【夢幻】《我從來冇諗過我會有咁正既女朋友》: 隔閡
當我起身睜開雙眼既時候...我發現我已經身處起自己屋企...
唯一分別就係...
我一起身就見到敏兒訓左起我隔離張枱度...
奇怪喇...點解敏兒會訓左起我屋企起枱度既...
重有我發現自己換左屋企訓既衫同褲，個頭點解會咁痛既...
琴晚我明明同左志威去飲酒架...我重同佢講左收藏在起心中好耐既問題...
我好努力去回想緊...究竟琴晚發生過咩事...
當我合埋雙眼去思考返成件事既「來龍去脈」既時候...
我隔離既敏兒個身起到郁左一郁..跟住就慢慢抬起頭望住我...
「仲成..你醒左喇...個頭重有冇好痛啊…」敏兒一起身第一句就係一面好擔心既樣咁問我個頭重有冇痛..
「點解你會知道我頭痛既...」咁我好自然就咁問敏兒架啦
「你真係完全唔記得哂琴晚發生咩事喇？」敏兒用一個無奈中帶點搞笑既表情望住我...
「我記得琴晚起你屋企走左之後，志威佢約左我去飲野...跟住我地兩個都飲左好多好多酒...
然之後...好似感覺到有人幫我抹身...我好似重有嘔到....之後....啊！我記得返喇...」當我記得返哂琴晚發生過咩事之後...我再好尷尬咁望一望敏兒...
「你終於記得返哂喇...琴晚你做咩飲到咁醉啊…搞到自己咁辛苦...仲成你係咪有咩心事唔開心啊…」我唔通同敏兒講其實我飲到咁醉係因為佢咩..
「傻既！我緊係冇野唔開心啦！係志威個死仔起工作方面做出左小小成績，所以令到佢爸爸開始對佢改觀，我登佢開心所以先飲多左炸嘛！」對唔住啊志威...又要借你過橋..不過我相信你一定會體諒我係因為有苦衷先會咁講...
起呢個時候，我突然之間諗返起琴晚流星雨果個夢...我好驚自己唔知會唔會發開口夢亂咁講野...
所以我都打算問下敏兒，但如果冇啦啦好緊張咁問佢我琴晚有冇發開口夢講左啲乜野又會顯得好奇怪咁...
所以我決定修一修改小小字眼同埋運用一下我既「語言偽術」
「咁琴晚我飲醉左酒有冇講埋啲咩笑話咁啊？因為我之前醉左都係會搞好多「爛gag」, 志威佢次次都話我飲醉左成個人都會風趣幽默左」我用純粹好奇想知既態度問敏兒，我相信佢應該唔會察覺到咁問有咩唔妥既...
「冇啊..你一句笑話都冇講過...只係係咁不停講你好辛苦同好頭痛。」敏兒用半笑半認真既態度答我
聽到敏兒咁講我成個人都鬆一口氣..
「琴晚點解會係你黎接我返屋企既? 」我咁問敏兒都係因為次次飲醉左志威都會搵人送我返屋企，但今次竟然出奇地唔同。
「因為琴晚凌晨訓訓下既時候收到酒吧職員既電話，佢話你同志威兩個都飲到醉哂，咁岩佢起你電話個最常聯絡人到見到我電話，所以打黎問我而家方唔方便過黎接一接你地，咁我咪即刻搭的士出黎接你....」
原來琴晚半夜三更敏兒自己一個女仔搭的士走黎接「爛醉如泥」既我，聽到之後我都感到好愧疚。
「但果間酒吧既人應該有志威聯絡人電話，佢次次都係打比佢架喎！」我心中重有一個疑問
「係，但果個人打極都唔聽電話，所以先會打比我！當我去到既時候咁岩果個人就打返電話黎，佢話我講我可以帶你走先，佢而家黎緊接志威，所以我就同酒吧既職員一齊扶你落樓下搭的士返去你屋企！」 我終於明白哂成件事既來龍去脈... 今日一起身見到敏兒個樣一面倦容..敏兒琴晚一定成晚都冇訓過喇...
佢照顧左我成晚，今日我起身都冇比說話我聽，重要第一句就係擔心我個頭重痛唔痛...
我再望一進個地下，成個地下都好乾淨...
我記得我琴日嘔左落個地到....
即係又係敏兒去拖地.....
試問我李仲成又點會揾返到一個對我咁好既女朋友呢..
「但琴晚搭的士既時候，你訓左起我膊頭，我見到你面上流露出幸福既笑容，當時你係咪發緊夢啊？」敏兒用一個好窩心
既語氣同我講呢一句說話，亦都想知我口中既答案。
「冇發夢啊…我都唔知點解我會笑喎...哈哈...可能因為有得捱住你訓太舒服掛！」我用輕鬆調皮既態度回應返敏兒剛才所問既說話。
「我重以為你係因為發夢夢見我所以先咁開心！不過見你捱落我到都表露出一個幸福既笑容就算數啦！」敏兒好sweet咁笑住同我講
但其實琴晚我係發左一個...有敏兒但感覺又唔係佢既夢....
我都知咁樣講會好亂...所以我都否認左琴晚有發夢呢一個事實...
一個有敏兒但感覺又唔係佢既夢....
即係點？
個答案連我自己都解釋唔到....
而家我唯一希望既就係...志威可以幫我從物理學角度解答到我既問題....
起呢一刻既我...只係想搵出個答案...
而唔再係好似之前咁...扮冇事唔肯去面對同思考個問題既李仲成。
我會咁想知道發生咩事.....
可能係我已經受夠....
夢中呢一種「似真還假，似有還無」既感覺...
起呢幾日裏面，我都係照常咁返工同放工，同敏兒既見面亦都減少左....
應該係話...我地呢幾日係冇見過面..
最上一次見面應該係起我屋企既時候...
我真係唔識點樣面對敏兒..加上我而家既思緒真係好混亂...
當敏兒問我點解呢幾日少左搵佢既時候，我都係用因為「工作好忙」作為理由。
敏兒聽到我話因為工作忙所以少左搵佢既時候...
唔單只冇嬲我，重同我講話工作還工作，但都要作息定時，如果唔係到時捱壞左個身體就唔好...
敏兒愈對我好就愈令我更加唔識點樣面對佢...
當志威知道左我而家呢個情況既時候...佢都有勸過我...
「李仲成！你係咪傻左啊！你有敏兒呢個咁好又咁正既女朋友你就應該要好好珍惜啦！你而家少搵左佢，咁咪即係比果條
「側田」有機可承囉！而家都未解釋到究竟係咩原因會變成咁，你就已經成個人頹廢哂！重學人玩逃避，我又話你自己唔
會逃避會搵出答案，但你而家逃避緊敏兒，咁咪即係逃避緊個問題囉！」志威用「苦口婆心」既語氣同我講呢一番說話
雖然志威佢講得好岩...但我都重係無動於中...
志威見到我咁都決定唔再逼我，比啲時間我自己諗通。
再過多兩日之後，因為發生左一件事令我明白到我唔應該再諗埋一邊 。
我同敏兒雖然呢幾日冇約出黎見面，但都重有whatsapp下，講下今日發生咩事同做左啲咩啊咁。
但我想同大家講，whatsapp同面對面傾計既感覺真係好唔同。
whatsapp只係打字錄音回覆返對方，你永遠唔會知道對方果一刻係咩心情同感受。
雖然可能有人會話單靠錄音既語氣同埋用既表情符號點都會估到少少啦！
但我唔認同呢一種既講法....
隔住部電話始終係會有一層隔膜，而呢一種「隔膜」係會一直存在，最後只會令到我同敏兒之間關係愈來愈疏遠。
要解除呢種「隔膜」，最簡單直接既方法就係約出黎見面。
可能大家會覺得我好奇怪，明明又係我自己話唔識點樣面對敏兒，所以選擇唔見面。
而家又話要解除隔膜，最好就係出黎見面。
但我冇啦啦360度大轉變係有原因的！！！
當今日同敏兒whatsapp既時候...佢同我講話佢間公司接左一個迪士尼既宣傳廣告..
呢個都唔係重點...廣告公司去製作同宣傳廣告係好正常既事黎..
但重點係.....
呢個廣告係交比佢同果條煩膠「側田」一齊負責！
所以為左令個廣告更加吸引到觀眾從而提升廣告益效，迪士尼方面提議佢地一齊去實地考察搵「靈感」！ ！！
我聽到之前真係成個人都「醒哂」！！
雖然我知道就算我呢幾日有同敏兒見面都改變唔到呢個結果！
始終都係會由佢地兩個去接呢個job...
但因為呢件事令我明白到自己既想法真係太唔成熟....
我開始慢慢反省自己之前既幼稚行為....
志威真係話得我好岩！
直到而家都未解釋到究竟係因為咩原因而出現左「夢中敏兒」又或者係起夢中可以「預見未來」既答案。
所以我而家暫時根本就係咩都做唔到...
咁既然我咩都做唔到...咁咪一直照常生活囉！
我竟然蠢到避開敏兒...
我醒覺既原因...絕對係因為敏兒要同果舊「側田」去迪士尼
點解佢地兩個同主題公園咁有緣份既... 我醒覺既原因...絕對係因為敏兒要同果舊「側田」去迪士尼
點解佢地兩個同主題公園咁有緣份既....
但係因為呢件事令我明白到...
有些人，一旦錯過就不再。
如果我再係咁keep住避開敏兒，我地冇可能再維持到落去。
就算我唔見敏兒...我都係會諗起件事... 所以我決定唔再選擇逃避，而係應該要活在當下。
「夢中」同「現實」究竟有冇關係...我真係唔知...
我而家只可以靠哂志威睇下佢搵唔搵到科學專家解答呢個問題...
我亦都唔知係咪同科學既野有關...
科學既野我真係識條鐵咩....
如果一日未搵到人解答呢個問題...唔通我就一直咁避落去咩...
咁樣對敏兒真係好唔公平...
敏兒佢完全唔知我夢中發生既事...因為我由頭到尾都冇同佢提起過
人生總會遇到好多難題，每一條題目既解法都係唔一樣，
唔理係咩難題都好，自己點樣面對比答案更加重要。
呢幾日冇得同敏面見面..我真係好掛住佢...
做咩都冇黎神氣...好似成個人冇哂人生目標咁....
我成個人「改變」哂都係自從敏兒出現左起我生命中...
我先會有返自信同埋慢慢開始識欣賞自己。
所以我決定左！聽日我放左工之後再去接敏兒收工！
我相信敏兒唔會質疑我唔搵佢既「原因」，同上次一樣我都係冇預先同敏兒講會去接佢收工。
因為話哂都差唔多成一個星期冇見，我都想比個小小驚喜佢。
當我去到敏兒公司門口既時候，我再望一望自己隻手錶，心諗應該好快準備放工架喇！
過左十分鍾之後，我終於見到敏兒由佢公司門口行緊出黎
但都係同上次一樣....
佢隔離企既…就係果隻狗公「側田」….
點解個天要咁對我...每次都咁岩比我見到果舊「側田」成個跟尾狗咁跟實敏兒..
定係唔係因為咁岩…而係佢地成日都一齊放工...只不過係我自己唔知..
唔理係點都好啦！眼見自己女朋友咁比人痴到實...
真係別講笑 憤怒爆開了！！
我諗都冇諗就直接沖上前攬實敏兒，呢個先係真・男人應該要做既反應。
敏兒好快因為我既動作而留意到我，當佢正打算同我打招呼既時候...
我就已經攬實左佢，敏兒比我突如其來既反應嚇親。
大約過左幾秒之後我就放開雙手望住敏兒既表情，我見到敏兒顯露出小小驚訝同呆滯....
但好快就對我展開微笑，然後問我..
「仲成！點解你會係道既！」敏兒由驚訝轉變成驚喜既表情，佢問出同上次同一樣既問題。 「因為呢幾日冇見好掛住你囉！」但今次當我回答既時候霸氣左好多，希望可以嚇窒到個攝青鬼「側田」。
但好快我就知道佢唔係普通既「攝青鬼」，佢係一個好高道行既「屎忽鬼」。
「阿成，why are you here?」無錯..佢叫我做阿成...我真心想打冷震，聽到佢咁叫我重難聽過鬼叫！
其實佢扮唔識講中文就算啦！佢而家重要高境界到扮唔識聽中文！
岩岩我咪已經答左敏兒囉！佢又真係天真到以為用英文再問多一次會變左第二條問題黎架喎！
今次我冇理佢，直接用0.1秒時間望住佢「笑」左一下就算。
大家唔好屌我點解重會對住呢條煩膠笑得出，原因好簡單...
係因為我對住佢既係恥笑，而唔係微笑！
呢兩者之間真係勁大分別！！！
佢見到我既「笑容」之後都好明顯西一西面
但今次我真係「 I don’t give a shit !」 我都忍得佢耐，就算係我擺到明唔鍾意佢又點姐！
如果佢真係想溝敏兒佢一定唔會因為咁而起工作上針對住佢架啦！
所以其實諗深一層我又唔洗擔心敏兒會好尷尬 ！只要唔係當面屌佢就得啦！
之前既我就係太忍得佢先完全唔放我在眼內！
但話咁快佢就西完面再次笑哂口咁開聲講野... 「敏兒啊！We are going to disneyland tomorrow ! Are you excited ?」唔怪得佢笑哂口咁撚樣啦！原來早有預謀「突登」要講說話比我聽
「哈哈！幾啦！話哂可以寓工作於娛樂喎！」我都預左敏兒會大約咁覆佢，所以我都已經冇咩感覺架喇！
「I am so sorry about that ! Tomorrow is holiday ，但都要借你個girlfriend 黎用一日， 搞到你地冇得去date! 但敏兒佢都算唔話得， day off 要返工佢都冇say no ! 」
佢係用一個好黑人憎既眼神望住我黎講，但佢既語氣又非常之咁友善，如果冇留意到佢既眼神應該真係會相信左佢，以為佢係「真心」感到抱歉。
其實香港既打工仔都知道架啦...就算果日明明就係day off,但如果老闆又或者上司叫到你去做野，基本上你係永遠都唔可以say no !
「哈哈！唔好咁講！我地走先喇！拜拜! 」今次唔洗我開聲敏兒已經拖住左我隻手拉我走，我成個人條氣都順返哂！所以我
都冇再將佢頭先既說話擺起心！
當我地遠離左個煩膠之後，敏兒佢好快再開聲話...
「仲成，我今日見到你黎接我放工真係好開心啊！你呢幾日咁忙我都唔敢成日搵你，最多都係whatsapp關心下你，費事阻到你做野啊嘛….」
敏兒真係一個好易相信人既女仔，基本上我講咩野佢都會相信我，佢亦都從來唔會懷疑我。但當佢講呢一番說話既時候，
我留意到佢係帶點失望...
起呢一刻我真係覺得...之前既諗法係錯哂...
我唔應該只係顧住自己既感受而忽略左敏兒...
我咁樣做真係太自私...
但慶幸既係，並冇因為咁而影響左我地之間既關係。
「對唔住啊！呢個星期完全忽略左你..但我而家已經忙完架喇！所以可以變返之前咁樣架喇！」我用好輕鬆既語氣回答敏兒
「咁就好喇！我地而家去邊啊？」敏兒聽到我咁講之後露出一個開心既笑容
「去一個你一定會好鍾意玩既地方！你跟住黎咪知囉！」