天使原來是男生（舊名：魯莽天使）[小甜][變身][男變女][籃球]: 46
~沖完涼吹完頭之後，出返去都已經十二點幾啦。
「...咦....仲未訓嘅?...」一軍仲坐左喺度撳緊電話。
「...er....等埋小欣你吖嘛...。」一軍依然微笑咁對住我。
「...。」
「...點呀，小欣你想我訓邊張床呀?」一軍好溫柔咁問。
「...er....不如一齊訓吖。」我細細聲好尷尬咁講。
「…ok...小欣你話事啦。」一軍繼續溫柔。
就係咁，我同一軍就兩個人逼埋一張單人床訓啦。
其實酒店啲單人床都唔細張嘅....我攬住一軍訓，其實都仲有空位嘅...，
我feel到一軍其實訓唔著架....始終頭先同我喺浴室做左啲咁激嘅野，
但係又冇得發洩...果種辛苦其實我係明架....。
而家仲要同一個美女攬住一齊訓...一軍訓唔著都真係好正常....，
我隻腳夾住一軍果陣都feel都佢下面，其實仲係升緊旗.....，
...對唔住呀.....一軍.....搞到你咁辛苦.....。
結果.....我地係冇發生過任何事嘅...，我好快就已經訓著左，
而一軍呢....，er....我訓著左唔知佢到底要幾耐先平復到生理反應喎.....，
訓醒嘅時候已經係朝早七點...，一軍依然係訓左喺我隔離....，
而我就繼續訓喺佢側邊望住佢。
「...小欣...醒左啦。」一軍開一開眼講。
原來一軍都已經訓醒左架啦。
「…嗯...。」我嗯左一聲。
「…做咩唔訓多陣呀...?」一軍細細聲講。
「...想望多你幾眼囉。」而我就繼續伏左喺一軍心口細細聲講。
「…傻妹...。」一軍微笑住咁答我。
就係咁，我繼續伏左喺一軍心口幾個字，之後又突然門鐘響起喎。
~叮噹~.......今次唔會真係miss cheung查房掛....。
因為係我間房，所以我叫一軍行一行入廁所先，而我就起身開門。
~嚓.....~原來又係kimmy。
「...嘻嘻...早晨呀...阿嫂，差唔多夠鐘啦，我要返離換衫整理吓啦，
唔好意思，有冇阻住你同阿哥呀?」kimmy企左喺門口，唔敢入離。
「…入離先啦...。」我講。之後kimmy就行左入離啦。
「...咦....阿哥呢....?...」kimmy好疑惑咁周圍望緊。
「…er....去左廁所。」我答kimmy。
「...出離啦...係kimmy呀.。」我行左去拍廁所門講。
之後一軍就斯斯然咁行返出離。
「…er...咁小欣我返房先啦，轉頭見啦。」一軍拎齊野之後就開門走左啦。
「...嘻嘻...阿哥琴晚係咪喺度訓呀?」一軍走左之後kimmy又開始笑淫淫咁對住我講。
「…吓.....唔好問啦。」我好尷尬咁答。
「…哦....明哂....嘻嘻...，有冇曳曳呀?」頂....kimmy仲要繼續問喎，
今次仲要問中死穴添.....。
「...冇....冇呀....。」我面都紅埋，dup低頭講。
「...嘻嘻...真係冇....?」kimmy而家dup低頭低炒我塊面講。
「...喂....唔好講我啦...咁你同阿成呢?」我即刻耍太極將話題耍去阿成度。
「...我同阿成咩喎。」kimmy即刻好緊張。
「...有冇發生左啲咩唔講得比我聽先?」而家到我瞇返起對眼望住佢啦。
「….er....我講比阿嫂你知都得，但係你千奇唔可以話比阿哥知架。」
kimmy突然好認真咁，死啦.....kimmy唔會同阿成真係發生左啲咩吖嘛。
「...er....不如都係唔好話比我知啦，當我冇聽過啦。」我叫停左kimmy。
「…吓....唔好啦，咁私人嘅野淨係得阿嫂你可以同我分擔吓架咋...聽啦...。」
而家反而係kimmy逼返我聽囉。
「...好啦...好啦，你講啦。」我好hea咁答。
「...er...唔准話比阿哥知架。」kimmy再一次講...好長氣呀!!!!
「得啦...得啦。」我繼續hea答。
「...er....琴晚呢...，我同阿成佢...。」kimmy塊面好紅啦，講到一半停左落離。
「…佢咩呢?」我問。
「...嘻嘻...一齊訓同一張床呀。」kimmy少女含春咁...一路講一路笑左出離。
「...哦....。」....且.....仲以為有啲咩事添....，係一齊訓咋....原來kimmy都幾保守架喎，
男女朋友一齊訓同一張床唔係好合理咩?...定係我太開放呀?
我同kimmy梳洗完，換好衫，就落左樓下酒店餐廳同大家一齊食早餐buffet啦。
今日呢...會去十分呀，好開心呀....第一次去咋...上網睇果度啲風景好靚架....
又可以同一軍去放天燈喎...嘻嘻。
我地食完早餐之後，就出發啦。
卜sir同miss cheung照舊帶住我地，原來好鬼死麻煩架，
要係咁轉車，我地首先坐捷運去到台北車站轉台鐵去到果個唔知咩端芳站，
之後又要再轉咩小火車喎。
雖然係麻煩....，不過呢...其實風景又真係幾靚嘅...，沿途經過好多山嶺，
...搭左幾個站...終於都去到十分站啦。
嘩.....好q多人呀，一落車已經人頭湧湧啦，我地所有人落車之後，
卜sir就即刻叫我地行哂入去車站入面一個角落度，同大家點一點名啦。
都係好似去士林咁啦，因為實在太多人啦，根本上一定會走失，
所以我地又係約定左時間集合，之後就解散啦。
我地照舊五人行，kimmy同阿成拖住，我就繼續翹住一軍而表妹呢
....嘻嘻...好似變左電燈膽添..。
不過其實都唔會嘅....kimmy沿途同表妹講野其實都仲多過阿成，
始終表妹同kimmy真係最friend，但係其實我都想表妹幸福架....
唔知表妹幾時先會搵到佢嘅Mr. Right呢?
十分依度真係好靚呀，車站附近已經有好多手信店同小食店呀，
炸花枝丸呀，山豬串燒呀...仲有個雞翼入面包左啲飯喺度架....
全部都好好食，嘻嘻...我照舊係每樣食幾啱之後就塞比我個私人垃圾桶囉...。
我地行吓行吓，經過左一條吊橋，好似叫(靜安吊橋)喎，
好特別架...香港一定睇唔到囉，雖然唔係淡水情人橋，
但係我同一軍都企左埋去影相....一樣係咁sweet...嘻嘻。
我地喺十分老街跟住人群再行多一陣。
「…咦....天燈呀!!!」kimmy大叫。
而家我地前面全部都係賣天燈嘅舖頭。
「...er.....我已經買左三個架啦，你地自己揀顏色啦。」吖....阿成又真係幾快手喎，
kimmy講完冇耐，佢已經行左入其中一間睇落去比較靚嘅舖頭買左三個啦。
「…wu...醒目喎成，kimmy最鍾意啲醒目嘅人架啦。」表妹笑笑口望一望阿成講。
「…hehe...，最緊要kimmy鍾意...，欣姐...一軍哥，
你地都揀返個啦，比左錢架啦。」阿成，拗住頭笑笑口咁講。
「...er...小欣，你揀啦。」一軍望一望我。
「…er....咁...咁好啦。」我有小小興奮咁答。
「…揀咩色好呢....，吖...就揀我最鍾意嘅紫色啦。」雖然我有選擇困難症，
但係唔知點解今次又出奇地一望就覺得個紫色好靚喎。
我揀好左個紫色天燈之後，就同一軍開始寫野上去啦。
我地而家一人企左喺一邊各有各寫。
「…吖....，寫咩好呢?...」我拎起左枝筆，諗左一諗。
之後我就開始寫啦。
「…小欣你寫左咩呀?」我寫到一半果陣，
一軍已經寫完，仲無啦啦走左過離我果邊囉。
「...喂...喂....返過去先啦，我仲未寫完架，gogogo。」
我一邊講一邊推返一軍過對面。
「...哈哈....咁神秘...。」一軍笑笑口行返過去。
再過多一陣。
「…搞掂...。」我拍一拍手講。
「...寫好拿...小欣。」一軍見到我寫完又想行過離。
「...嘻嘻...比我睇左你寫咩先。」我推住一軍一齊行左過去一軍果邊。
「...。」我而家睇緊一軍寫咩。
i love yan
我要娶小欣做我老婆
照顧佢一生一世
如果係都要為依份愛
加上一個期限 我希望係
一萬年
「...小欣...做咩睇到定哂咁嘅?」企喺我隔離嘅一軍見到我睇到呆哂，而家拍一拍我膊頭。
「...一軍....。」我又眼濕濕啦...見到一軍寫嘅野我又開始有小小忍唔住。
「...傻豬離架...唔洗喊喎。」一軍而家用手抺一抺我啲眼淚講。
「…我...我開心到喊咋嘛...。」我收返淚水，微笑住咁同一軍講。
「...咁..到我睇返小欣你寫咩啦。」一軍講完之後就行左去我寫果邊。
我 愛 一軍
要同佢幸福快樂咁
生活落去
i love u
我寫嘅野相對就冇一軍咁有深度啦。
但係一軍而家都同我頭先一樣，睇到眼定定，好似好感觸咁。
「...做...做咩喎，我係唔識寫野架啦。」我口窒窒咁講。
「…噗...唔係呀，小欣...我好感動呀。我望住啲字，
我感受到你嘅心聲...真架。」一軍索一索鼻水...眼濕濕咁講。
「...一...軍...。」我細細聲捉住一軍對手講。
「...好啦，我地一齊將我地心入面嘅說話放上天，
祈求天父做十分鐘好人啦...哈哈。」一軍突然搞左個爛gag。
「...嗚...hehe...。」本來感動到喊嘅我，比一軍個爛gag搞到忍唔住笑左出離。
之後我地就行左出火車軌，好似那些年咁，
一人拎住一邊放左個天燈出去啦。
望住個天燈慢慢越昇越高...，我真係有一刻希望個天燈真係可以去到天父度。