媾女啫....唔洗咁呀: 再遇
眼前有一班女仔，其中拎住好大袋野飲𠴱個係柒頭杰條女紫螢，旁邊企得最靠近𠴱個就係我曾經無珍惜過既女仔....
呢一刻我真係無幻想過可以見返佢、我腦海中秒速回憶同佢發生過所有既事，一點一滴咁浮現出黎，喜與悲，樂與痛，哀與怒，如同蠻牛直衝心臟，我控制唔到自己，個刻既感受只係諗起一首歌可以表達。
「都怪我
不該沉默時沉默 該勇敢時軟弱
如果不是我 誤會自己灑脫 讓我們難過
可當初的你 和現在的我 假如重來過」
單單係林俊杰既「可惜沒如果」呢四句歌詞就可以代表我依家呢一刻既心情、當初既你遇到現在既我莫非真係可以重頭再黎過？
「喂！柏軒你做咩又發閪呆呀，過黎喇介紹條女比你識!」
「嗯！」
「喂！呢個就係我同你講話介紹比你識個個柏軒呀！佢叫阿曚你地自己識下喇，好口喝呀。」之後就衝左去紫螢身邊拎野飲，留底我對住佢...
我心裏面有無限咁多句之前無機會講既野想同佢講，但係而家我知道佢根本唔知我係邊個亦唔會對我有任何感覺住，我唯有扮下一無所知
「hey...我叫柏軒你可以叫我軒仔！」
「我叫呀曚....」
雖則要扮低能係好痛苦既事，但要係一個清楚到對方撩鼻屎用邊隻手指都知既情況下再媾佢根本係易如反掌...
「係呢...你信唔信我有超能力？我掂一掂你頭就知你諗緊乜，掂你個嘴就知你食過乜，掂你隻手就知你做摸過乜...」
「唔信！」
「真係唔信？你試下攞隻手出黎！」
佢伸左隻纖細而又白滑既手出黎「嗱！」
「咁我唔客氣啦喎.....嗯...你之前摸過...嗯...」
佢塊面完全出賣左佢期待答案既表情
「喂呀...摸過咩呀？」
我隨即收返隻手扮哂諗野咁，實質係諗緊點樣整蠱佢，整蠱自己鍾意既女仔相信都係大部份男生既一大樂事。
「你最近個次摸過...係我隻手..哈哈」
佢知道比我整蠱左就用手猛擊我手臂，可惜佢一個弱質纖纖既軀殼，殺傷力可想而知大極有譜。
望住佢呢一刻最單純既面貌，感受佢打我既每一下，我清楚知道我處於現在係真實的，我對自己講：我唔可以再辜負佢，因應佢曾經為我付出過太多...太多..
「好啦好啦..我真係有超能力㗎，試下比多次機會我，今次我掂你個頭，你諗下你自己一個唔想比人知既秘密...」
「唔信呀..又想整蠱我既，邊有可能會知，唔信 ！唔信呀！」
「黎啦...試多次又唔會少忽肉...嗱！我比十秒你諗」
雖然佢一副唔情願既表情咁，但係始終都受唔到好奇心既誘惑
「諗好啦！」
我慢慢伸出手用手掌輕輕上下摸佢個頭，呢個動作係好耐之前最鍾意我對佢做既動佢之一，佢話因應我隻手夠大好舒服....
經過我撫摸一陣佢個頭，已經發意佢開始鬆懈，咁我當然要繼續扮哂野咁啦
「嘩！叫你諗一個...你諗咗咁多個既..你都幾多秘密喎...嗯..偷呀爸剃鬚刀刮腳毛呢個唔係最秘密既...」
當我講到呢度既時候見到佢瞪大對眼用一個好不可思議既表情望住我，我心諗當年你連你痾左咩型狀咩顏色既屎都話我知，我仲會唔知你有咩秘密咩。
「嗯...搵到啦！你最唔想比人知既秘密係...」
我伸個頭係佢耳仔邊細細聲講
「你7歲𠴱年曾經比uncle Wong 差啲性侵過，uncle Wong 係你爸爸生意上既拍檔，當時你媽媽及時發現阻止，之後叫你唔好講出去以免影響你爸爸生意...所以呢件事應該剩係得你同你媽媽知，係咪？」
佢呆左咁望住我，隔左5秒左右先慢慢吐出幾個字
「你...點會...知㗎....」
「我都話我有超能力㗎啦...係你唔信我啫，放心喎..個天好公平，我仲有個金魚腦平衡返我個超能力，過十秒我就乜都唔記得，所以唔洗驚我會講出去....哈哈」
一個充滿疑惑既眼神...
「你...你真係有超能力！？」
「唔知呢！？」
係呢刻呀曚佢由充滿好奇既眼入面帶著一點紅光，好似就快要落雨咁、冇錯呢個就係初初既佢、一個好易因為一啲好小既事可以大笑同大喊既女仔！
「嘩！柏軒你做乜整濕呀曚呀？」
「我邊有整濕佢呀？」
「你睇佢隻眼濕哂啦、你仲話你無整濕佢，第一次見面就整濕人！你都算勁！」
柒頭杰講完呢句野之後，見到呀曚紅都面哂
「你講咩野呀？」
「無呀！話你隻眼濕哂渣嗎！」
不知不覺我地成班以經忘記左時間既存在、嘻嘻哈哈又一日，天色慢慢變沈、落日就好似霧燈咁紅紅橙橙！柒頭杰用好淫賤既眼神望住我！
「柏軒你轉頭會送人地返屋企架可？」
「吓！送邊個返屋企呀？」
「緊係呀曚喇，傻鳩！」
係我記憶中呀曚同我住既地方好近差兩個站。
「呀曚同你住好近架渣又同一架車、你咪當做下善事送埋人地返去囉！
「無喇喇送人地返屋企做咩呀？」
「你想做咩先..嘻嘻！？」
「我先無你咁淫賤！啱啱識咗無耐就送人地返屋企好奇怪架喎」
「唔洗驚！我幫你喎！！」
柒頭杰講完呢句之後說好大聲咁嗌
「呀曚！呀曚呀！柏軒話想送你返屋企、佢怕你一個人返去有危險喎！」
「吓...唔洗喇、我自已返得喇！」
「千奇唔好唔洗呀，順路渣嗎，反正佢都係坐個架車、多個人陪好過自己返屋企喇、係咪先？！」
之後個柒頭杰細細聲扮哂神秘咁同我講
「行喇仆街！仲等咩呀、比哂機會你喇、上喇老朋、聽日見！」
就係咁...神推鬼擁就同左佢一齊行去坐巴士返去！我十年前係咁識佢既咩？我真係唔記！我只係記得係柒頭杰啲朋友！乜原來我個時既初戀係佢一手撮合㗎⋯⋯
係呢一段短短既路途令我諗起同佢一齊既時光、回憶總是令人痛快，但依家既我係幻想定係真實，我真係唔想再分清楚、我只係知而家個天可能比多一次機會我！究竟會係重蹈覆轍，定係重新開始？