[找數][外傳]「空白的五年」: 快樂
lulu：「嗯~咁你想而家就去？去邊？」
佢一邊伸懶腰一邊講，好似已經將我頭先講既野全部拋諸腦後。
佢就係咁，成日都擺出一個「咩都唔重要」既樣。
對住佢呢種態度，其實我suppose係應該要嬲，但我一見到佢個樣，我就嬲唔落，變左個漏氣氣球。
佢就係有呢種力量，一種令人無辦法嬲佢既力量。
我：「唉！今日同我去昂坪！
」 不過計劃都係要做既。
我突然發現，其實呢個計劃未必係為佢好，而係單純咁滿足我自己既慾望。
因為呢五年，我都等得好辛苦。
我自己都好想填補呢五年。
Lulu：「䀚坪~？咁麻煩~啊~諗起都攰。
」 佢一路講一路行入房，嘻傻仔口是心非。
佢呢樣野真係好可愛。
佢好快就換好套衫，仲咩左個袋，入面好似好多野咁。
我：「入面咩黎架？好似好重咁。
」 lulu：「行軍裝備
，行啦我地唔好哂時間。」 又唔知佢係度打乜主意。
我地搭左好似好耐車先去到昂坪，落車果下我仲幾乎跌親，好彩佢扶一扶我。
我：「唔該你。」
lulu：「吖~終於黎到圏外圈，坐車都坐到攰。
」 我：「行啦仲講。」
lulu：「呢度有乜睇啫，咪得個纜車…喂唔通？
」 我：「估岩啦，我地要去坐纜車~
」 我笑住咁同佢講，因為佢而家既反應實在太好笑。
佢望住個天，應該係望住個纜車先真，成個人定住左。
我：「喂行啦。」
lulu：「真..真係要坐？
」 我：「係吖，五年前DSE完你同我坐過架。
」 lulu：「年輕的我是多麼的愚昧啊…
」 佢一邊掩住自己塊臉一邊跟係我後面行，好搞笑。
雖然佢臉上有十萬個唔願意，但係佢都係慢慢咁跟係我後面。
佢就係咁好，口就係咁話唔制好麻煩，但又會肯一句怨言都無咁陪我。
一直以來都係咁。
好快，我地就買好飛，準備上纜車，我仲特登揀左水晶車廂，問你死未。
不過事情總唔會咁順利，我地要排隊等，等左一段時間都未輪到我地。
哎好熱，我開始流汗添。
Lulu：「喂，拎住。」
lulu佢突然拍拍我，遞左包紙巾比我。
我都未開聲話熱，佢就已經遞紙巾比我..觀察力咁強既佢？
我接過紙巾抹左陣汗之後，staff就話可以上車啦，呼終於可以坐。
「喂！我等了好久啦！我要上車！
」 唔？咩事？
我望一望後面，原來係一個大陸阿叔發脾氣，仲打人尖。
佢好似好想上車，不顧一切咁向架纜車跑去，D staff都攔唔到佢。
因為咁岩下架車就係水晶車廂，即係我地準備上果架，所以我企左係上車位。
咁亦即係代表個阿叔跑緊去我呢邊。
「嘭！」
個阿叔被lulu一下就推左落地。
lulu：「同我適可而止，沒教養的臭蟲。
」 之後三個staff衝上黎捉住個阿叔，仲有另一個staff送我地上車。
個staff仲細細聲同我地講唔該，塞左兩張紙比lulu。
睇黎班staff平時都受左唔少氣，真係辛苦。
搞左一大輪，我地終於上到車。
不過話時話，lulu頭先真係好型，直頭好似變左另一個人。
以前都好似有咁既情況，好似係同我阿哥食飯果次，佢果次又係咁，仲打左我阿哥一下。
話唔埋佢同晨哥一樣有「認真mode」喎哈哈。
我：「你頭先好man喎哈哈。」
lulu：「嗯？頭先？」
又係度扮失憶。
我：「無野啦，你睇下外邊，個㬌幾靚~
」 lulu：「嗯，好靚好靚。」
答得咁hea既佢。
我將視缐從窗口外既美人景色移開，望番lulu，想睇下佢而家做緊乜。
我發現佢抱住自己對腳，dup低頭仲合埋眼。
我：「喂你吖。」
我企左起身，係咁搖佢，但佢仍然維持呢個姿勢郁都唔郁，成座山咁。
我知佢係怕高，但居然去到呢個地步我真係完全無諗過。
諗下先，有咩方法可以令佢可以無乜驚呢？
我好快就得出一個答案，就係「我」同「暴力」。
我好快就將腦入面諗既野付諸實行。
我：「喂魯路修，望住我。
」 我用盡全力整開佢兩隻手，但佢仍然頭dupdup唔肯望我。
我：「喂你再係咁我真係嬲架，又係你話做乜都得既？又反口？
」 我谷出一個好不滿既語氣同佢講，佢先肯乖乖地望住我。
Lulu：「咪玩我啦我真係好驚…
呢舊野仲要玻璃底，穩唔穩陣架…
」 我：「傻既，有事我地咪一齊有事囉，而家享受左個靚景先啦。」
lulu：「嗯…」
佢開始移個頭去窗外，仲「啊」左一聲。
我：「係咪好靚呢？」
lulu：「的確幾靚既..
」 我：「睇你頭先仲驚到咁，浪費哂D靚景。」
lulu：「唉咁你都知我真係怕高架…」
我：「咁怕唔怕？」
我整蠱佢，係個車廂度係咁跳，嚇到佢即刻禁住我，唔俾我再跳。
Lulu：「喂我保你大唔好再跳啦好無。
」 我：「嘻嘻
，話時話頭先個staff俾左咩你？」 lulu：「你唔提我都唔記得添，睇下先…去大澳既全日通車飛wor。
」 我：「咁好？
咁不如一陣我地去埋大澳？
」 lulu：「YES YOUR MAJESTY。
」 睇黎今日會玩得好充實好開心呢。
坐完纜車我地行左一陣市集，影左幾張相就覺得已經無野好行，所以就坐巴士入大澳。
去到大澳第一個反應係「好多人。」，周圍都係人，水洩不通。
Lulu：「嘖，咁多人既。」
我：「係囉，好似真係太多人..不如走啦？」
lulu：「咁又唔洗，反正我都有個地方想去。」
有地方想去？係呢度？少有喎。
我：「咁不如我同你去左先？之後再慢慢行？」
lulu：「唔洗唔洗，順其自然就可以。」
既然佢都咁講，我都無謂強求佢。
我同佢係大澳周圍行周圍食仲周圍影相，總知就係開心。
行到咁上下，我見到有豆腐花食，於是我問佢。
「食唔食豆腐花？」
lulu：「糖份我從來唔抗拒。」
我：「中二病。
」 我橋住佢隻手，一齊行入去間鋪。
兩碗豆腐花好快就出現係我地面前，我忍唔住又同佢自拍左一張先開始食。
嗯，好好食，好滑。
我：「碗豆腐花好滑啊可？」
lulu：「吓？嗯，好滑吖，同你一樣。
」 我：「做乜心不在焉呀？有野煩？」
lulu：「又唔可以叫做煩既，只係少少感慨啫，我好多年無黎呢度。」
我：「以前有黎過？」
lulu：「嗯，以前老豆佢地未係好似而家咁忙成日唔係香港架，果時一到假期就會帶我同美星去玩，一家人咁去玩。」
「我記得對上一次黎就係一家人咁黎，又係食豆腐花。」
佢開始掩住自己額頭，好似好唔開心咁。
「啊Sorry呀我可能之前五年有同你黎過…但我…
」 佢突然擺出一個唔好意思既樣，好得意，但又令我好心痛。
原來係咁，勾起左佢細個既回憶呀…
咁又係既，父母長期唔係佢身邊，一做番D以前同父母一齊做既事就好容易諗起。
諗落佢醒返之後都無見過Uncle Auntie，可能掛住父母掛佢。
我突然好有罪惡感，因為想造一段虛假既記憶比佢而觸碰到佢既痛處。
我不自覺咁伸出隻手摸佢個頭，就好似之前美星對我咁。
我：「唔緊要架魯路修，唔緊要。
」 我：「我而家都係你屋企人黎架，記住吖你。
」 lulu：「又係吖可。
」 佢終於笑返，但我仍然好心痛，今次到我笑唔出。
Lulu：「時間都差唔多喇，帶你去一個地方。
」 佢突然企起身，放低錢就捉住我隻手離開。
我跟住佢一直咁行啊行，行左好耐，去到一條好長既橋。
條橋左右兩邊都係海，仲要撞正日落，令到成個景好靚。
Lulu：「算係我今日送比你既少少禮物啦。
」 就係為左呢個先肯陪我行左咁耐..？
明明你咁怕行咁怕攰..但係你為左我…
我就覺得奇怪，你行左咁耐居然一句怨言都無，原來係為左等而家..
果然你係最好架，魯路修。我無揀錯人。
Lulu：「Cherry..?
」 我：「嗯。」
我抬高頭，向天嘆左一口氣同時收返埋D眼淚，然後一鼓作氣咁錫左落佢度。
又多左一個夕陽之吻啦咁就。
今日真係玩得好開心。
我愛你吖，魯路修。