[找數][外傳]「空白的五年」: 噩耗

唔知個傻佬返黎見到我著住套婚紗會有咩反應呢哈哈。 

美星：「個傻仔真係好幸福，可以娶到一個咁好咁靚既女仔。」 

我：「其實幸福既係我就真啦…佢肯等我五年。」 

美星：「兩個都傻，一擔擔。」 

我：「可能係啦。 」 



我繼續打量我既婚紗，希望做到完美，用個最靚既狀態迎接佢。 

係呢個時候，我電話響起，係lulu打黎。 

個傻佬搵我做咩呢？唔通話我知而家返黎？ 

算啦，都係聽左先啦。 

我接左個電話，放左係耳邊。 



我：「喂~做乜呀？ 」 

「你係咪芷睛？」 

咦，把聲唔係lulu黎架喎，好似係晨哥把聲。 

我：「你係咪晨哥？做乜用lulu個電話打俾我既？ 」 

「唔好理咁多啦，lulu佢無啦啦暈左呀！你快D黎啦！ 」



暈左？佢地搞乜..？ 

我成個人呆左，個腦一片空白，直至家姐叫我，我先回返神。 

美星：「阿妹？係咪有乜事？」 

我：「佢地話lulu暈左…」 

美星：「暈左？佢地玩乜玩到暈左呀？阿妹你快黎換衫啦，我地去醫院。」 

換衫，仲換乜衫？ 

家姐講起「換衫」兩個字令我望一望自己，我先記起原來自己仲著住套婚紗。 

唉，咁搞一搞，而家咩心情都無哂… 



我好快就換左衫，好小心咁收返套婚紗入盒，放佢入衣櫃。 

希望lulu唔會有咩事啦…我仲想著俾佢睇架… 

家姐好快咁車左我去醫院，叫我上去先，佢自己搵位泊車。 

我好慌張咁係醫院入面四圍搵晨哥佢地，好想快D見到lulu。 

但唔知點解，每行一步，我就愈驚。 

我有種唔好既預感，硬係覺得有D野會發生，仲要係唔好既野。 

好快，我就去到病房，見到大家都係度。 



我：「晨哥，佢點啊…」 

晨哥：「醫生岩岩走左，話佢無乜大礙，唔會有咩生命危險，不過…」 

晨哥吞吞吐吐咁，好似有野唔敢講。 

我：「唔洗就住我架…講啦。」 

晨哥：「佢到而家都仲未醒。」 

晨哥一邊講，一邊慢慢行開，令我可以見到張病床。 

佢就咁訓左係床上邊，郁都唔郁。 

Jason：「無事既，醫生都話左可能只係疲勞過度啫，俾佢休息一下應該無事，佢一定會醒既。」 



疲勞過度…？ 

唔通係因為我呢排成日拉佢去周圍去… 

一波罪惡感湧上我心頭，我好想喊。 

我慢慢行去床邊，望住佢。 

佢而家個樣好平靜，好安詳，好似一個熟睡既小朋友咁。 

我唔知自己坐左係佢身邊幾耐，但當我回過神果陣，個天已經光，其他人都走哂，成間病房得番我，家姐同佢。 

佢仍然無張開對眼，繼續緊閉雙眼訓係張床上。 



我終於忍唔住，捉住佢隻手開始喊起上黎。 

點解會咁突然… 

之後家姐叫我返去休息一下，沖個涼先再黎，我照做左。 

但我無辦法休息，我滿腦子都係lulu既事。 

過左兩日，佢都無醒。 

我一直陪係佢身邊，因為我想佢醒果陣第一個見到既人就係我。 

係呢兩日入面，有唔同既人黎醫院探佢，大部分都係中學果陣既同學朋友，朱雀都有黎。 

Uncle Auntie都有黎過睇lulu，但咩都無講。 

係佢地既眼神入面睇唔到有一絲既擔憂，好似對lulu好有信心咁。 

我都對lulu好有信心，但我就係無辦法唔擔心… 

我決定今晚要陪住佢，我要係醫院訓。

我伏係佢床咁訓，其實都幾唔舒服，條腰有少少痛。 

佢仍然無醒。 

唉… 

不過呢D野無得急既！要有信心！！ 

我摸下佢塊臉，突然有個諗法。 

不如幫佢抹下臉？ 

我好快就將呢個想法付諸實行，去洗手間用䁔水䁁下條毛巾。 

但當我返去病房之後，我成個人嚇傻左，條毛巾仲甩手跌左落地。 

佢坐左係張床上面，仲棟起左隻右腳俾右手拓住，左手就掩住塊臉。 

我忍唔住，控制唔到自己，衝左上去攬住佢。 

我甚至無意識到自己已經淚流滿面，係D眼淚滴到張床單我先發現。 

咦？ 

我俾佢推開左..？ 

「你係…邊個？ 」