【中學時期，我竟然被一個女仔改變晒】: 九、水運會
九、水運會
統一測驗已經輕輕鬆鬆咁完左，當中Joyce都有不停搵我一齊溫書，雖然係超悶超悶，但為左追女神…冇計啦……
我地學校有個傳統，好中意喺考試或測驗後先有水運會，陸運會，旅行等等。黎緊就有個水運會啦，我地校係分社黎計分，所以唔少社幹事都會喺臨近水運（即係呢家）搵多啲人去參加。見着啲高From幹事好急咁搵人真係覺得好好笑，就好似見着啲保險佬跑數咁。
「唔該我想問下白頌鏗喺唔喺到？」有個高From由走廊既窗邊探碘入黎問。
而我正正就係白頌鏗，我出名運動白痴黎，全校都知，但點解會依然搵我參加水運會？全校都知我係運動白痴既原因係因為中二有次體育堂考試，咁啱體育堂之後就係小息。一班八掛既師兄、師弟都會紛紛趁我地未完考試果時黎食花生。我因為考左五次都依然唔合格籃球呢個項目，因此體育阿Sir當眾叫我做運動白痴。
講番正題。
「呢到無人叫白頌鏗喎。」我疑惑咁講，因為我知一定唔係咩好事，所以我唔會咁快應自己就係白頌鏗。
「你！出黎啦！」高From指着我講。
「我？我都話呢到無人叫白頌鏗咯。」
「唔洗抄啦你望下你後面啲人。」高From笑說。
我隨後望一望後面，見到班房每一個人都指着我，你班友有冇咁憎我呀，我又冇做錯野。
「出黎啦，唔洗扮啦。」
「得啦，咩事呀。」唔知點解呢個高From由一開始搵我就一面嚴肅到呢家。
「你就係白頌鏗啦？」佢指着我講。
「唔係我又點會出黎呀？你唔好挽啦。」我插袋笑說。
「估唔到你都幾串。拿，唔好講咁多。你以後唔該唔好同顏雪靈行得咁埋，如果唔係…」「唔係點呀？」
「後果自負！！！」
佢講完呢句就走左，我冇追上去，因為佢嗌完「後果自負」之後，我被佢嚇親，我心諗︰聾啦仆街！不過佢做既野已經被我知佢係邊個，一定係Joyce之前講過佢男朋友會搵人搞果啲同Joyce行到埋既男仔，而佢一定係Joyce男朋友既手下。
Joyce見到我企左喺度，就行左過黎。
「做咩企左喺度呀？」睇黎佢唔知啱啱既事，不過我都唔打算話佢知，費事佢擔心。
「冇呀，入面太焗啦，所以咪出黎吸下新鮮空氣，睇下人打波囉。」
「開左冷氣都焗咩？而且依家仲有人打波咩？」唔記得左入面開左冷氣，同埋就黎打鐘，所以冇人打波…
「咪係囉，呢個冷氣都唔知點搞架。開左都係咁焗。」「係咩？都唔係好焗呀。」「唉，你唔明架啦，你呢啲後生女快啲番班房啦。上堂啦。」
就係咁，我就好似收左個Warning letter咁，個情況就好似被老師發現左你做衰野，但佢又冇罰你，只係警告左你幾句就走。不過唔同既係如果你再被老師發現左，你最多被人記下缺點，大過果啲。但我相信如果我再被啲高From發現我同Joyce行得太埋既話，應該會被人打一獲金，所以我都係決定同Joyce保持番啲距離。
「喂，你呢幾日做咩唔搵我呀？」Joyce喺Whatsapp問我。
「冇呀，呢排忙呀嘛。」我回應。
「扮咩呀你，你係咪識左第二個女仔。」
小姐其實講真果句，我同你又未拍拖，點解你講到好似一齊左咁…
「冇呀，我溫緊英文囉。」
「溫咩英文呀，都考完試啦。」附帶兩個憤怒既emoji。
「考完唔可以溫架咩，你搵過男朋友傾啦，我唔得閒呀。」
「佢喺度我就唔洗搵你啦！ON99架你。」咁依家即係點？你當我自動入左伍？
「唉，你唔好咩都黎煩我啦，你收兵去第二度。」講真我就算幾中意你，我都唔會做你隻兵。
「咁好啦…Sorry呀。」附上兩個喊既emoji。
我都冇再覆佢，其實我乜都冇做，開Youtube，上高登睇人地感情問題。然後佢一日一日搵我，而我一日一日咁唔理佢，唔知點解突然對佢好反感，覺得女神咪又係要兵仔既貢獻，冇既話，同廢青都冇咩分別。
慢慢去到水運會呢個大日子。我同留班後既朋友都唔係同一個社，得番自己一個孤伶伶，不過唔知點解喺入去觀眾席前識到個新朋友，人地都叫佢做肥仔坡，其實佢都唔算太肥，只係微胖身型。
跟着肥仔坡入到去一齊坐，啱啱坐低就有幾條女搵佢吹水，又唔怪得既，佢份人又幾好傾，連我啱啱識佢都覺得佢好似咩都傾到咁，囡囡，學業都傾到。
「喂肥仔坡，你既朋友？」一個戴眼鏡，包包面既女仔指着我問到。
「係呀，啱啱識架，喂，自我介紹下啦。」肥仔坡拍拍我膊頭。
「Hello，大家好呀，叫我小白得啦，今年先留班落黎。」
「你就係果個咩洪學智呀？」包包女孩問道，而佢口中既洪學智即係大智。
「乜你覺得我個名有個智字咩？」我笑說。
「又好似無喎…咁你全名係咩呀？」佢傻笑着。
「你做咩咁想我知我既野？」
「冇呀，咁識新朋友都要知名架，加上想知你個名就等於好想知你啲野咩？」佢得戚笑着。
「咁想知我個名咩？我係唔比你知呀。」其實我Feel到佢啲朋友用緊某種眼光望着我地。
「喂，唔好咁衰啦。」講完之後佢坐左去我隔離。
「你講左先啦，你唔講我唔會講架。」我地好似完全無視左其他人。
「你唔講左先，我都唔會講！」佢谷起兩邊包包面。
「咁你咪唔好講，反正我最後一定會知。」輪到我得戚咁笑啦。
「你都唔好講呀，我點都會知。」佢另過頭講。
「傾第二啲野啦，好唔好？」我拍拍佢背脊。
「好呀，你想傾咩？」
隨後，我地開始咩都傾，傾下啲人游水，遇溺等等，由大大聲傾，傾到被老師話，之後細細聲傾，直到佢啲朋友話佢「有異性，冇人性」，佢先番佢本身個位坐，不過佢番到去都已經就黎完結水運會。唔知點解，同佢傾計好舒服，冇同Joyce傾計果時既緊張，反而同呢個包包面女孩一齊傾計果時真係好唔同。身為溝女魔人既我都未試過傾得咁舒服，咁開心。
完左水運會之後，我本來打算去啲商場行下就番去。點知一出室內游泳池門口……
「喂！你去邊呀？」包包面女孩問道。
「我呀，我想行下街咁啦。你呢？」
說罷，我見到一對我唔想見既情侶……Joyce同佢男朋友正正喺我面前拖着手咁出現。
「Hi，呢個我男朋友呀。」Joyce指着佢身邊既男人。
「你好，初次見面…幸會…」我帶着尷尬咁講，話晒之前一直咁「照顧」佢女朋友…
「咦，呢個係……」Joyce指着包包面女孩道。
我可以點解釋？新朋友？女朋友？我都唔知，不過我就好想叫佢做女朋友。
「我？我咪小白既女朋友囉。」包包面女孩帶着怕醜既語氣講。
「你係佢女朋友？」Joyce好驚訝咁講。
「係呀，喂傻婆呢家去邊好呀？」我Mit着佢塊包包面咁講。
「你中意啦。有你既話，去邊度都得啦。」佢又Mit番我轉頭。
「咁去食野好唔好？食完再送你番屋企啦傻婆。」我由心而發咁笑說。
「好呀，行啦我要食炸雞。」佢摟着我左手手臂講。
「好啦，見咁耐冇同你食，就同你食豪大大啦。」
「咦，你兩個做咩唔行既。」我望着Joyce同佢男朋友。
「行啦，BB我地都去拍拖啦。」佢男朋友拖着Joyce就走左，但我卻見到Joyce向我投出一個求救既眼神。
果一刻，我成個人呆左，我到底應該點做？坦白個真相講出黎？尤得佢被佢男朋友拉走？我真係唔知點揀，正當我陷於思考之中既時候。
「喂，人地都走左啦，你仲諗咩呀？」包包面女孩問。
「啱啱唔該你喎…你想我點報答番你？」
「唔洗啦，好少事啫。」
「要既，唔少事架，講啦，你想我點報答你呀？」
「你啱啱係咪話陪我食野，之後陪我番去既，係咪真架？」
「係呀，你唔介意你身邊有我就得啦。」
「點會介意呀，拿，你陪我食野就算啦，送我番去就免啦。我住好遠架。」
「冇所謂啦。我大把時間，送你番去都唔係咩問題。」
「咁呀…咁…好啦……」
之後我地就一齊食豪大大既炸雞，我開頭只係估下佢會中意食豪大大既炸雞，點知又比我估中左，真好笑。然後我又送左果個女仔番去，佢原來住喺屯門，都真係幾遠下，不過車途上有佢不停陪我傾計，我先冇咁悶。
「喂到底你叫咩名啫。」佢問道。
「你真係想知？」說罷我就從銀包入面攞左張身份證出黎。
「你叫……白頌堅？哈哈哈，你個名咁搞笑既。」佢大笑道。
「唔係堅呀，係鏗呀，鏗鏘集個鏗呀。」我扮嬲咁講。
「對唔住呀。因為你個名讀錯既話真係好好笑。哈哈哈哈！」佢依舊大笑着。
「咁你呢，叫咩名呀？」我問道。
「我叫許萌慧呀，叫我全名都得架。」佢上氣唔接下氣咁講，睇黎仲笑緊我個名。
不久後我地就落車，臨落車前我仲講左幾個笑話比佢聽，我Feel到其他乘客係咁望過黎。我本來想阻止佢繼續笑，但見佢笑得咁開心，我又唔爭氣咁一齊笑。
「呼呼，喂我送你搭車番荃灣啦。」
「好呀，麻煩晒你啦。」
「哈哈！唔麻煩。」
「真係咁笑咩？」聽到佢既笑聲，我既嘴角都不禁失守。
「你唔覺好笑，咁你又笑！」佢笑到
「我笑你笑咋嘛，白痴。」
「有車啦你上車啦，小白…痴。」佢望着我講。
「喂，比你手機我先啦，我好似唔見左我部手機，我想借你果部黎打比自己，睇下會唔會漏左喺啱啱架車度。」我不停咁搵書包同褲袋。
「乜咁唔小心呀，快啲打啦。」佢一面擔心咁比部手機我。我想像到如果我地一齊左佢一定會仲擔心。
我接過手機後就開始打比自己。其實我根本冇唔見手機，我只係想攞佢手機號碼。
「搵到啦！」我扮到好開心咁從我書包暗格度攞出手機。
「咁都好啲。唉也，架車走左啦…又要等下一班啦…」佢遺憾道。
「冇所謂啦，不如我送你番上去先啦。」皆因我見到佢好似企唔定咁，不停轉姿勢去企，大概係陪我等車等到攰啦。
「吓，但你會唔會唔識番黎呢度搭車架…」佢疑惑咁問。
「唔會！我個腦裝左地圖架，行啦。」隨後就拉着佢走，行多幾步先發覺我唔識路，所以都係由佢帶路。
冇幾耐佢就帶左我去商場再左兜右兜，先到佢屋企樓下。好彩我都有認下路，如果唔係我真係會盪失路。
「我到啦。」佢低頭，有啲唔開心說道。
「你屋企都好似幾有錢下…」
「一般啦…上面其實唔係好大架咋。」
「哦…喂，咁我走啦…」
「要唔要送你番落去呀…」佢低頭說道。呢句說話換做係其他人講一定帶有諷刺既意味，但點睇佢都係似尷尬多啲。
「唔洗啦，你上到黎又做咩又要落番去呢？我自己識去搭車架啦。放心啦。」我微笑說。
「咁……咁好啦…」佢聽到我既笑聲，個人都抬番起頭，好似開心番咁。
「咁我走啦…拜拜許萌慧。」我向佢揮手。
「嗯，你快啲走啦，白頌堅！哈哈哈！」佢又笑我個名……
就這樣，我冇幾耐就番到屋企，唔知點解一番到去就好想同許萌慧講我到左屋企。我有時會諗起其實識左佢一日啫，點解會好似一見如故咁，對佢既感覺亦都唔同對住Joyce咁。許萌慧笑我，我不但冇尷尬既感覺，反而覺得開心，好開心，就好似同佢熱戀緊一樣，種感覺真係好特別，我一直都忘記唔到。成晚我就喺度煩惱緊許萌慧同Joyce既事，冇幾耐…我又訓着左……