天使原來是男生（舊名：魯莽天使）[小甜][變身][男變女][籃球]: 70
~「…………。」我依然係企左喺門口唔敢入去。
「…小欣...加油呀!!!」一軍喺我側邊不斷細聲打氣。
「...嗯...咁...咁好啦。」我終於鼓起勇氣啦。
~叮噹....~
我手震震咁撳響左個門鐘。
~...嚓....~
係……係堂姐開門比我呀。
「...你地快啲入離啦...等緊你地開飯呀。」堂姐一邊講一邊拉左我入屋，
而一軍就喺我後面跟住入離。
而家屋入面除左堂姐之外，堂哥...姐夫，
同老豆三個人都坐左喺廳張飯枱度準備開飯，而枱面已經放到滿哂餸菜。
「...子欣...坐依度吖。」堂姐拉左我埋去坐喺佢隔離，
隔開左我同老豆，而一軍就坐喺我另一邊。
「...好啦...一家人，一團和氣...齊齊整整，平平安安。」喺堂姐講完一大堆金句之後，
我地周家嘅團年飯，就正式開動啦。
一開波...姐夫就好似餓狗搶屎咁，將枱上面嘅餸菜極速掃蕩，
唔知仲以為佢啱啱放監出離添呀，我同一軍都睇到呆左。
「...喂...死佬...，洗唔洗食得咁快呀...，
冇人同你爭喎。」連堂姐都睇唔過眼出聲啦。
「…哈哈...老婆，你知我啱啱開完(零零一八)架。」姐夫停左一停講。
「...咩...零零一八呀?」我問。
「...er...子欣牙...。」姐夫叫完我之後停左一停...，
好驚講錯野咁望一望老豆，不過老豆好似冇咩反應咁...繼續食飯。
「...(零零一八)呢，即係話琴晚零辰十二點開工，
之後直落到啱啱旁晚六點先收工囉。」姐夫繼續講。
「…咁...中途冇食飯時間架咩?」我問。
「...理論上係有嘅，但係實際上要睇環境，咁啱琴晚有個大型Operation，
所以冇時間食飯，淨係今朝食左件腿治咋...。」姐夫好認真咁講。
「…嘩...原來姐夫你份工咁辛苦架...!!!」我好驚訝咁講。
「…唔係你估...，而家啲人又越離越麻煩喎，郁啲又話投訴咁...
再唔係就拍片放上網比人公審，我有好多伙計都頂唔住走得就走...，
依家人手真係好鬼緊囉。」姐夫一邊講一邊擰哂頭咁。
「…係喎...大隻仔，睇你高高大大咁，有冇興趣當差呀...，
係就話我知，到時等我薦你過離幫我手吖。」姐夫無啦啦同一軍講囉。
「...吓...er...我冇諗過喎，而家都係想專心考好個dse希望讀到大學先。」一軍諗一諗之後好認真咁答。
「...喂...諗諗佢吖...。」姐夫拍一拍一軍膊頭講。
「…哦...我會認真考慮吓架啦...姐夫。」一軍答。
之後佢地就繼續食飯啦...，今晚真係好好餸呀...又鮑魚又石斑咁...，
仲有髮菜蠔豉添...，唔講唔知呀...我雖然好鍾意食蠔咋，
但係蠔豉我就從來都唔食架...唔知點解...硬係覺得個質感好怪咁囉。
而家堂姐同姐夫就不停發表緊佢地嘅偉論，我同一軍就坐定定聽，
聰哥就掛住喺度玩whatapp好似同個女仔傾得好開心咁...嘻嘻...唔通聰哥拍緊拖?而老豆....，
咦...食食吓...我開始留意到老豆佢...，一直都偷望緊我...而且佢嘅眼神好似好疑惑咁...
但係又好似好緊張咁...吖...我都唔識得形容啦...總之就係好怪啦。
老豆不停望...我就極力逃避佢眼神，點算好呀...老豆到底諗緊咩架....。
就係咁...全餐飯我地就好似攻防戰咁...佢攻我就避，好唔容易咁...終於食完餐團年飯啦，
我同堂姐入左廚放洗野，堂哥就繼續忘我玩whatapp，老豆就同一軍坐左喺飯枱度睇電視....，
我諗一軍而家嘅壓力唔會細得過我囉...辛苦你啦一軍。
而姐夫就好眼訓咁一食完就攤屍咁攤左喺梳化度啦，
鬼咩琴晚直踩到今晚喎，鐵人都死啦。
「…子欣牙...。」洗緊碗果陣堂姐叫我。
「...嗯...。」我望住堂姐。
「…唔洗擔心喎，大伯佢咩都知道哂架啦。」堂姐講。
「…但係...老豆...根本就唔鍾意...女。」我有啲悔氣咁講。
「…點解你咁講呀?」堂姐問。
「…我之前同佢傾電話果陣，我問佢當年想生仔定生女，
佢好快就答左話係仔啦...仲話女唔可以傳宗接代囉...。」我繼續嬲爆爆咁講。
「…會唔會有啲咩誤會呀，大伯唔似係啲咁嘅人喎，
而且我地同佢講果陣，佢又唔似好嬲咁嘅樣。」堂姐繼續講。
「…如果...唔係...咁點解當時要趕我走喎...。」我問。
「…可能...大伯當時一時衝動，又或者根本未搞清楚件事姐...。」堂姐講，
之後我冇答到堂姐，因為我都唔知搵咩反駁佢。
我地洗完野出返去之後，堂哥佢地就話要走啦。
「...小欣...差唔多啦...，我都係時候返去啦。」連坐左喺度嘅一軍都話要走。
「…㖿...唔好走啦。」我有啲緊張又有啲唔捨得咁拉住一軍隻手。
「…乖啦...好夜架啦。」一軍摸一摸我個頭。
「...我...驚呀。」我細細聲講。
「...小欣...果個係你老豆離架，你此終都要面對佢，
放心啦...切肉不離皮，你老豆唔會食左你嘅。」雖然好唔捨得，
但係一軍講完一大堆道理之後呢...就同堂姐佢地一齊走左啦。
而家全間屋得返我同老豆兩個，場面真係好鬼死尷尬囉。
老豆喺堂姐佢地走左之後就入左浴室沖涼，
而我就一個人坐左喺梳化度唔知點好。
正當我諗住返入房避吓嘅時候，老豆就喺浴室行返出離啦。
「…子…子...仁。」老豆好緊張咁開聲叫住我，
而我依家就企定左喺原位，背對住老豆唔敢望返後去咁....。
「…子仁呀...。」老豆而家行左埋離我前面。
「…做...做咩喎。」我口窒窒咁問。
「...er...不如...我地坐低傾吓啦。」老豆而家個樣好尷尬...
又好緊張喎...仲面紅紅咁...我都未見過老豆對住我會咁嘅。
「...坐...坐...啦。」我都未答佢，老豆已經行左埋飯枱度幫我拉埋櫈啦，
於是我就黑口黑面咁行左埋去坐啦。
「…………。」一坐低老豆就粒聲都唔出係咁望住我...，
而我就繼續dup低頭...唔知講咩好...，就係咁。
..過左兩分鐘...終於...。
「...對唔住呀....。」老豆竟然開口同我講對唔住，
老豆由細到大都係一個嚴父，我從來都未聽過佢同我道歉架?
「...對...對唔住...咩喎。」我口窒窒咁問。
「...頭先...我...我好亂呀，我當時以為...子仁你個衰仔...好玩唔玩，
走去學人玩扮女人...甚至...走去變性...。」老豆口窒窒咁講左出離。
「...咁...咁...之後呢?」我同老豆一樣係食哂螺絲咁...。
「…我...我當時真係好嬲...，我唔係嬲你...而係痛恨我自己...冇時間去管教你...，
搞到你...行差踏錯...。」老豆一路講...對眼就開始紅埋...仲好似想喊咁添...。
「........。」我繼續唔敢出聲。
「…趕完你出街之後，我個心真係好痛，我唔知自己到底點解要咁做...，
我好後悔...直到文琪打比我...。佢當時問我有冇見過你...，
我果陣其實都有小小怪佢冇好好咁睇住你....，但係文琪此終唔係我個女，
所以我只係問文琪佢...點解你會搞成咁...，直到文琪同文聰佢地上到離將成件事嘅來龍去脈講哂比我知...，
我先知道......」老豆講到依度....唳水已經開始流出離啦。
「...我...我先知道...原來我...怪錯左你地....對...對唔住呀...子仁...。」老豆嘅淚水已經好似滔滔江水，
連綿不絕啦，更有如黃河氾濫，一發不可收拾.....。
「…老...老豆...。」見到老豆咁感性...我都就離忍唔住喊咁細細聲叫。
「...子仁...，唔係...我依家係咪應該叫你做子欣先啱呀?」老豆抺一抺眼淚問我。
「…嗚嗚....嗚嗚...老豆......嗚嗚。」我忍唔住啦...唔受控制咁衝左埋去攬住左老豆喪喊...。
「.....er.....。」老豆er左一聲，但係我冇理到佢...
繼續攬住佢喊，直到過左幾分鐘之後...。
「…子...子欣...，你放手先啦...老豆就離透唔到氣啦!!!」
老豆拍一拍我背脊講，之後我就鬆返開手啦。
「…嗚...。」我心情仲係未平復。
「...咳咳...子欣...你而家女仔之家就唔好成日同人攬頭攬頸啦，
咁樣好易蝕底比人架。」老豆咳左兩聲，透返順條氣之後講。
「...咩喎...女攬老豆有咩所謂喎。」我講。
「...子欣...老豆一把年紀受唔到依啲刺激架...
你而家亭亭玉立咁....都係唔好刺激老豆好啲...。」老豆講。
「...嗯...。」我點一點頭。
「…由其是...頭先果個𡃁仔，你知唔知呀...頭先見到你兩個咁親熱...
老豆真係火都離架...。」老豆越講越嬲咁。
「...老豆呀...我同一軍佢經歷左好多野架啦...佢仲...連死都唔怕咁...
救過我添。」我越講就越細聲...講到面紅紅咁。
「…唉...我唔知咁多啦...，仲有呀...，頭先我返離果陣...
點解度門會反鎖左架?仲有個死𡃁仔點解會個頭濕哂咁行出離開門，
而你又喺浴室沖緊涼嘅?」死啦...老豆講講吓...又諗返起頭先同一軍一齊沖涼單野添...點算呀。