣你都跟埋離啦，好多蠔食架。」泳琳阿爸講。
「...嘻嘻...好呀uncle。」嘻嘻，因為泳琳係南丫島人，
所以呢...經常都可以入南丫島食海鮮，其實以前我都去過唔小次架啦，
果間天藍海鮮酒家啲野真係好好食架...次次去到我地都有VIP房坐，諗起都流口水呀。
享受完美味蠔餅之後，我就幫手執野，
之後仲幫手出左去倒垃圾添。
「...你講呀...點解會同佢一齊返離架?」經過後樓梯果陣，
隱約聽到有人講野，於是我就偷偷地伸左個頭入去裝吓啦。
「...咁...咁啱撞倒咋嘛。」原來係俊哥同芝姐，唔知佢地傾緊啲咩呢?
「...有冇咁啱呀，琴晚又上離今晚又上離，都唔知咩人離架，
女仔之家去人地屋企訓。」芝姐好嬲咁講。
咪住先...去人屋企訓...?...唔通講緊我?
「...佢琴晚訓邊呀?」芝姐繼續問。
「…吓...咪...咪同小小訓囉。」俊哥驚到口都窒埋。
「...咩話...你地兩個訓埋一間房?」芝姐大叫，
比芝姐嚇一嚇，我即刻縮返個頭出去。
「…小欣同小小訓咋嘛。」俊哥講。
「…哦...叫人做小欣添，你同人好熟牙。」芝姐繼續講。
「...芝呀，唔好咁啦，佢同我阿妹係les離架....。」俊哥講。
「…les喎，點知佢幾時會變返直架，我唔理呀，
唔可以再同佢一間房訓呀。」芝姐講。
「…咁...阿妹帶佢上離訓，我點阻止姐。」俊哥好無奈咁講。
「...佢上離訓你咪出街訓囉，去啲friend度訓囉，唔洗我教啦。」芝姐講。
聽到依度我就行走左，之後急急腳行返入泳琳屋企。
「…咦...小欣，咁耐嘅?」泳琳問我。
「...er...頭先個垃圾袋穿左囉，嘻嘻...我去洗手先。」我講完就行左入廁所。
去完廁所出離，見到俊哥同芝姐已經返左離，
而家坐左喺梳化度。
俊哥一眼都唔敢望我，而芝姐呢，
就睥左我一眼之後繼續睇電視，我突然有種做左罪人嘅感覺添...，
所以我諗我都係唔好再留喺度啦，費是俊哥又受罪啦。
「…er...泳琳牙...都夜啦，差唔多要返去啦我。」我同泳琳講。
「...吓...咁快，不如喺度訓多晚啦。」泳琳有啲緊張咁講。
我䏜到芝姐眼尾望一望我，而俊哥就繼續對住部電視頭都唔敢郁。
「…er...唔好啦，我都要返去洗衫...嘻嘻...下次先啦。」我繼續推搪。
「…咁牙...好啦。」泳琳好失望咁。
「...咁好啦，㗑㗑各位。」講完之後我就開門走左啦，
話就話夜姐，其實都只不過係九點幾，
我走左之後冇返到屋企，而係去左搵一軍。
~叮噹...~我撳緊一軍門鐘。
「…咦...小欣...點解你會上離嘅?」一軍開門見到我好驚訝咁講。
「…嘻嘻...比個意外驚喜係吖嘛，你唔會收埋左個女仔喺度掛?」我笑笑口咁講。
「…緊...緊係唔會啦，入離先講啦...小欣。」一軍好緊張咁打開左度門比我入去。
「…嘻嘻...講笑姐，唔洗咁緊張喎。」入到屋之後我同一軍講。
「...我驚小欣你會誤會我吖嘛。」一軍好無奈咁講，
我而家同一軍一齊坐左喺流化度，我翹住左一軍隻手，
原來一軍頭先係準備洗衫架。
「...kimmy呢?」我問。
「...喺浴室沖緊涼囉，你洗唔洗入去搵佢呀?」一軍講。
「...吓...唔...唔洗啦，我離係搵你唔係搵kimmy囉。」一軍你估我真係les架咩....。
我同一軍sweet左一陣，到十一點左右，我就自己返屋企啦。
一軍本來話要送我架，但係我見佢好似好多家務未做咁又未洗衫，
所以我叫佢唔好送我。
就係咁，我就自己一個人返屋企啦，講真咁大個人其實邊洗人送架，
雖然我依家係女仔姐，但係一軍都應該知道我打得，可以保護到自己架。
搭左十分鐘巴士就返到屋企樓下啦，幾簡單。
「…咦....小欣...。」入到大堂竟然又撞到俊哥喎，
點解咁橋架...比芝姐見到俊哥命都冇囉。
「…hi...俊哥...er...㗑㗑。」我係咁意打左個招呼，
之後就行左去自己部𨋢果邊啦，啱啱有𨋢我順勢行埋入去。
「...等等呀...小欣。」俊哥唔知咩事，追左入𨋢叫我囉。
而家得我地兩個人喺部𨋢入面，
我同俊哥你眼望我眼咁。
「…er...俊哥...冇事吖嘛?」我口窒窒咁講。
~叮...~說時遲那時快，部𨋢已經到左我住果層。
「…er...我有啲野想同你講架，不如去後樓梯吖?」
吓....俊哥...無啦啦點會有野同我講架...，仲要去後樓梯添...想死咩...俊哥你。
「...er。」我dead air左一陣。
「…好快架咋。」俊哥好認真咁。
「…咁...咁好啦。」於是我就跟左俊哥入後樓梯啦。