[找數][外傳]「空白的五年」: 倒下

「飲啦屌你！ 」 

「你個死偽毒估唔到係你最早結婚。 」 

「仆街仔我出黎做野唔夠兩年就收到紅色炸彈，好彩係你咋。」 

我：「對唔住囉我太幸福。 」 

晨哥：「唉咪講咁多啦繼續飲啦。 」 



無錯，我而家同晨哥佢地一齊打緊邊爐，吹下水咁。 

係果日之後兩星期我地就約左出左出黎，全男班。 

雖然大家都唔係好耐無見，但大家一聽到Cherry返左黎同埋我地要結婚呢個消息之後都係咁約食飯。 

可能，大家一直都係度擔心緊我。 

呢四年黎，我都好少見大家，聚會都好少出席。 



可能係因為我怕見到大家會令自己不自覺咁諗起Cherry掛。 

不過無論如何，見返大家，我心入面都係好開心既。 

同大家只係四年無見，大家感覺都唔同左，無左以前果一份稚氣。 

雖然呢幾年我有用ig, Facebook呢D社交網站keep住跟進大家既情況，但親眼見到既感覺真係唔同既。 

大家無再著住以前日日著既校服，取而代之既係便服。 



臉上亦無左以往既稚氣，大家都成熟左，好似大家都經歷過社會既現實咁。 

不過都係有D野係無變既，大家既笑容仍然依舊，感覺都仲係好熟悉。 

我地完全唔似四年無見過，好似只係兩三個月無見咁。 

中學D回憶一下子就湧哂上黎添，昔日同呢班人一齊顛係幾咁開心。 

吖，一諗到咁我就不自覺咁傻笑添。 

「飲！ 」 

唉，師父開始係度發酒顛啦。 

肥豬：「飲！飲撚哂lulu D酒佢！ 」 



喂，做乜又多左一個？ 

Jason：「飲哂呢個人生贏家D酒佢！ 」 

喂喂喂，連你都係咁既Jason? 

唉，IVE三傻真係無叫錯。  

算啦，由佢地啦，難得咁開心。 

我：「飲還飲，飲完執返好地方呀，我阿爸阿媽過幾日會黎呢邊住架。」 

呀，其實佢地係係我間屋度打邊爐，唔係平時住個間，係另一間，我唔記得左講添。 



我笑住咁走入廚房，係雪櫃入面拎起枝水再行出露台吹下風。 

飲左陣水，電話突然響，係Cherry打黎，我諗都無諗即刻聽左。 

我：「咩事？」 

Cherry：「返黎未吖？ 」 

我：「返黎？你今晚係我果邊訓咩？ 」 

Cherry：「想同家姐傾下計嘛，反正我屋企今日無人，咪去左你度訓囉。」 

哇當我屋企係咩，cafe? 

Cherry：「係咪有乜唔滿意吖你。 」 



哇咁你都知既？讀我心？ 

我：「你鐘意啦~我同晨哥佢地食多陣就返黎架啦。」 

Cherry：「嗯，慢慢啦，幫我同佢地問好。」

我：「嗯，我會，拜拜啦。」 

Cherry：「唔好飲咁多酒吖，拜拜。」 

哈，佢又知我地會飲酒既。 

好似好耐無體驗呢種對話，個心好䁔。 



我而家成個林峯傻笑gif咁對住個海景傻笑，停唔到。 

「芷睛吖？」 

晨哥把聲突然係我後面響起，嚇到我個心離一離。 

我：「喂唔好咁啦，真係會嚇親。 」 

晨哥：「哈哈，你因乜解究咁細膽吖？做左咩虧心事？  」 

我：「無見咁耐都仲係要笑我。 」 

晨哥：「玩下啫。 」 

我無再應晨哥，繼續望海。 

「真係好呢，魯路修。」 

晨哥又開聲，我轉身望一望佢，見佢挨係門邊，仲拎住罐啤酒。 

我：「飲醉左呀你？ 」 

晨哥：「邊有咁易醉吖我。」 

我：「有野想講？」 

晨哥：「唔，算係啦，想話佢返左黎實在太好啦。」 

我個心突然嚇左一嚇，可能因為我無預過佢會講呢個話題。 

我諗晨哥所指既「佢」應該都係指Cherry架啦。 

我：「都係既。」 

晨哥：「你地有個Good Ending，我真係好開心。」 

我：「哈哈，Ending?而家先開始呀！幾時到你同阿欣吖？ 」 

晨哥：「應該下年啦，我Plan緊點求婚，你估個個好似你咁幸福有女求婚咩？」 

eh…我駁唔到。 

我：「哈哈，到時記得請我去飲吖。」 

我開始轉身，拍一拍晨哥膊頭，慢慢行返入屋。 

但突然好唔妥。 

點解我突然好暈既..成個人無哂力既..？ 

「啪！」