天使原來是男生（舊名：魯莽天使）[小甜][變身][男變女][籃球]: 47
~放完天燈之後，我地繼續行街，我地去左十分瀑布，
睇左一陣之後我地就回程行返去十分車站。
返到十分車站已經下午四點半啦，時候都唔早，
我地同卜sir匯合完之後，等齊所有人，我地就回程返西門町啦。
返到去已經差唔多六點鐘，原來今晚嘅晚餐係食麻辣火煱呀，
好野呀...離到台灣點可以唔食返餐架，嘻嘻...我最鍾意就係食麻辣火煱架啦，
加上而家天氣都凍凍地...打邊爐就最啱架啦。
卜sir帶住我地去到西門町一間任飲任食嘅火鍋連鎖店...好似叫咩馬辣喎。
一上到去，可能六點鐘都仲係好早啦，而家舖頭入面都唔算多人，
我地分左四張枱坐，一坐低我同表妹，kimmy已經急不及待衝左出去睇吓有咩食啦。
依度呢，野食原來係要入紙攞嘅，
但係甜品飲品就自己拎。
嘩...芝士蛋糕呀.....連h牌雪糕都係任食?我係咪發緊夢呀....
仲要有成十幾隻味添...我唔每樣食吓都對唔住自己啦...。
我同表妹已經即時畢左杯邊行邊食，
之後我地拎埋醬油就行返去啦。
返到去一軍同阿成已經叫到成枱都係野，
湯底呢...就叫左一半麻辣一半膠原蛋白。
「...小欣....麻辣你...ok架呵?」一軍而家好驚比我鬧咁嘅樣問我。
「...嗯....我最鍾意食麻辣架啦。」我點一點頭。
「…咁...咁就好啦...，我幾驚小欣你唔食辣，
所以叫多個膠原湯底。」一軍鬆一口氣咁。
「...嘻嘻...我同阿哥就最鍾意食辣架啦，阿成都ok嘅...
我諗係得豬蔚一個唔食得辣架姐....。」kimmy而家斜睥住表妹。
「...喂....唔食辣犯法架咩...衰人。」表妹而家比我地孤立左添...。
「……唔好嬲啦表妹...，仲有膠原蛋白...，食
左皮膚好架...。」我摸住表妹個頭講。
「...都係表姐對我最好...哼...我唔同啲衰人講野囉。」表妹瞇起對眼睥住kimmy講。
之後我地就開始瘋狂食野啦。經過一輪戰鬥之後。
「...wu...飽到上心口呀，實肥死啦今次。」kimmy攬住個肚講。
「…嘻嘻...唔緊要啦，一陣要練波吖嘛。」我講。
我要再強調一次，其實kimmy一啲都唔肥。
大家亦都冇聽錯，雖然今晚係平安夜，但係依個此終都係籃球交流團，
所以食完飯之後就要返南山高中進行最後嘅訓練啦。
我地食完之後，喺西門町行左一陣，就有南山高中嘅校車過左離接我地，
其實都真係幾近吓，上左車十分鐘左右嘅車程就到左，
我地行到入籃球場都未夠八點鐘，照舊係見到南山嘅球員已經喺度射緊波。
好快我地都換好哂衫熱完身，頭一個鐘訓練完之後，
就到最後嘅友誼賽啦。
...今次嘅友誼賽呢....結果....，到係我地輸嘅，比分係35比42，
講真練左幾日算係咁啦，唔通練完即刻贏咩
，不過其實我地嘅技術絕對唔差過佢地囉，不過體能就差幾皮啦，
打籃球嘅野，正所謂體能第一技術第二，冇體能你幾好波都冇用，
所以呢...卜sir決定返到去會同我地進行一個(地獄式死亡特訓)喎，
聽到個名都知唔死都一身散啦。
訓練完都已前差唔多十一點啦，校車送左我地返酒店，
之後就係自由時間啦。
因為今晚係平安晚，所以好多人都唔訓住走左出街行吓，
而我同一軍呢，就選擇留喺酒店度過依個平安夜，
我地買左個細細個嘅芝士蛋糕兩個人掙靜地咁喺酒店房倒數。
去到十一點五十九分，我地點起蠟燭，開始倒數....，
倒數期間我地望住對方，彷彿可以一世都停留喺依一刻咁。
「…聖誕快樂...小欣。」一軍講。
「...聖誕快樂...。」我亦都細細聲回應。
一軍用刀仔，切開左個蛋糕，再分比我食。
我地兩個就喺咁寧靜嘅酒店房，
享受只有我地兩個嘅平安夜啦。
「…小欣....。」食緊蛋糕果陣，
一軍忽然喺褲袋度拎左個盒出離喎。
「...吓....咩離架?」我有啲疑惑咁問。
「...聖誕禮物囉....，聖誕節吖嘛...點可以冇禮物比小欣你架。」一軍講。
「...多謝...。」我一邊講一邊伸手接左個盒仔。
「…今次唔係usb架啦。」一軍再講。於是我打開左個盒睇。
「…吓....戒....戒指。」我成個人呆左，一軍竟然送左隻戒子比我。
「…雖然唔係鑽石.....，但係我會努力架，第時出離做野，
我就會即刻買隻鑽石戒指比小欣你架，依家就收住依隻先啦。」一軍面紅紅咁講。
「...一...一軍....嗚嗚。」點解我會咁眼淺架...，
而家小小野就喊，我又忍唔住喊左出離攬住一軍。
「...小...小欣...，喊得多唔靚架啦。」一軍摸住我個頭講。
「...嗯....。」今次我好快就收左聲。
之後我地就沖涼訓覺啦。
不過唔好誤會喎，我地係分開各自各沖...，琴日我可能真係衝動左啦，
依家諗返轉頭，如果一軍真心愛我嘅，遲啲先做又有咩所謂喎，
更何況琴晚一軍根本就冇用套...，如果做完之後我有左咁點算喎，
好彩kimmy撳鐘姐，如果唔係到時老豆返離就唔係個仔搞大左人地個肚，
而係個女比人搞大左個肚囉。
我地各自沖完涼之後，同琴晚一樣，我同一軍係兩個人攬住訓埋同一張床嘅...，
我冇再胡思亂想，一軍亦都冇對我手多多，
就係咁台灣之旅嘅最後一晚就喺平安之中度過。
可能練完波太攰啦，第二朝我訓到kimmy撳鐘先起身，訓醒果一刻，
一軍依然好sweet咁攬住我，真係唔想同佢分開呀....。
「…我好唔捨得呀.....要返香港啦。」我繼續訓喺床攬住一軍講。
「...傻豬，返到去我地繼續可以見架嘛，開門比kimmy先啦。」
一軍摸一摸我個頭講。
之後我就行左去開門比kimmy啦。
「...嘻嘻...又係我呀...。」一開門kimmy就好唔好意思咁同我講。
「入離啦。」我未訓醒咁嘅樣叫kimmy入離。
「...有冇搞搞震呀?」kimmy未行到入離，
一軍已經坐左喺櫈度望住kimmy講。
「...緊...緊係冇啦，我應承過阿哥你架嗎.。......」kimmy口窒窒咁講。
「...嗯...。」一軍嗯左一聲。
「…嘻嘻....咁阿哥你呢?」kimmy無啦啦要挑阿哥機喎。
「...喀喀....多...多事啦...，小欣我走先啦。」
一軍咳左一下，之後就走左啦。
「...嘻嘻...阿哥個樣好似有啲野喎，係咪呢...阿嫂。」
一軍走左之後，kimmy開始向我進攻啦。
「……咪...咪話左冇野囉。」我有啲唔耐煩咁答kimmy。
「...嘻嘻...另一張床啲被鋪完全冇郁過嘅.....仲話冇同阿哥一齊訓。」kimmy笑淫淫咁講。
「...吓....er....係..係有一齊訓....」我口窒窒咁答佢，原來kimmy所講嘅有野就係一齊訓呀?
「...wu....咁激...阿哥有冇好緊張呀?」kimmy越問越興奮。
「…kimmy牙...咁私人嘅野，不如唔好問啦....嘻嘻。」我笑笑口咁講。
「...係嘅....我八掛左啲添...，因為我同阿成訓果陣呀，
阿成好鬼死緊張咁嘅樣，成晚都訓唔著呀....諗起都搞笑。」
kimmy...你都算係個靚女吖...，同阿成訓埋一張床佢緊係成晚心思思訓唔著啦....，
佢冇搞你真係算忍得架啦。
講完一堆廢話之後，我地就落左餐廳食早餐，好似冇介紹過依度啲早餐添，
其實真係冇咩野食架咋...，得啲公仔點心，同魯肉飯...白粥呀麵包之類，
所以其實我都真係冇咩點食過咁,不過唔洗錢咪...食吓囉。
食完之後我地全部人去哂一間好似會議室嘅野度開會。
卜sir同我地做個總結呀，問吓大家嘅感想，
同溫習吓學到嘅新戰術...等等。
開完會之後，我地就要返上房開始執拾行李啦，
真係有啲唔捨得添...第時要再同一軍離過先得。
我同kimmy執好哂野hea左一陣之後，
就要落大堂check out啦。
依啲野緊係卜sir同miss cheung做架啦，
我地掙係坐哂喺大堂等就得啦。
check out完，我地將啲大件行李寄託喺酒店，
之後卜sir就帶哂我地出去食最後嘅午餐....。
食完午餐之後下午嘅時間呢...，就係買手信時間啦，
個個都好匆忙咁喺西門町跑離跑去，kimmy又話要買了結糖，
表妹又話要買鐵蛋喎，而我呢...，就想買啲鴨舌返去比堂姐堂哥做手信呀...，
我拖左一軍去到老天綠，其實都唔知邊間係真邊間係假架啦，
總之見人排我咪又排囉，好快我就買到鴨舌，之後就匯合返佢地一齊行返酒店啦。
好野呀，今日又有旅遊巴坐唔洗同人逼啦，
我地喺酒店拎返哂我地啲行李，就上旅遊巴出發返香港啦。
去到機場已經下午四點啦，因為中途塞車，所以依家都幾急吓，
卜sir直頭面都青埋，好驚會趕唔切上機，所以一落車我地就全team人跑入去機場，
其他人望到仲以為我地拍緊戲添....嘻嘻。
雖然驚險...但係最後我地都順利上到機，我地跑到埋登機口見到人影都冇隻，
果陣卜sir直頭想喊出離咁...嘻嘻...諗起都好笑。
點都好啦，台灣...你帶比我幸福，如果唔係台灣...
我唔會下定決心同一軍一齊，係時候要同台灣講聲㗑㗑啦。