天使原來是男生（舊名：魯莽天使）[小甜][變身][男變女][籃球]: 24
~外國人好似feel到我知道左佢嘅存在咁...即刻起身掉頭走左。
「…喂....唔...唔好走呀。」我一邊追一邊叫...，帶住虛弱嘅身軀，我越跑就越慢...越追就越遠離...我...。
「…吁....嗯...吁...。」最後我都追佢唔到，而家企左喺一樓s座通去正院嘅天橋上面透緊大氣。
真係失敗...而家連個阿叔都追唔到，仲話自己係咩運動健將...唉....。
就喺我嘆緊氣嘅時候....咦喂....。
喺....下面...，個外國人...就喺下面馬路..而家上左部白色嘅私家車....，
開...開車啦佢...點...點做好呀我..，係啦....記...記住個車牌先...應該會有用...睇吓先....t...r...8...0...9...9....。
透順條氣之後，我就返左上病房啦。
「...周子欣...邊個比你落街架。」有個好似係護士長嘅人發現左我落左街。
「...er...唔好意思呀...我...唔知道唔落得架...sorry。」我淆哂底咁答。
「…下次唔好啦，醫生就離巡房架嘛，一陣醫生離到見唔到你，到時你自己冇得出院咋...。」護士長挖苦緊我。
「…吓...我出得院架啦。」我有啲驚訝咁問。
「...同你做哂檢查架啦，你身體機能一切正常喎，如無意外，一陣醫生離到睇完你，冇咩野晏啲就出得院架啦。」護士長講。
「…哦...。」我成個傻妹咁，浄係識係度噏頭。
就係咁，醫生真係喺廿分鐘後離左巡房，好彩返得切離姐，如果唔係真係唔洗旨意出院啦我。
醫生哥哥話我背脊只係輕微瘀傷，輕微腦震盪，其他野一切正常喎，晏啲搞埋啲手續，護士就會叫我出院架啦喎。
咁我而家唯有繼續訓喺床度休息囉，訓喺床上面，我又開始諗起琴日嘅事，唉...一軍同alice，
佢地之間到底發生過啲咩事呢?...可以令alice死心塌地咁鍾意一軍...點解呢?z.....z....。
睇離藥力開始到啦...諗諗吓野嘅我，又再一次訓著，直到.......。
「....周子欣!....起身啦。」姑娘叫醒左我。
「成三點幾架啦，你已經遲左食飯架啦，快啲起身啦，差唔多出得院架啦。」姑娘不厭其煩咁講。
我回過神之後，就坐左起身，望住果個唔知已經放左喺度幾耐嘅飯盒...，真係唔知食唔食好，
開離睇吓都好嘅...，大家估吓今餐會係咩野呢，會唔會又係冬瓜瘦肉呢?......答案係.......唔係冬瓜瘦肉嘅，
...不過係蘿白瘦肉囉....，個飯就咁望落去，同今朝個飯簡直就係孖生兄弟咁...，味道同白烚冇分別，
我求其食左幾啖之後就放棄左佢啦。
之後都係好無聊咁拎住部s5喺度上吓網咁，直到4點幾，護士姐姐終於都行入離啦，
揸住個a4 file，同我講左啲官腔野之後，就比左張覆診紙我，話我而家可以走架啦，
叫我執埋啲野就走啦。
我換返哂琴日泳琳拎比我嘅衫褲，之後坐左喺床度望住我個櫃筒，其實都真係冇咩野執，
只係得d牙刷毛巾果d野，都應該唔會帶返屋企架啦。
於是我就真係兩手fingfing咁出院，我慢慢行出去搭𨋢，
諗住落地下嘅小巴總站搭小巴返屋企，但係當落到地下嘅時候。
「...小...小欣...，你走得啦?...」係一軍，佢啱啱就喺樓下等緊𨋢上離。
「…er...係呀。」我細細聲答佢。
一軍條友校服都未換，咩住個黑色書包，一隻手揸住紮紅玫瑰，另一隻手仲揸住枝巨型(葡萄適)，
個樣真係好鬼好笑囉....，之後一軍送我返屋企，搭緊小巴果陣，我終於忍唔住要問佢啦。
「...一軍呀，其實....你同alice...到底發生過啲咩野事呀?...」我有小小尷尬咁問佢。
「.....er。」一軍好似有口難言咁。
「...er..唔緊要架，你唔想講就由佢啦。」我講。
「...唔係...小欣..，我只不過係諗緊應該由邊度講起姐。」一軍抬一抬頭講。
「…其實alice一直都係我練空手道嘅師妹離嘅，記得應該係喺上年暑假嘅某一日，我練完空手道之後，
經過一個公園果陣，我見到佢....。當時alice比四個古惑仔圍住，我隱約聽到，好似係alice郁佢地其中一個人條女喎，
所以條女搵班古惑仔返離(覆桌)，其實alice真係好堅強，我見當時alice個樣驚都未驚過咁，就算之後真係唔夠人打，
佢都完全冇喊過，睇見佢開始支持唔住，咁所以我就...衝左埋去，打底哂果幾個古惑仔囉。
之後alice好感激我，從此之後我地就成為左朋友。起初我地只不過我喺空手道部見面，教導吓佢d技巧咁，
但係之後佢開始約我出去食飯，初頭我諗住朋友食飯冇咩所謂啦，所以我都有去到，但係...過左一段時間之後，
我開始意識到唔係好對路，alice開始化濃妝出離，食飯期間嘅說話，亦都帶有一啲暗示，又過多一排，
alice開始著得好性感咁出離同我食飯，係街上面，亦都有意無意咁翹住我隻手，我覺得我唔可以再咁落去啦，
我一直都係當alice係我個妹，對佢一啲feel都冇，所以....喺果次之後，我再冇同過alice出去食過飯啦，
就算之後有幾次佢好堅持，我都會格硬拖多幾個師兄弟一齊去，直到今年六月嘅果一日。
果一日，alice話係佢嘅生日，死都話要我上佢屋企食飯，話係最後一次，我見佢...生日，又話最後一次咁，
所以我應承左佢。我地果日練完空手道之後，佢就好開心咁翹住我一隻手返佢屋企，
去到佢屋企，一個人都冇，我坐左喺梳化度等，而佢就入左廚房準備佢嘅食物，果餐係食西餐，
佢熄哂全屋啲燈，點起哂紅色蠟燭，之後仲煮左啲心形牛扒出離，仲一啖啖咁餵我食，食完之後alice入左廁所，
我坐返埋梳化度諗住坐多陣就走，點知alice佢，...忽然係廁所度行返出離，...而且係除哂所有衫全裸咁行返出離...，
當時我覺得好驚訝，點解...佢...會咁大膽。佢一步一步咁行埋離，我坐左喺梳化度仲未意識到應該點做果陣，
佢成個人騎左上離我度，仲想咀埋離我度，終於....我...做出左反應，我推開左alice，之後衝左去門口果邊開門走左。」一軍陳述記憶。
「...唔係掛...有得食你會唔食?」我打斷左一軍，有d質疑佢，邊有貓唔食魚架。
「…小欣你唔可以咁睇我，我...我唔係一個咁隨便嘅人離，你唔信可以問kimmy，
我從來都未拍過拖...，亦都冇帶過女仔返屋企。」一軍好真誠咁講。
「…咁...咁你又隨便攬住我...?」我繼續質疑佢。
「…你唔同，小欣...當我喺商場度第一次遇到你果陣，就已經深深咁愛上左你，果一刻嘅感覺，
就好似有度雷打落我個頭度咁，我對人生充滿返希望，我認定左我嘅目標就係你...。」
「…得啦...得啦....，不如你講返alice先啦...。」我再一次打斷一軍嘅曲線示愛。
「果晚食完飯之後，我開始有心避開佢，我連空手道部都成半個月冇返去，但係alice並冇死心，
仲係咁喺同學之間唱我，話我呃完佢隻豬之後就中出即飛，從此之後，學校入面嘅女同學就更加疏遠我，
直到...暑假嘅果一日，即係遇見小欣你果一日，我約左alice出離，諗住喺商場果度同佢講清楚，
點知佢依然係死纏濫打，於是我好狠心咁推跌左佢，之後就係小欣你嘅出現啦...。」一軍講。
「...就...就係咁...?...」我問。
「...未完架...喺你走左之後，alice過離想扶返起我...，當時我...諗到個令佢死心嘅方法...，我同alice講，
話你係我女朋友，因為嬲左我，所以打我囉，我再同alice講，我好愛我女朋友，叫佢死心，
咁之後佢都真係冇煩我一排架啦，我仲以為佢真係放棄左添，點知...佢會轉而搞小欣你....對...對唔住呀，
小欣，如果唔係我，你就唔會搞成咁..。」一軍陳述完畢。
「…算啦，都過去左啦。」我講。
「…小...小欣。」一軍想喊咁嘅樣。
講到依度，小巴都差唔多到我屋企啦，一軍送我去到屋企門口，之後就回頭走啦。
「喂....。」我叫住左佢。
「..咩...咩事呀，小欣。」一軍回頭答我。
「你啲花....唔係送比我架咩。」我瞇起對眼望住一軍講。
「...係...係呀...，小欣...拿...。」一軍傻間間咁隊返紮玫瑰同枝葡萄適比我。
「好啦....㗑㗑小欣。」一軍又再一次回頭。
「...喂....。」我再叫。
「…係。」一軍又擰返轉頭望我。
「…多謝你啲花...。」我細細聲講。
「...哈哈，鍾意就好啦，㗑㗑。」今次一軍真係走啦。
我亦都拎住紮玫瑰同枝巨型葡萄適返入屋，一開門...堂哥...點解仲係度嘅?唔係走左架啦咩....，之後就係堂姐喺廚房走出離。
「...咦...子仁，返離啦。」堂哥對住我叫，....喂....佢點知我係子仁架，肯定係堂姐講啦。
「...拿....唔關我事架，個衰仔自己估到架咋。」我睥住左堂姐，堂姐即刻好驚咁解釋。
「…吓...，聰哥...你...你幾時知架?...」我好驚訝咁問堂哥。
「…er....果日一入到離你屋企我已經知啦。」堂哥輕描淡寫咁講。
「…真係架...點解嘅?」我再問堂哥。
「…吓...好多蛛絲馬跡架喎，首先係你用鎖匙開門嘅慣性動作，再加一啲面部表情咁，
之後就係你講野嘅語氣，常用語果d啦，我已經可以估到九成，之後我專登喺你面前攬住泳琳睇吓你嘅反應，
睇完之後我已經可以100%肯定你就係子仁啦。」堂哥係咪神探伽利略離架，咁都估到。
「...er....，你唔會覺到好奇怪架咩?」我問堂哥。
「...why not，靈魂同肉體轉移理論上係可行嘅，我喺美國讀書果陣，就已經做過一啲測試靈魂質量嘅實驗啦，
最後仲證實到靈魂係有重量嘅添，大約係21公克左右。」堂哥同我講依啲野我都唔明架啦。
「...嘩....小欣你，咁快就收花啦。」堂姐可能都覺得悶啦，打斷左堂哥嘅話題。
「…咩...咩喎，同學探病送架咋。」我面紅紅咁講。
「…咩同學會送紅玫瑰呀，仲要係十一枝添，代表愛你一生一世喎...嘻嘻。」堂姐笑笑口咁。
「…吓....有依啲野架咩?...」我好驚訝咁問。
「...嘻嘻，緊係啦，你個同學仔買花果陣，花店職員一定會解釋比佢聽，咁仲話人地唔係鍾意你。」堂姐笑淫淫咁講。
「...er...人地點諗我阻止唔到架喎。」我講。
「…咁你自己又點諗呀。」堂姐問。
「…er....，哎喲，個頭好痛添...，唔講住...。」我一枝箭咁衝左入廁所。好彩之後出返離，堂姐冇再追問我咋。
「…爆石咩，搞咁耐先返出離。」堂姐見到我行返出離之後，一邊拎啲餸上枱，一邊話我。
原來堂姐又煮左飯咩?...不過睇啲餸個樣，都係似買返離嘅多。
「...咦...幾好餸喎。」都係唔好踢爆堂姐啦，費事又比佢搵位入我呀。
「…梗緊啦，我好細佬返左離喎。」堂姐好興奮咁講。
「我而家有個好細佬又多個好細妹啦，諗起都開心呀，嘻嘻。」堂姐笑到四萬咁口。...哼... 乜以前兩個好細佬唔好咩...。
「...啲餸幾好食喎，邊度買架家姐?」堂哥一邊食一邊踢爆堂姐。...呵呵，唔洗我自己踢爆佢。
「…er...死仔。」堂姐搵唔到位入堂哥。
「…係呢，聰哥而家住邊呀?」問清楚先，一陣要我自己一個對住佢都唔知點算。
「...放心啦好細妹，阿聰會暫時同我住，遲啲等佢出離做野之後，就自己搬出去住囉。」堂姐講。
「...唉...個衰仔話已經見左份電單車司機嘅工喎，仲話下星期返工添。」堂姐用啲冇佢咁好氣嘅語氣講。
「...吓....咁快，咩公司離架?...」我好奇問。
「…er，好似係廣告公司離，送吓啲海布呀，色版呀咁啦，我要更正我地依行唔係叫司機，而係叫車手囉。」堂哥好正經咁講。
「…er....堂姐點解你...冇意見嘅?。」供左堂哥讀咁多年書，而家走去做車手，點解堂姐好似唔嬲咁嘅。
「…唉...，咁大過人啦，我可以點姐，咪由得佢玩吓囉，條友做兩做又會話唔做架啦。」堂姐一個胸有成竹嘅樣。
咁又係嘅，堂哥讀讀吓科學都可以走左去讀聲樂啦，有咩野冇可能姐。