【夢幻】《我從來冇諗過我會有咁正既女朋友》: 表白－ 南生圍
第二朝返工我都係好似平時一樣，同敏兒兩個人一齊食lunch, 大家都有講有笑！
成日既心情都好開心同愉快，我亦冇再諗返起琴日個夢。
因為我見到敏兒體格咁健康同埋笑容都重係咁甜美，令我相信一定係唔會發生。
可能只係個天想比提示我，人生無常，記住學懂珍惜！
放工之後同敏兒講左今日約左志威食飯，唔可以同佢一齊放工。
「 好啦咁！聽日公司見啦！拜拜！」敏兒好似有小小失望，相反我就好開心，因為咁就証明左佢已經習慣左我地一齊食lunch，一齊放工搭車返屋企既日子。
我亦已經成為左佢生活中既一部分！ 我同志威都係約左起「老地方」，一間尖沙嘴樓上酒吧到等。 今
次竟然係我準時到要等志威，因為通想都係佢嗌定哂啤酒，坐起到等我多。
但好快佢都到左！今日既佢好唔同，多左份認真工作既男人味。
志威同我講佢都做左咁多年二世祖，佢想改變一下。
佢唔想再活起佢老豆既陰影底下，佢想得到佢老豆認同而唔係不斷日日問佢攞錢洗！
雖然我好開心我個好兄弟終於識諗，但同時都有小小擔心佢係咪因為發生左乜事而咁大轉變！
志威見到我個眼神好快就知我個腦諗緊乜，果然係好兄弟！
「你唔洗咁既撚樣喎！我唔係有絕症。我只係唔想再成世人一事無成，比人睇死靠我老豆姐！做兄弟既唔洗解釋咁撚多啦下話！」跟住佢就拎起左枝啤酒自隊
「今日約你出黎係有目的既，我決定左聽你講同敏兒表白。我想知道我應該起咩環境底下講同埋有咩要準備！你識左我咁耐都知我冇溝女經驗架啦！」我真係當正志威係我生命中既愛情輔導師。
「好簡單，你講到條女係一個咁簡單既女仔，咁只要你拎出你既真心同誠意，再約佢去一個佢會鍾意去既地方加埋佢對你都有feel,咁就掂啦！」志威簡直係一言驚醒夢中人，我只要拎出我對敏兒既真心再加上一個深情對望，應該可以表白成功！
好！而家萬物俱備，只欠東風 ! 就係應該起咩地方同佢表白好呢！
「祝你順順利利，溝到既話記得帶佢出黎比兄弟過目下！」我同志威都係咁不停自隊，好快大家都醉撚左。
到起身醒返既時間已經係起自己屋企，唔洗講都知又係志威揾人送左我返屋企架啦！
我亦開始起到諗，應該起咩地方同敏兒表白好呢！
我記得敏兒同我講過平時放假佢鍾意去做下運動！一於就約佢去遠足啦！
但由於我十年都唔遠足一次既關係，我都係上網搵下啲行山好去處既資料穩陣啲好。
最後經過我一番尋查之後，我決定左去南生圍！ 南生圍呢個地旁，將會起我同敏兒表白既地點！
最後經過我一番搜查之後，我決定左去南生圍！
我揀南生圍係因為見到個旅遊blog既一句說話...
就係... 「包保以最少的腳程，能看到最美的風景！」
大佬！平時冇乜點做開運動既我就更係揀啲又易行又睇到靚景既地方去架啦！
如果向好難度挑戰既話一陣唔覺意發生咩意外咁點算！
到時要敏兒照顧返我轉頭就真係咩mood都冇哂啦！重點樣學人溝女表白啊！
所以我呢個決定就實無死既！而家唯一要做既野就係天日返公司約敏兒下個星期六去行山！
咁我都重有一個星期時間好好去裝備下自己！ 雖然我都冇乜好去改變架啦！
但話哂同女神表白，點都要返少少心理準備啦大佬！今次真係「只許成功，不許失敗」！
其實我都有諗過如果失敗左可能會變唔返之前既關係，但係都冇得諗咁多架啦！決定左既野就要做好去！
係我人生第一次咁大決心去做一件事！原來愛情魔力真係好強大！
第二朝放lunch就打算約敏兒一齊去野餐加遠足啦！佢二話不說就應承左！
「遠足？好啊！我都好耐冇去啦！」敏兒好似都好期待星期六既遠足活動！
原來都有擔心過敏兒放假約左朋友，但而家知道佢答應左我去遠就真係一天都光哂！
絕對係一個好既開始！
「係啊！到時我會整少少嘢食，行到咁上下就可以坐低休息食下野！」 我都知我好細心架啦！
「好啊！咁我都整啲嘢食一齊食啦！」我有冇聽錯啊！
咁咪即係我可以試到敏兒既廚藝囉！我終於明白咩叫「未出發先興奮」！
好想好想快啲到星期六...
呢幾日返到公司都冇乜特別事情發生！
但自從識左敏兒之後，我每日返工都好有動力。
成個人都開朗哂，工作表現都有明顯既提升。
佢真係改變左我好多...
無錯！今日就係我期待已久既星期六，我地晏就約左起地鐵站到等一齊入地鐵去元朗，之後再轉小巴去南生圍。
的確係一個好遙遠既路程！但我相信呢一切都會係值得的！
今日既敏兒真係另我眼前一亮! 佢既all back髮型真係有一種好清爽既感覺，再加上一身運動look打扮。
我都係第一次見佢呢一身白色 T-shirt 加黑色運動短褲再襯埋對彩色波鞋既造型，真係好似拍nike廣告既model咁！
佢完全係我心目中既「陽光女孩」！ 跟住我地就開始出發去南生圍！我相信呢一次表白一定會成功！
幾經辛苦終於黎到南生圍！其實講真都幾遠下！不過一黎到就覺得一切真係值得的！
個風景又真係幾靚同埋好有大自然既氣息！ 一大片山林美景、蜿蜒河流及長木橋等等....
經過重見到有人影緊婚紗相！ 敏兒一見到就懷著一副少女情懷既樣話「如果我到時結婚都起到影婚紗相就好啦！」
唔知佢係咪想講比我聽呢！好啦！我承認係我自己不斷ff....
「今日天氣真係好好！好岩去遠足加野餐！」敏兒伸伸懶腰 「係啊！我都準備左幾樣食物，你一肚餓就可以搵個位開餐架啦！」
我都知我好細心架啦！我要做一個暖男！
「我都整左少少野食！不過唔知好唔好食架！希望唔會食死你啦！哈哈！」敏兒再加多個鬼馬笑容
我而家係等待緊一個時機，時機一到我就會同敏兒表白！ 其實我唔一早入去南生圍係有原因架！
因為我想睇緊日落既時候再同敏兒表白！聽講南生圍日落好靚！
日落倒影起水中，再合成迷人美景。起美人美景底下向自己心愛既女仔表白，一切都變得更加有意思！
真係好想快啲到日落時間，我可以向敏兒表達我對佢既愛意！
一路行我都有幫敏兒影下文青相亦都有影下風景相！
時間都過得好快。 而我地兩個都好享受身處起一大片綠油油既草地，一趟清新翠綠既旅程。
起充滿簡樸田園氣息環境襯托底下，加上敏兒起隔離就更加令人賞心悅目！
我地搵左一片草地，打算開始野餐！ 我準備左小學party必有既波蘿腸仔同蜜糖雞翼
！呢兩樣都係我既至愛小食！ 而敏兒亦準備左韓式紫菜包飯！真係見到都流哂口水！ 大家唔好誤會敏兒，佢絕對唔係崇韓港女！！
一個出得廳堂，入得廚房既女仔都比我遇到。
我一定係前世做左好多好事，今世個天想報答返我！
上帝啊上帝！你真係太客氣啦！不過我鍾意！
「好似好好食咁！我唔客氣啦！」敏兒並無恥笑我整啲咁易整既食物，望見佢對住啲食物雙眼發光個樣，真係可愛得黎又好搞笑。
「點啊！對我既韓式紫菜包飯有咩評語咁啊！」敏覺扮到好正經咁問我既食評 「嘩！從來都未食過咁好食既韓式紫菜包飯！」我用誇張既語氣加做作既表情黎突顯我係有幾咁鍾意食！
「哈哈哈哈！你鍾意下次再整比你食囉！」聽到敏兒話下次再整野比我食，我當堂個心都甜埋！
「好啦！我食飽啦！我地開始出發！」敏兒睇落好滿意呢個野餐，面上流露出滿足既表情！
好啦…終於到我今日最期待既環節... 冇錯.....就係去睇日落！
「好啊！我地而家可以出發去睇日落啦！」我都同敏兒興奮埋一份，因為終於去到我所指既合適「時機」啦！
我地就開始行去橫水渡碼頭木橋喇！
無錯！就係cctvb差唔多套套古裝都去既南生圍必取景點！
我地搵左個位坐低，等待緊日落既來臨...
天色開始有所轉變...天空變得一片通紅，最精彩係天色由紅變紫， 我而家既心情真係好緊張...同埋好淆底....
心諗「不如都係算啦！到時比人拒絕左就真係朋友都冇得做！重要日日返公司對住一定勁尷尬！」
但我一諗起坐起我旁邊既敏兒，我好快就打消左呢個念頭！
李仲成！你唔可以成世人都咁冇用架！而家你連表白都冇勇氣，憑咩話去照顧敏兒！
我決定鼓起勇氣，做一個勇敢去愛既男人！ 「敏兒！有啲野我好想同你講！」
我用誠懇既眼神望住坐起我旁邊既敏兒 「做咩啊！你見唔見到啊！太陽開始降落啦！一片紫色好夢幻既晚霞啊！好靚啊真係！」
敏兒掛住睇日落完全冇望過黎我到 我一手捉住佢個頭，慢慢將佢個頭擰過黎面向住我。
敏兒比我突如其來既動作有所嚇親...
「你做咩啊！」敏兒對我既行為感到有少少驚訝
「敏兒！我好想同你講，由我第一次見到你既時候我就已經好想進一步去認識你了解你！ 我知你可能唔會相信，但係真架！ 我第一眼見到你已經覺得你係一個我好想照顧好想保護既女仔！ 之後同你熟落左，聽你提起你之前既男朋友，你話你唔在乎乜野物質同社會地位，你只係想有一個真正愛你錫你既男朋友！ 由果一刻開始，我就好肯定我係鍾意左你！因為我想做你口中所講既男朋友！ 我知我唔係一個好識甜言蜜語既男仔，但我淨係會識氹你一個！我好想同你起埋一齊，好想去守護住你！ 我好鍾意你單純既性格，我唔知日後既我地會係點，但我淨係知我真係好鍾意你！ 我一定要同你講出我既心聲係因為我唔想令到自己後悔！你可唔可以比一次機會我去好好愛惜你照顧你比到幸福你？」 我一口氣講出我收埋起心入面一直好想同敏兒講既說話！ 起呢一刻，我既世界就好似靜止左一樣。
而我個心跳得前所未有咁快.... 我真係將心中想同敏兒講既說話一字一句咁表達哂出黎....
「仲成！其實我都鍾意你！」好簡單既一句答覆，但已經好足夠帶出到個意思！
敏兒用真誠既眼神回答我 我唔敢相信我聽到既答案係出自我眼前敏兒既口中.... 「
你可唔可以再講多次！」我好激動咁問敏兒，叫佢講多一次，但我其實清清楚楚地聽到敏兒既回覆... 只不過係我真係太過開心....
所以好自然咁想問多一次....
「我話我都鍾意你啊！李仲成！」敏兒流露出一個感動而幸福既笑容
起呢一刻我錫左敏兒，敏兒佢亦冇避開...
佢合理雙眼，就好似進入左得我地兩個既二人世界一樣
周邊所有事都變得模糊，我地並冇好似韓劇入面咁激吻 只係深深一吻，係充滿住愛同幸福既一吻....
佢既嘴唇好柔軟，呢一刻我真係覺得自己發緊夢！ 我地既愛係真實存在，不虛不假！
一個好長既深吻...我唔想有完結既一刻...
我同自己講，李仲成！你一定要好好愛惜呢個女仔！
唔可以輕易離開佢！
就係咁，敏兒佢成為左我李仲成既初戀。