天使原來是男生（舊名：魯莽天使）[小甜][變身][男變女][籃球]: 38
~到第二朝我好早就痛醒左，可能係琴晚喺山上面喪跑同比啲樹枝狂打嘅關係啦，
而家成個人好似散哂咁周身骨痛，連起身都有啲困難。
「...吖....。」我嘗試坐起身，但係肌肉酸痛到叫左出離。
「...小...小欣，你冇事吖嘛?」泳琳比我慘叫聲嚇嚫，即刻彈左起身。
「…冇....冇事呀...小琳豬，係肌肉酸痛姐...。」我驚嘈醒其他人，所以細細聲答泳琳。
「...我...幫你按摩吖。」泳琳好緊張咁講。之後就真係開始同我按。
「...吖....好舒服呀，小琳豬手勢真係好好呀。」點解我講野又變左足浴店個男人嘅......嘻嘻。
「…嘻嘻...小欣舒服就好啦。」泳琳面紅紅咁講。
我就繼續坐係床度享受....，吖.....泳琳真係可以做按摩店囉，雖然力水就冇我咁好，
但係好到位，全部酸痛嘅位佢都摙得中....突然覺到有泳琳喺我身邊好幸福添.....。
「...咦....阿嫂，你冇野吖嘛。」啱啱訓醒嘅kimmy，
見到泳琳幫我按緊摩，對眼半開合咁趷起身問我。
「...冇呀....kimmy，係肌肉酸痛姐，嘈醒左你牙。」我答佢。
「…點會呢...吖...嗚...我都差唔多起身，泳琳攰嘅話我可以接力架。」kimmy伸一伸懶腰講。
「...er...我ok架，唔洗幫我。」難得泳琳會開聲講野，可能佢好唔想kimmy摸我啦。
而表妹呢，琴晚啲鼻鼾就好似行緊雷咁嘈到拆天，而家就繼續訓到隻死豬咁，
唔怪得kimmy叫佢做豬蔚啦.....嘻嘻，所以KIMMY決定要去騷擾佢啦。
「…喂....死人倪金兒煩夠未姐...。」而家kimmy係咁喺表妹耳邊吹氣，煩到表妹醒為止。
「...嘻嘻...起身打我囉。」kimmy激到表妹彈吓彈吓，最後都係屈服起左身。
之後呢，因為阿成冇聽電話應該未起身，所以我地四個女仔就去左餐廳度食早餐啦，
沿途我成個傷殘人士咁趷吓趷吓咁行，而泳琳就繼續扶住我。
依度餐廳都係食平時茶記果啲啦，因為今朝早都繼續係自由時間，
我地好快食完之後，又開始四圍去玩啦。
kimmy話想打羽毛球喎，所以就帶住我地去左體育館。
去到果陣仲未訓醒嘅阿成終於都到左。
「…好大膽呀....唔聽我電話。」見到阿成kimmy即時開火。
「...er...對...對唔住呀...bb，電話唔小心校左震機。」阿成驚到口都窒埋。
「…吖...你個野吖...。」其實kimmy係咁易比個下馬威阿成姐。
鬧完阿成之後，kimmy借左四塊球拍話要打雙打喎。
「…er....你地四個打啦，我依啲傷殘人士坐吓得架啦...。」我同佢地講。
「...洗唔洗我陪你呀....小欣。」泳琳問我。
「...唔洗啦，你陪左我佢地三缺一架啦..，放心打波啦.。」我答泳琳。
於是佢地就開波啦，而我就坐左喺場邊啲位度撳吓電話咁。
咦.....有個未接來電嘅.....?睇吓先。
大陸電話........死啦.....唔通係老豆....？
我又唔敢打返去，依家拎住個電話，唔知點算好.....。
老豆搵我....到底咩事呢....，唔會咁快返離掛，
老豆通常過年先返離架嘛.....點會無啦啦返離喎.....唔好自己嚇自己。
我坐左廿分鐘，驚足廿分鐘，好似啱啱變左女仔果陣咁，
個腦又開始亂諗野.....終於。
~燈光熄滅了 ~ 音樂靜止了~ 滴下的眼淚已停不住了
~天下起雨了 ~人是不快樂 ~我的心真的受傷了~
我部電話終於再一次響起...。
「…吖...。」我嚇到成部電話跌左落地，好彩有殼姐....，我即刻執返起....。
又係頭先個大陸電話呀.......聽唔聽好呢....?但係如果真係老豆咁....點好呢.....。
終於.....我鼓起勇氣接左個電話，然後盡量將自己把聲壓到最低沉.....。
「…喂.....。」我對住電話講。
「...喂...，係咪子仁呀?」真係老豆。
「…係...係呀老豆...，咁...咁得閒打比我嘅...?..」我用低沉嘅聲音回答。
「…點解你把聲....怪怪地咁嘅?」老豆有小小疑惑咁問我。
「...er...喉嚨....生飛滋呀我...。」好似有啲誇張，
但係其實我係一個成日生飛滋嘅人離嘅，所以老豆應該唔會懷疑。
「...嘩....生到落喉嚨添啦，食小啲熱氣野啦仔。」老豆講。
「…知啦知啦，係...係呢...搵我咩事呀?」我再追問。
「...冇野唔搵得你架咩...衰仔。」老豆有小小悔氣咁答。
「...唔係...。」我繼續壓低把聲。
「...老豆病左呀....唉...。」我都估到架啦，通常冇事冇幹老豆唔會冇啦啦打比我囉，
但係每次佢病左果陣就一定會打返離搵人關心吓佢架啦。
「...吓....又病左呀，點呀...嚴唔嚴重呀?」我係咁易問候吓佢。
「...發燒...周身骨痛囉...，而家喺屋企攤抖緊....吖...好辛苦呀仔。」
老豆而家專登扮到好辛苦咁嘅聲詐嬌，講野果陣嘅語氣都會誇張幾培，
依個係我老豆嘅特色，可能佢好想我關心吓佢啦。
「…er....抖吓囉，休息夠先返工啦，一陣病上加病就麻煩啦。」我繼續問候。
「...都係阿仔最關心老豆....。」老豆把聲依家甜哂。
「...係呢，同泳琳點呀?」老豆突然轉話題。
「...吓....幾...幾好吖...。」我嚇一嚇叫左出離。
「...咁緊張...唔係...散左吖嘛?...」老豆聽到我大叫有啲懷疑。
「...點...點會呢...，哈哈...我地不知幾好。」我口窒窒咁答老豆。
「...唉...唔知阿仔你幾時會整粒慈姑椗比老豆玩吓呢...。」老豆突然好感嘆咁問我。
「...吓...，我仲讀緊書咋喎老豆。」我講。
「…車...，以前係鄉下啲人都係十幾歲就生仔架啦，有仔嚫嫩生吖嘛。」老豆講到好有道理咁。
「...但...但係...如果唔係仔呢?...」我開始試探老豆。
「...哦...你同泳琳生仔女我都咁開心架啦。」老豆笑住口咁講。
「...係呢...老豆牙，你以前有冇諗過生女架?...」我細細聲咁問。
「……er....有架，果陣冇咁科學昌明吖嘛，好遲都唔知你係仔定女，我同你阿媽都諗好左架啦，
如果係仔架呢就叫子仁，女架呢就叫子欣囉。」老豆講。
「...咁你果陣鍾意仔定女多啲呀?」我繼續問。
「…哈哈...傻仔，緊係仔啦，可以傳宗接代吖嘛...
不過子仁你如果第時生個女我都一樣會咁錫嘅...放心啦。」老豆笑笑口咁講。
「…係...牙...。」我有啲心神彷彿咁講。
「...阿仔...你問咁多野...唔會真係搞大左泳琳個肚掛...。」老豆而家試探返我。
「...邊...邊有喎...隨便問吓咋。」我好緊張咁答。
「…真嘅?...你唔係想我過年返離果陣比驚喜我掛...。」搞錯呀...邊有老豆想個讀緊中學嘅仔搞大人地個肚架...。
「…都話冇囉...。」我嬲嬲地咁答。
「…但係點解你今日咁怪嘅...把聲又怪...問啲野又怪...。」老豆繼續疑惑。
「…可能你發緊燒姐...。」我講。
「…係咩...?。...衰仔有野唔好呃我呀，我會叫你堂姐睇實你架...知唔知呀。」老豆用教訓嘅語氣同我講。
「...得啦得啦，好啦老豆...休息吓啦，電話費貴呀....㗑㗑。」我終於收左老豆線啦。
「...唉....。」之後我嘆左一口氣，唉...原來老豆咁鍾意生仔架....
如果而家比佢知道冇左個仔....實激到佢爆血管都似。
到時分分鐘要同我脫離父子關係添...吖...唔係...應該係脫離父女關係...。 我坐左喺度繼續諗野，
時間好快又過去啦，眨吓眼kimmy佢地都打完羽毛球行返埋離我度啦。
「...咦....表姐，做咩喺度發呆呀?」表妹見到我呆呆吓咁，所以問我。
「...咦...打完啦...冇...冇野呀。」我回神之後答表妹。
之後我地就去食lunch啦，餐廳情況同琴日都係差唔多，
我地都係照舊搵返自己張枱等餸食飯就可以啦。
食完之後泳琳行左埋去老師張枱度傾野，而我地其他人呢，
就諗住返宿舍執拾吓行李。
當我地行到出餐廳門口果陣，突然有人叫住我喎。