【夢幻】《我從來冇諗過我會有咁正既女朋友》: 【大結局】唯獨你那記憶永存未毀
【大結局】
「你究竟起道講乜啊！我警告你唔好再亂講，你唔好以為你係女人我就唔打你。成大個仲成企起我隔離你都夠膽死話佢死左！」
志威聽到漫淇佢咁講開始成個人失哂控勁大聲講野，同我頭先既情況一模一樣。
「呢個時空既李仲成的確係起佢撞車既時候已經死左。
而企係你旁邊既「李仲成」，佢本身係生活起另一個平行時空。
當你接聽到醫院電話 話李仲成入左醫院直到你去醫院見到昏迷緊既「李仲成」果一刻，佢已經唔係呢個時空既李仲成。」
「你可以選擇唔相信我所講既說話，但呢個係千真萬確既事實。」
漫淇冇因為志威既失控行為而暫停佢想講既說話，反而係一直咁講落去。
志威聽到漫淇再次解釋之後突然之間情緒變化得好快...
由好憤怒轉變成.....哀傷...
「呢個時空既仲成....已經死左…唔會架...佢唔會死左架...」志威成個人跪低左起地下痛哭...呢次都係我咁耐以黎....第一次見到志威佢喊
點解成件事最後會發展成咁.....
呢個時空既李仲成已經死左…
而我李仲成真正既女朋友而家係起醫院昏迷緊....
呢個時空既敏兒佢亦都係我女朋友....
我同敏兒一齊既感覺都好真實...
我地之間既愛都係真實存在，不虛不假！
但起夢中既「敏兒」先係我一開始最愛既人...
如果唔係因為未識敏兒之前...
已經起夢中夢見過同「敏兒」之前既回憶另我有一種咁熟悉既感覺...
我又會唔會鍾意又或者主動去追求而家呢一個敏兒呢...
我真係唔知道....
同呢兩個敏兒...一齊既時光都係好幸福....
我而家應該要點做....
眼前既志威重係跪左起地下喊緊....
而漫淇佢就坐左起道...一聲不發咁望住電話中佢同敏兒既合照...
所有事情都太過突然....我個腦根本就運轉唔到...
只係一片空白....
我而家連想喊想逃走既衝動都冇...只係成個人呆左咁企起道...
鈴..鈴…鈴…鈴
聲音來源係由漫淇既電話發出....
漫淇望一望電話顯示既來電者，再展示比我睇。
原來係敏兒打電話黎比漫淇...
「唔好聽...我而家未諗到應該點做好...我唔識面對佢..」我用低沉既聲線講出呢一句說話
「你想唔想返去原本既時空...」漫淇用黯然神傷既眼神望住我....
而起同一個時間...志威亦比漫淇既說話吸引住，擰轉頭，望左過黎。
「我...唔知道...」我用沙啞既聲線回應漫淇所問既問題....
「而家唔知道唔緊要...你重有三日時間考慮。」
我重有三日時間去考慮...即係咩意思....
「今日係二零一六年既二月二十六日。如果你想返去原本屬於你既時空，你只可以起四年先有一次既閏年選擇返唔返去。即係今年既二月二十九日，亦係三日之後。
我唔識點同你解釋會係2月29號...
我既直覺話比我知係呢一日...
自從我黎左呢個平衡時空之後
我既直覺就一直都好準....
加上呢一日係四年先得一次既「閏日」..
總之你要相信我....
但當你選擇左返去原本既平行時空之後...你就呢一世都唔會再返到黎呢個平行時空。
就算你起四年之後既「閏日」再嘗試穿梭，都未必會成功。
如果真係咁好彩比你成功左再次穿梭時空....都一定唔會係去返呢個平行時空。
正如同樣道理，如果三日之後你選擇左留起呢一個時空生活，四年之後既「閏日」再嘗試穿梭就算比你成功左，都唔會係返到去原本屬於你既時空。」
「如果你選擇返去的話...我係唔可以同你一齊返去...
因為當我同你架車相撞既一刻，我起原本屬於我既時空已經死左。
所以我唔可以選擇返去....如果我強行要返去的話，最後個結果都只會係一個安葬左起墳墓入面既死人。
但係你同我唔同...
你黎左呢個平行時空之後就失去哂記憶...咁既情況應該係因為只係你既靈魂離開左本身既身體，但其實你係重未死。
所以你都重係有得去選擇....」
漫淇既意思即係話....我得返三日時間去決定所有野....
三日之後我就要選擇返唔返去原本屬於我既時空....
「仲成…唔好走啊…留起道...」志威再次開聲既第一句說話就係...叫我唔好走....
可能志威佢重未接受到...同佢由中學識到而家既死黨李仲成，一早已經因為撞車意外死左既呢一個事實。
「其實起另一個平行時空，「黃志威」係你既上司，你一直都好唔鍾意佢...
因為你覺得佢係單憑靠「人際關係」上位先至會做到你上司，所以你對佢一直都好反感。
但我都估唔到起呢一個時空既你地，會係一齊共患難既死黨。」
漫淇望住我眼前既志威用一個感慨既語氣講出呢一番說話
好快...因為打開左對門既關係...我聽到有好急速既腳步聲行緊入黎會議室...
好快...我既眼前就出現左一個人....
而呢個人...
正正就係敏兒....
「漫淇…仲成….你地兩個起道做咩啊..?」
志威...點解你又會跪左起道既...?」敏兒用一個好震驚既眼神望住我地...
「你地三個做咩喊哂啊….究竟發生咩事...」我地冇一個人望住敏兒亦都冇人比任何回應佢
「漫淇發生咩事啊….你地搵人應下我啦..」敏兒表露出一個愁眉苦臉既表情加用一個好驚訝既語氣
「仲成..我覺得敏兒有權知道成件事情既真相。」漫淇佢用一個空洞既眼神望住我講。
… 呢一刻既我...重係好混亂...
所以我亦都冇回答到漫淇既問題..
「敏兒...我想同你講成件事情既發生...但你要應承我...而家平靜返落黎先....」漫淇佢用低沈既聲線講出呢一句說話
敏兒佢點點頭，示意漫淇可以繼續講落去。
「其實仲成佢...」
「唔好講啊…我未準備好面對佢...」我用好大聲既聲線叫停漫淇..
當敏兒聽到我咁大聲叫停漫淇...佢露出一個好呆滯既神情...
講完呢句說話之後，我就沖左出門口。
「仲成，你去邊啊！」敏兒跟住我追左出黎，佢一手拉住我。
「唔好走啊..仲成..求下你唔好再掉低我一個...」敏兒佢拉著我件衫既手袖...一邊喊一邊苦求叫我唔好走....
起呢一刻，望住眼前既敏兒...
我個心好痛...好痛...
我終於明白咩叫「心如刀割」的痛...
我曾經同自己講過...
唔會比敏兒再受傷害...要好好保護佢愛錫佢...但偏偏傷得佢最深既人...
就係我，李仲成...
但如果我呢一刻攬住敏兒...我又點對得住訓起醫院昏迷緊「敏兒」...
佢先係我真正既「初戀」女朋友...
當「敏兒」自己訓左起張冰冷既病床上既時候....
我就去左同呢個時空既敏兒拍拖...重要過得咁幸福快樂...
雖然當時既我根本唔知道發生咩事，但係而家我已經知道左...
我唔可以再好似之前咁..講埋哂啲咩「活在當下」既廢話...
「對唔住...」我「甩」開左敏兒隻手，之後就頭也不回咁向前跑...
一直跑...直到跑到冇左敏兒蹤影既地方
我想問個天....我李仲成前世究竟做錯啲咩...
今世要咁玩我….
我向住個天失哂常性咁大嗌...
「我好好玩咩而家....」跟住就成個人跪左落地下...
我已經唔想再企返起身喇...我已經好攰喇....
呢個可唔可以係一場夢....
一場只要訓醒就會完結既夢....
天開始光喇....我已經唔知自己跪左起道幾耐....
我只係知道...
我淨返兩日時間去決定....
敏兒...我好掛住你啊…
但起呢一刻...我已經分唔清楚...我係掛住邊一個敏兒....
妳說把愛漸漸放下會走更遠 又何必去改變 已錯過的時間
妳用妳的指尖阻止我說再見 想像妳在身邊 在完全失去之前
或許命運的籤 只讓我們遇見
只讓我們相戀這一季的秋天 飄落後才發現 這幸福的碎片
要我怎麼撿 https://www.youtube.com/watch?v=uIWypArI73w 「飄落後才發現 這幸福的碎片
要我怎麼撿.... 」
周杰倫既呢一首－ 不能說的秘密
係唔係講緊我同「敏兒」既故事.....
最後…我帶着身體嘅軀殼返到屋企....
返到屋企既我...已經「身心疲倦」...只係想好好咁訓一教....
或者呢一刻既我...重呃緊自己....呢個只係一場夢....
訓醒之後就會「一天都光哂」既一場夢...
但我又點會估到...
我真係起夢中發左一場「夢」...
「都叫你唔洗日日放工都黎醫院探我架啦...你放工都已經咁攰重要成日趕過黎探我....仲成你放心啦...我昏迷左咁耐我唔會再
訓架喇..
訓左咁耐真係成身都腰酸骨痛，你可唔可以陪我出去行下！」
講呢番說話既人...正正就係我眼前既「敏兒」
「好啊…我陪你出去行下..」起夢入面我冇好激動咁攬住「敏兒」，好似一早已經知道佢醒返咁樣。
唔通呢個真係一個「夢」......
並唔係好似之前咁樣...只係我地之間既回憶...
我慢慢咁扶住敏兒落去下面既公園亭，之前就坐低左。
「一陣陣涼風吹埋黎真係好舒服啊！」「敏兒」吸左一大啖新鮮既空氣
「你記得起醫院到乖乖地接受康復治療，咁就可以快啲出院！到時我就帶你去行山遠足！香港有好多地方都好靚架！到時我地去齊哂每一個地方好冇？」我用誠懇既眼神望住「敏兒」講出呢番說話
「好啊！不過只要係同你一齊，我去邊都冇所謂！哈哈！」「敏兒」露出一個甜美笑容
呢一刻既我地，大家互相依靠住着對方，面上亦流露出幸福既神情，一齊享受呢個美好時刻。
我慢慢增開雙眼...「夢」始終會有完結既一日...
起「夢」入面，「敏兒」佢醒返...
我重應承左佢..會陪佢去齊哂香港每一個地方架....
但點解醒返之後，又會再係新一日既開始。
就好似呢件事一樣...我始終都係要面對 …
有完結，先會再有新既開始。
我訓醒之後望一望個鐘...而家已經係夜晚時間..
我已經成一日冇食過野..但我係完全冇食慾...
而家既我，只係想去飲酒。
我搭的士去左我同志威既「老地方」。
地點依舊係尖沙咀既一間樓上酒吧..
上到佢所有既員工、擺設都係冇變到...
唯一變左既係...
坐起我旁邊既再唔係志威....
而係我自己孤獨一人 ….
「阿成，今日點解得你一個既？志威個衰仔重未黎咩？」開聲既係一個我同志威都好熟既員工，佢叫銘仔。
我冇回答佢既提問...
只係用一個低沉既聲線講出左四個字....
「一打啤酒」。
當我飲第一支啤酒既時候係豪邁，而家既我只係想瘋狂隊酒。
當我飲第二支啤酒既時候係埋怨，我好埋怨個天點解要咁對我。
當我飲第三支啤酒既時候係憎恨，我好憎我自己傷害左好多人。
當我飲第四支啤酒既時候係痛心，當見到敏兒望住我喊既時候我個心真係好痛。
當我飲第五支啤酒既時候係哀傷，點解「敏兒」會昏迷左起醫院到，點解有病果個要係佢唔係其他人。
當我飲第六支啤酒既時候....志威就出現左起我眼前...
「志威...」我用沙啞既聲線同帶有呆滯凝定既眼神望住眼前既志威。
「做乜一個人黎飲酒都唔預埋我啊…」志威坐低左起我旁邊，搭住我既膊頭，就好似以前一樣咁。
志威而家呢個行為...同琴日簡直係完全兩個人...
點解佢可以起一夜之間心情平伏返哂...
「黎多一打啤酒」志威揮一揮手望住銘仔
「我琴晚成晚都冇訓，我一直起道諗返起我同仲成兩個之間既經歷。
一個只係屬於我同佢既回憶...」志威講完之後就連隊左三支啤酒。
「當日我聽到醫院電話，話仲成佢撞車入左廠。我成個人都震哂...
雖然我成日都笑鳩你毒，恥笑你無女。
但係...李仲成你係我黃志威呢一世人最好既朋友。
我呢一世人最好彩既事，除左係有個有米老豆之外，第二樣就係識左李仲成你呢個仆街仔。
但點解你要講都唔講撚聲就走啊屌！
我連你最後一面都見唔到啊…
直到而家冇啦啦有條友走出黎扮你...
又有人同我講你已經死左…但明明而家坐起我隔離既就係李仲成..
你地唔好再玩我啦...我已經好撚攰喇...
我求下你...我求下你同我講你就係果個同我中學一齊頹廢上堂，放學一打鐘就即刻走去網吧打機既毒撚李仲成啊…
好唔好啊….就算你唔係李仲成..你可唔可以留起道啊…我唔想再次冇左個好兄弟啊…最多我以後唔笑鳩你啦...你留起呢個時空好唔好啊…」
志威成個頭跪左起我膝頭上面喊...
志威明知佢個好兄弟李仲成已經死左….亦都知道左我係黎自另一個平行時空既「李仲成」....
佢而家只係同一個擁有李仲成軀殼既人講呢一番自白。
我相信...佢想對住講呢一番說話既人，並唔係我。
就算我明知佢唔係想同我講.....
呢一刻既我同志威都係一樣...
除左喊...我地兩個都係乜野都做唔到...
又或者，起「我」心中志威佢一直都係我好兄弟。
我永遠都唔會忘記我呢個時空既好兄弟，黃志威。
就係咁...我又過左一日...
當我訓醒既時候，今日已經係二月二十八日。
而聽日就會係四年一次既「閏日」，二月二十九日。
同之前都係一樣...每次同志威飲完酒都會返左自己既屋企。
我決定左...今日要搵既人...
係漫淇…
好快我就拎起左手上既電話打比漫淇..
「係我啊…我地可唔可以再約出黎見面。」我用平淡既聲線講出呢一句說話
「好啊…一陣見。」漫淇佢好快都答應左出黎同我見面
我地約左起旺角一間樓上cafe到見面。
我到左之後就揀左一個暗角位坐低，等待漫淇既出現。
好快漫淇就出現左起我眼前...
「我想問你最後一個問題...你話聽日係我唯一一次機會可以返去本身屬於我既時空，咁我點樣先可以返到去？」
「關於呢個問題，我結論出兩個答案。第一個答案就係，你再撞多一次車 。
我地兩個係因為兩架車相撞而進入左呢個平行時空，如果你再撞多一次車有機會就可以去返原本屬於你既時空。呢個答案
係我認為比較合邏輯，但我亦都唔可以百分百肯定。
因為由我地兩個架車相撞而進入左呢個時空既一刻，所有事情既發生已經係唔合邏輯。
第二個答案就係...去迪士尼樂園到玩多一次飛越太空山。
你之所以會記得返起我就係同你架車相撞既車主，就係因為你入左飛越太空山果個「黑洞」，我覺得呢個黑洞係一個關鍵
位令到你有機會返去原本既時空。」
漫淇一口氣講出左佢自己既見解。 「我明白喇...」我用一個平淡既語氣講出呢一句說話，同時我亦都相信漫淇所講既野會係真...因為我都有諗過呢兩個可能性。
「我琴晚發左一個「夢」，呢個真係一個「夢」。唔係好似之前咁全部都係同「敏兒」之間既「回憶」...我咁講係因為我夢
見「敏兒」佢醒返，而起夢入面既我見到「敏兒」醒返並冇好震驚同激動，就好似一早知道佢醒返一樣。
我重同佢一齊落左去醫院樓下既公園坐。
「敏兒」佢同我講起佢昏迷期間已經訓夠， 所以佢叫我唔洗擔心佢會再昏迷。
而起夢入面既我...向佢許下左一個承諾，話會帶佢去哂全香港既地方玩。
當我醒左起返身既時候我感到好空虛...
我問自己點解呢個夢境唔會好似之前咁，係我同「敏兒」之間經歷過既回憶...而真係只係一個「夢」...」
當我講呢番說話既時候..我已經冇再流下眼淚。
唔係因為我唔傷心，而係因為我呢二日已經喊得太多次，
我而家連想喊既眼淚都冇。
「所以...我決定左就算「敏兒」會唔會醒返都好，我都會起佢身邊陪伴住佢。呢一個係唔屬於我既時空，我唔應該留起呢到。我決定左要返去搵「敏兒」。」
我用一個好堅持既眼神望住漫淇講呢一番說話。 「仲成...點都好，我會尊重你既決定。
但如果「敏兒」醒返既話，你可唔可以幫我同佢講..
唔好因為我既死而傷心...因為而家既我過得好好。
你就同佢講，起天堂上面既「漫淇」一定會過得好幸福快樂，同埋我會一直好似小天使一樣守護着佢。我相信「敏兒」佢
一定會醒返架！」 漫淇再次留下眼淚，講到呢一番感人既說話。
「仲成…我並冇因為你令到我進入左呢個時空而怪責你...我相信呢一切一定都係上天既安排。
我長期都會有「偏頭痛」既習慣，每當我頭痛症發作既時候簡直係生不如死。醫生同我講係冇得醫，只可以用藥物減輕我既痛楚。
所以我架車長期都有好多止痛藥起道。果日我揸車去醫院探「敏兒」既時候，我感到好頭痛，所以我食多左份量既止痛丸。
如果當你返到去要負上法律責任既時候，你可以提出我係因為服用過量藥物而失控撞落你架車到呢一點。
但我既「頭痛症」起我黎左呢個時空之後好神奇地全癒。所以呢個絕對係天意，人永遠都係「有得必有失」。」
係因為我害到漫淇黎左呢一個佢完全唔熟悉既平行時空，佢不單止冇怪責我...
重擔心我會負上法律責任....
漫淇留意到我面上顯露出難受既表情，就再同我講話...
「我真係已經習慣左起呢個時空既生活，而家既我有自己既工作、朋友。我好鍾意而家呢一刻既生活，你唔洗因為咁而感到內疚。
但如果你已經決定左要返去的話，我相信你而家要去搵既人就係敏兒。
果日敏兒跟住你追左出去之後，佢好快就返轉頭黎搵我。
我已經同佢講哂所有事情既真相，佢聽到之後由一開始好激動變到好平靜咁帶着空洞既眼神離開。
雖然我見到佢呢個反應都好擔心佢，但我亦都唔敢再搵佢。
因為得我知道佢想見既人唔會係我...
我相信佢需要時間去接受。
你有責任起臨返去之前去搵敏兒同佢講你既想法同選擇。」
「我知道應該點做。」我同漫淇道別左之後就返左屋企。 我打算聽日臨返去原本既時空之前先出發去敏兒屋企搵佢...
今晚既我好平靜...因為我已經決定左我要返去搵「敏兒」。
第二朝，今日正正就係二零一六年既二月二十九日。
我一起身就搭車去左敏兒屋企...
當我企左起敏兒屋企門口既時候，我足足用左半個鐘既時間先有勇氣去按門鐘。
起敏兒屋企門口出面呢半個鐘，係我人生最痛苦同糾結既時間。
叮噹 叮噹 叮噹
最後我都鼓起左勇氣去按門鐘，因為我知道我唔可以就咁唔清唔楚就離開呢個時空。
我要同敏兒佢講清楚....
好快敏兒就行左出黎開門....
當打開對門既時候，我第一樣野就係見到敏兒個樣十分之憔悴。
但當敏兒見到係我既時候，佢好快就打開左對門攬實我。
「仲成，我知道你一定會黎搵我架...」敏兒佢攬到我好實..好實..
見到眼前既敏兒，我真係冇辦法開口同佢講我今日黎搵佢既目的。
但過左一分鐘之後，敏兒佢放開左雙手..
「對唔住啊..仲成..要你企起門口，你入黎坐啊 ！」敏兒佢抹乾面上既眼淚，拖住左我入屋坐低。
坐低左之後..我地兩個都好平靜，冇人出聲。
成間屋都變得好死氣沉沉...就好似幫我準備左氣氛講接落黎要開口既說話一樣。
最後我決定左...坦白同敏兒講我今日黎搵佢既目的
「敏兒..我...想同你講...」當我打算講出我心中想講既說話時候...
「仲成，你記唔記得我地第一次見面嘅時候,你無啦啦望住我起道傻笑，果時既我重以為自己塊面污糟左，搞到我好咁尷
尬。哈哈...」敏兒完全無視我既說話....
重有啊….你重記唔記得我地第一次約會既情境啊..?果日其實我真係好開心你約我去睇戲架，我記得果日着左件白色背心再襯埋條黑色短裙，我係刻意打扮過架。因為果時既我已經對你有好感..」敏兒佢暫斷左我既說話
「我想同你講..我...」我再次想講出我心中既想法
「重有你起南生圍日落底下同我表白既時候，我真係好感動。你同我講好想同我起埋一齊，好想去守護我。果一刻我真係相信你所講既說話，所以我就接受左你既表白同你一齊。」
「敏兒...你唔好咁啦...你聽我講...」我見到敏兒一路講起我地之間既回憶一路喊既時候...真係好憎恨我自己.... 「一百紀念日既時候你又比左好多驚喜我，我地一直都過得好幸福快樂。 直到志威叫我地去踩單車，你知道左我既悲慘過去，跟住你送左我返屋企拖住我隻手氹我訓教...果一刻我真係覺得好溫暖同好有安全感。你重帶左我去海洋公園玩，我睇得出你係想修補返之前對我造成既心理陰影，等我有一日可以走出陰霾。 到我地一齊坐摩天輪既時候，起果一刻既我好享受同珍惜同你一齊既時光...起摩天輪上高既我已經認定左你係我既真愛，係會想一齊走下去既伴侶。」
「敏兒....好對唔住....真係好對唔住...除左對唔住我真係唔知應該講咩好...」我打斷左敏兒既對話，我喊住咁捉實敏兒隻手，不停重覆講左好多次對唔住...
我知道...我傷害得敏兒好深....
「仲成…我求下你...你唔好再同我講對唔住...我唔想聽到你講對唔住...點解你要選擇同我講對唔住...係咪因為你打算決定左離開我啊…」呢一刻既敏兒已經喊到聲沙力歇
「真係好對唔住...由一開始我認識你..成件事就唔應該係咁樣開始...我起夢中遇見到果個女仔原來係我既「初戀女朋友」，之後先比我遇到你.. 當時既我完全唔知道原來「夢中」既一切都係我起另一個平行時空既回憶...我重以為係因為我「大難不死，必有後福」... 但原來唔係...所以我先會開始追求你....對唔住..我保護唔到你...重要成為最傷害你果個人。」
「點解啊…點解你要講大話啊..你明明同我講過話你唔會好似爸爸咁離開我架...你話你會一直起我身邊架...點解你要咁對我啊..我憎死你啊…」起呢一刻敏兒佢好大力咁一巴打左落我到...
但我塊面果一種痛..遠遠不及我而家個心咁痛...
之後敏兒就沖左出去門口..
升降機打開左對門，敏兒就沖左入去搭升降機離開
當我追出去既時候..敏兒已經閂埋左對升降機門。
我用盡全身既力氣...跑去後樓梯沖落去搵敏兒...
敏兒佢住起4樓....只要跑4層樓梯就可以到架喇...
起呢一刻既我都唔知點解自己會追出去...
點解我要追出去呢....
我淨係知當敏兒好傷心跑走既一刻...
我好自然就想追出去...
當我跑到落去樓下既時候...我見到敏兒佢打開門跑左出去街道上
我好快咁追住敏兒..
我拉住敏兒同佢講...
「好多謝你為我付出左咁多…我李仲成只係你人生之中其中一個「過客」，敏兒你聽我講你一定會搵到一個比我更加好更值得擁有你既人架...」
我知道呢一番說話的確係一堆廢話..
但就算我明知係一堆廢話....
我都想同敏兒講....
我好想多謝佢比左一個咁開心同幸福既時光我....
但我已經冇面目同佢講...
我真係真心鐘意過佢...
因為我知道...咁樣講係無補於事，只會令佢更加難過。
「你放開我啊..你都打算離開呢個時空，返去搵另一個「敏兒」...
我知道...你咁同我講即係代表左..你最鍾意果個始終係佢..
我知道我唔可以怪你啲咩..
因為你都係前兩日先知道呢一個真相..
但點解個天要安排你遇見我...
之後又要安排你離開我啊….
我求下你...你唔好離開我...
我唔想冇左你啊…
我真係好鐘意你...
我好想同你組織幸福家庭..
我知我係好自私...但我只係唔想失去你...」
「敏兒...好對唔住...佢起另一個時空等緊我返去架....」我相信「敏兒」佢等緊我返去架...
敏兒聽完我講呢番說話之後就好激動咁沖左出馬路。
我見到眼前有一架車向住敏兒前方駛進
「敏兒..小心啊！有車啊！」情急之下我用我既本能反應推開左敏兒...
碰 …..
好大嘅一下碰撞聲 . . . . . . 我個頭好痛好痛，啲血開始起我個頭慢慢滴落黎...我聽唔到任何既聲音 …
最後一秒.....
我記得我係推開左敏兒
之後就係漆黑一片既畫面.... . . . . . . . 畫面一過，
到我醒返之後發現 . . . . . 我發現我前面有好大個米奇老味既頭像
我再望下周圍，所有人同物都非常清楚。
我好肯定我而家係身處起「香港迪士尼樂園」
突然聽到前面有一把好熟悉既聲線叫我，我立刻向前一望。
「你重停起到做咩啊！快啲入去玩啦 ！我好想玩飛越太空山啊！」我隱約見到佢好燦爛既笑容...
【全文完】