天使原來是男生（舊名：魯莽天使）[小甜][變身][男變女][籃球]: 71
~「………er....。」我都唔知點答佢好。
「...你地...唔會一齊沖完掛?」老豆好疑惑咁問。
「...唔係呀...佢沖完我先入去沖架咋!!!」對唔住呀...老豆，唯有講大話啦。
「...咁都好啲...，女仔唔可以咁隨便架，果啲死𡃁仔十個有九個都係冇本心，
都係想呃....西...。」老豆講到依度突然好似好尷尬咁收左聲...。
「...總之就要小心啲啦...。」之後老豆講。
「...係啦...老豆...我變左女仔...你會唔會唔開心呀?」我細細聲問。
「…點會呀...你都依然係我嘅乖女呀。」老豆好激動咁講。
「...但...但係...之前同你講電話果陣，你明明係話鍾意仔可以傳宗接代架...。」我有啲質疑咁問。
「...哦...傻仔...吖唔係...傻女離架，果陣我以為你仲係男仔，
我緊係話鍾意仔多啲啦，但係原來你變左女仔...講真...老豆雖然係傳統啲...
但係都仲係講道理嘅...，仔女我都真係會咁錫，兩樣都咁鍾意。」老豆講。
「…嗚...老豆。」我又離料啦...點解會咁易喊架...。
「...喂...喂...子欣...唔好呀...女仔之家唔好再攬我啦...
老豆真係頂唔住架...。」老豆好緊張咁...縮後左小小。
「...嗚...。」我收左小小聲停左落離。
「...吖...子欣你變左女仔真係好似柔弱左好多咁喎...，不過女仔係應該咁嘅...
緊係要斯斯文文咁比人愛錫吓架嘛。」老豆...我想講...其實我都真係唔斯文架囉...。
「…唉...不過都真係估唔到...billy佢有咁大嘅能力...
可以將子欣你變成咁...。」老豆繼續感嘆。
「…老豆...你...唔嬲佢咩?」我問。
「...開頭有小小架...但係之後諗深一層，如果佢唔救你嘅話，
我就咩都冇，而家都起馬有返個女吖...。」老豆講。
「...咁...其實...你地嘅關係，到底係點架姐?」我好好奇咁問。
「...er...我諗吓先，其實我同billy認識又真係唔係話咁深架咋，
淨係知佢係你阿媽嘅初戀情人。當年我跟住啲同鄉一齊膽粗粗走左去舊金山洗大餅，
之後就喺間中菜館度識到你阿媽啦。」
「當時你阿媽真係好吸引我，中國人咁嘅外表，但係就係鬼妹仔咁嘅性格，
你知啦...當時嘅中國女仔思想好鬼死守舊架嘛，但係你阿媽呢...就好唔同啦...
好主動同我傾計，又教左我好多關於美國嘅事物，我可以話係對你阿媽一見鍾情，
但係...一直都唔敢向佢表白。」
「直到有一晚，我收工之後見到若冰佢一個人悶悶不樂咁坐左喺露臺度飲酒，
於是我膽粗粗咁行左埋去同若冰佢傾計...，交談期間得知，原來若冰有個初戀男朋友失左蹤幾年，
當時我不停安慰佢仲陪若冰佢一齊飲酒，果晚若冰挨左落我心口度訓著左，但係我冇乘人之危，
我只係抱返佢入休息室度幫佢冚返張被我就走左。」
「到第二晚收工若冰話要請我去食宵夜，所以我地兩個就去左附近搵野食...
食完之後我地一齊返去員工宿舍果陣，我終於忍唔住同若冰佢表白左...，
當時若冰好驚訝咁，我感覺到當時嘅佢好忐忑，佢靜左落離...等左幾分鐘，
若冰佢...好無奈咁...同我講...話仲未放得低佢初戀男朋友billy...所以唔可以接受我嘅愛住...。」
「果次之後我冇放棄，我繼續默默咁喺若冰身邊照顧佢，守護住佢，
我每日都會煮定早餐等若冰佢返到離食，有時仲會煲啲糖水同佢收工果陣一齊飲，
日子一日一日咁過，我感覺到若冰佢一日比一日開心，終於到年廿六果日，
因為年廿八我就要啟程返福建過年嘅關係...我當時好驚以後都再冇機會見到若冰，
所以我決定要再一次向若冰佢表白，希望若冰可以放得低billy。」
「果晚我地收左工之後，我約左若冰一齊去附近嘅唐人街年宵市場行吓，
去到市場行到咁上下，我就走左去花店買左紮玫瑰花向若冰佢再一次示愛，
今次若冰終於都應承左我，我地仲喺市場度kiss...而家諗返起...真係好甜蜜好似發緊夢咁....，
之後若冰跟左我一齊返福建過年，果個年頭...真係我人生最快樂嘅一年。」
「過完年之後，我地決定留喺福建生活，但係喺美國生活開嘅若冰，
去到咁落後嘅大陸又點會習慣吖...經常都水土不服，我唔想若冰跟住我要受苦，
所以我決定同若冰一齊落香港生活，因為我一早就已經攞左香港身份證，
所以順理成章咁申請左若冰離。」
「離到香港之後，生活質素真係改善左好多，我地兩個人一齊努力打工，
終於...我地開左自己嘅小食舖，我地見生活穩定左落離，於是就決定生小朋友啦，
唔洗三個月，我地就有左子仁你...，到你出世果陣，我覺得簡直係上天賜比我嘅禮物...，
子仁你細個果陣真係好鬼死得意...頭大大咁....對眼又大...水汪汪咁....，
發卑氣果陣仲係咁叫...打...打...打....，真係成個天使咁架。」
「billy果陣突然間出現，仲話想同若冰復合添...我果陣好驚...
但係亦都尊重若冰佢...等佢自己選擇...，最後....你阿媽點樣㨂，
我諗我唔洗多講啦...，就係咁...billy就走左，
但係可惜...幾年之後你阿媽佢.....。」老豆講到依度又忍唔住喊左出離啦。
「...老...豆...。」我細細聲叫。
「...噗....放心...我冇事...。」老豆索一索鼻水揮一揮手講。
「...而家望住子欣你...我就覺得好似見到若冰咁...可能依份係上天比我嘅最後禮物啦...，
我諗billy都係因為咁...所以將子仁你...變成子欣。」老豆又望住我...情深深咁啦。
「...老...豆...。」我繼續細聲叫。
「…我地嘅過去就大約係咁啦...，好啦...子欣...我講完架啦...
你去做自己野啦。」老豆伸一伸懶腰講。
同老豆傾完一輪之後，我就入左浴室沖涼...。
唉...原來我一直都怪錯左老豆，仲以為老豆係重男輕女果啲人添。
~...咯咯...~
到我沖到一半果陣，老豆忽然喺出面敲門喎。
「…做...做咩呀...老豆?」我大叫。
「…冇...冇呀...我見子欣你成半個鐘都未出離...
我驚你有事姐。」老豆有小小緊張咁講。
「...我冇事呀...就出離啦。」我叫出去答老豆。
雖然我話就出去，但係到最後都差唔多成個鐘先出到去。
「…嘩...阿女你...依家沖涼要沖咁耐架...
下次肚痛咪死得...。」老豆笑笑口咁講。
「…er...唔好意思呀...老豆。」我dup一dup低頭講。
「…唔緊要...女仔係耐啲架啦，下次你沖涼之前話聲我聽啦...等我去清哂先。」
老豆好好呀...咩都就哂我...如果係以前我沖涼沖得耐啲都比佢媽叉到爆囉...。
「...哦....咁我去吹頭先啦...。」我講完之後就行左入房吹頭啦。
吹完頭搞完哂之後，我行返出廳，老豆依然係坐左喺梳化度睇緊電視，
於是我又坐左埋去一齊睇啦。
可能已經係夜深啦，所以而家電影台播緊(3d豪情)。
「…嘩...依個杜文澤咁瘦嘅...。」老豆一路睇一路講。
「...係喎...。」我應一應老豆。
之後劇情播到去杜文澤比av女優強姦果度....。
「...哈哈...哈哈。」我忍唔住笑左出離，
因為啲劇情真係好九唔搭八囉。
「……。」老豆唔知點解粒聲唔出咁轉左台。
「...喂...好好笑呀...老豆，做咩轉台姐。」我笑住咁講。
「…er...阿女呀...不如睇第二台啦。」老豆好尷尬咁講。
「...er...是但啦。」我講，因為老豆個樣真係好尷尬...，
可能有啲野同個女一齊真係唔睇得架...。
之後我地就坐左喺度睇食神啦，唔知點解呢...明明睇到識背咁濟，
但係每次播又會乖乖咁坐喺度睇架喎...嘻嘻，最後睇到差唔多成點鐘先肯入房訓，
而老豆呢...係夜鬼離架...沖左杯咖啡之後就招牌動作挨喺張梳化度...繼續睇戲。
入到房度我招牌動作成個人大字形咁攤喺張床度啦，
我whatapp同一軍傾左陣之後就攤喺度諗左一陣野...。
唉...估唔到老豆同阿媽嘅愛情故事都幾浪漫架喎...，老豆嘅人生真係戲劇性，
後生果陣就離鄉背井，之後老婆仲死埋，到年紀大左，
個仔又無啦啦變左個女喎...老豆你放心啦，我會好好咁孝順你架啦...z....z.....z。