【中學時期，我竟然被一個女仔改變晒】: 八、測前溫習
八、測前溫習
果件事都過左成個月，我依舊咩事都無。其實我都唔知佢有無同佢男朋友講果件事，不過我又無問，費事佢一記起就同佢男朋友講。
「黎緊十月份會有個統一測驗，各位比心機溫書啦。」班主任朱仔說道。
「屌，我唔撚想溫書呀…好撚系煩呀……」講野果個係中一果時同佢同班過，但佢留左班既小帥哥，佢叫蔡俊杰。
「唔想溫都要溫架啦，喺呢班邊個真係想讀死一世書呀。」呢家講緊野既係一個叫黃皓志既男仔，人矮矮，但講野好大聲。隨後佢喺櫃桶度攞左本物理書出黎，打開光譜一課，然後不停溫書。
「唉，溫書呢家野真係唔好搞我…我訓陣先吓。」一個戴住粗框眼鏡、滿面暗瘡既男仔說道。佢叫阮梓灃，係班會主席。一早已經計劃左自己既未來，幸好佢既未來唔需要讀太多書，所以好多時間比佢訓。
然後仲有三個攞着幾本愛情小說喺度煲既男仔，全班得呢三個會喺早會時間睇課外書。無錯啦，呢三個人就係肥源、大智、我啦。
肥源屋企人一直都有錢比佢去補下習，所以佢可以唔洗喺早會時間溫書都有中規中距既成績﹔而大智就一向都唔溫書，睇黎佢留左班都真係唔怕成績唔好﹔而我？我喺太多人既地方係溫唔到書，可能仲會將以前學既野都忘記埋，所以我習慣喺又少人又靜既地方溫書。
「你呢家讀書好叻咩？」朱仔指着攞着由孔明巴打所寫既《我將一位宅女變成女神，然後我再變成佢隻兵》既我。
「唉，得啦。溫書嘛，番到屋企先啦。」我緊握書既兩邊，因為我正正睇到阿明點樣教阿靜衣着既一部份。我成日都覺得用衣着改變一個人，真係好神奇。
「咁好呀，我呢家就考下你！」朱仔道。
「等等，係咪我識答你既問題就可以睇落去先？」我合上書本。
「你識既話，今日就係。」朱仔話。
「咁你咪黎囉，我實識架。」我雙手插着褲袋說。
「我問你，講出一種微波既作用。」朱仔順手攞起黃皓志本物理書，以免佢幫我出貓。
「微波咪用黎加熱野食囉，咁簡單！」阿SIR你問錯人啦！我未留班果時，全班得我一個物理合格咋。
「講清楚啲！如果唔係我唔明你講咩！」朱仔不忿地說道。
「阿SIR，你邊隻字唔明呀？我逐個逐個字解比你聽好唔好？」我帶笑說道。
「你態度好差喎！信唔信我今年操行比個E你呀！」朱仔氣憤說道。
「車！下下都挽操行分既，唔同你挽啦。」我別過頭說。
「邊個同你挽呀！認真答我。」朱仔話。
「微波可以用喺加熱食物。」講完我Feel到佢已經想屌我。
「微波爐會以頻率為2450MHz既微波對食物加熱。游離既水分子既吸收峰大概係22GHz左右，差唔多係微波爐頻率既10倍咁多。凝聚態既水會由於分子間作用有較寬既吸收帶，令它可以加熱。」我滿面囂張咁回應佢「要唔要我講埋個原理比你知呀？」
「算啦。拿，今次就放過你。下次唔好啦。」朱仔不忿咁講。
至於肥源同大智我就幫唔到佢地啦。搞到佢地被人沒收左本《出軌敢死隊》、《分手寄賣店》。
話說，上面介紹既蔡俊杰、黃皓志、阮梓灃都係我留班後既好朋友，再加上肥源、大智，我地六個就成日咁樣圍威喂。
放學之後，大智同肥源因為要攞番兩本小說，所以要被人罰留堂。得番我一個，我見英文上真係有啲唔得，所以我決定要留喺學校悪補下英文。不過因為臨近統測，學校既溫習室一早已經被學霸霸晒。啲學霸又係既，讀書都被你地霸晒啦，呢家連位都同我爭？有無小器啲呀。
想溫書但又無門既我，唯有偷偷地去用一啲未被校工鎖上既班房。行左幾層，差唔多都被校工鎖晒。點知見到3C班既門係半掩，即係話3C班班房可以比我溫書。
打開房門，冷氣就湧晒出黎。一打開燈就見到窗口旁既座位放住一個紫色既書包，有點眼熟。紫色底、細細粒既白色波點既書包，真係好似曾經見過，但又唔記得喺邊度見過。不過算啦，可能睇錯，所以我隨隨便便就搵左個角落位坐低溫書。甫打開英文書，班房門被打開了。我終於知道紫色書包既主人係邊個。果然係……Joyce。
「咦，點解你會喺度既？」Joyce邊關門邊說。
「無呀，我以為呢個課室無人用咪打算喺度溫下英文囉，我英文好差架。」說完隨後我就合埋英文書。
「哦…喂，我英文OK架喎。要唔要教下你呀？」Joyce坐喺我前面個位問我。
「唔洗啦，你連A For咩既英文都唔知啦！」我笑說。
「咩呀！A咪For Apple囉！」Joyce鼓起兩邊面頰。
「咁你咪錯囉！」
「咁係咩呀？」她好奇地問着。
「或者你係岩既，不過岩都係之前既事。」「即係點呀？」
「我識你之前真係A For Apple，不過識左你之後就係……」
「就係咩呀？」佢成個人褪前左。
「就係…A For Angel……」我講果時仲用我對眼電佢。我有個花名叫發電廠，係女都會被我電到暈。
果不其然，佢聽到之後，成塊面都紅晒。但我無再進攻，佢都無出聲…個氣氛真係好尷尬，我心諗：唔通女神可以免疫電力攻擊？無理由呀，佢紅都面晒。為左令氣氛唔好再咁尷尬，我決定用一樣野打破Dead Air—食野。
「喂，肚唔肚餓呀？去唔去食野呀？」
「唔…唔……唔啦，我飽啦。」睇黎佢仲未怕醜完。
「咁陪我食都好呀，行啦。」隨後我拉住佢隻手走出班房。
中學生食下午茶咪又係茶餐廳…不過話晒都係同女仔食，食高級都應該，所以我帶左佢去食美國餐廳—McDonald’s。
飢腸轆轆的我秒速對櫃台點餐「唔該我想要個『雙層芝士孖堡』，可樂走冰，加大，再加個麥旋風，要聰明豆，喺度食。快！」
隨便選了個位置就坐下來，剛坐下來，就把麥旋風比左佢。佢一直都話好飽，唔想食。但最後都係被我說服左。
「我好飽呀，啱啱食左野啦。」
「唔食即係唔比面我。食唔食？」
「食囉食囉！」
「我特登嗌聰明豆比你架。」
「點解呀？」佢一邊講一邊食，食到嘴邊全部都係雪糕。
「鬼叫你唔夠聰明咩？食番啲聰明豆補番啦。睇下你，食到成嘴都係，唔好再論盡啲！」我邊講邊用紙巾幫佢抹嘴。
「你咪一樣！」佢指着我嘴邊既茄汁，哈哈大笑。
小姐呀，你搞到我好尷尬呀。隨後，我都抹左嘴邊既茄汁。
「其實我聰明過你囉。」佢話。
「何以見得呀小姐。」「我英文不知幾好呀。」「英文好就代表聰明過我？你連我英文名都唔識讀呀！」「係喎，你英文名係咩呀？」「REGULUS，點呀？唔識呀？」「吓，好易咋喎。Regulus囉。」
「你又真係識讀喎…」睇黎佢英文真係唔錯，因為好多人都唔識我英文名，所以我成日都以呢樣野笑人…
「我英文叻開架喎，要唔要我教你呀？」「好呀，我等你咋，得就快啲番去一齊溫英文啦。」
說罷，我地就一齊步行番學校一齊溫英文。我原以為可以同佢多啲互動，點知佢真係好認真咁教我英文…當然都有少少唔專心既時候既，不過唔專心既時候都係同佢男朋友Whatsapp既時候。果晚好悶咁就完左……有時我會諗，佢係咪真係適合我。但我次次都同自己講，佢係女神，唔好理啱唔啱你啦，追左先講啦，但有時都會覺我咁諗係咪真係好……