人生工匠: 第二工

當我搵到第一桶金既時候，對於原居民出身既我來講，果種輕飄飄既感覺真係非筆墨可形容。並且不斷有無限咁多個計劃點樣去搵更多既錢，但係實行呢啲搵錢大計之前，同樣地，我有無限咁多個洗錢計劃。低下階層出身既小朋友，童年都只可以係係球場上流連同玩下耍盲雞，絕對唔會有機會洗錢。就係對於洗錢既一份衝動，果陣結果就不斷請朋友飲酒唱K，以為搵到錢同朋友分享係好兄弟既表演，當然而家諗返起係我之後既人生出現既低潮時，有份飲有份玩既兄弟一個都無出現，呢一個經驗已經令我終身受用無窮。


1998年某一晚，中環鏞記酒家。

「晨呀，其實食兩舊燒鵝、叉燒，邊使來到鏞記食，食咗又唔係曉飛，仲要咁貴。」 我同Crystal經歷過兩年既出生入死，關係早已經昇華到好朋友既感覺，大家都係互相稱呼對方既中文名，但我同Crystall到今時今日為止都從未有過愛情既出現，可能係大家都十分珍惜對方咁樣一個人係自己身邊，唔希望呢個關係有任何變化，繼而失去對方。

「無所謂啦心，洗得出既錢先係自己架嘛。」Crystal叫唐苡心，我習慣叫佢阿心。

「唉，好心你啦，開始大個仔，唔可以再餐搵餐清，尤其是係男仔，要有計劃、打算，再儲一筆錢去實踐你既計劃，你咁樣邊會有女仔肯嫁你。」





「得啦，唔好又來啦你。唔想講。」

而家既我諗返起，阿心的確係懷住一份關心去take care我呢個朋友，但每個未成形既年青人總會有一團火，而且想去對身邊既人好，呢啲諗法絕對唔係錯，亦唔可以總係以一個有經歷既人既角度去評價呢個行為係唔係衝動，因為某程度上，呢種係每個人心底裏既真性情，大人只不過被佢哋既經歷控制住唔將真性情表露無遺。

呢一刻既我係處於正想發脾氣既階段，一心諗住帶阿心來鏞記食飯，點知佢好似唔領情，對我仲有一種責怪既味道。

當晚食飯既氣氛好差，大家之後都只係間中出下聲講下啲食物，無再交流其他事。

好多年之後我都對呢晚呢件事好深印象。成日都會聽人講，出來社會做事，絕對唔可以把口快過個腦，EQ係決定成功既重要因素，咁係咪代表成功既人一定唔可以真性情？果刻我無理性地發阿心脾氣，再加上成晚既不揪不睬，係咪有必要？贏咗啖氣又點？係咪需要對住真心好友都唔可以表達真性情？好多年後，我參透咗，其實帶面具亦都係雙面刃，有時係必需，問題只係在於表達既人係咪出於好意，同埋佢心地本身是好是壞。





如果阿心唔係一個咁有耐性同EQ既人，好有可能果晚係鏞記係我同阿心最後一次見面。

將心比己，呢個世界上有邊個係應份無條件去受我脾氣呢?呢個就係有時要忍一忍既真諦

當時意氣風發既我，緊係唔會理會阿心既勸告，繼續吃喝玩樂。

當時亞洲金融風暴，捲走咗好多人既資產，樓、股票、窩輪等都變晒廢紙，一文不值。唔知好彩定唔好彩，到金融風暴爆發果刻為止，我都仲未入市買股票，仲未......  

除左幫樓市炒家搵人排隊之外，係未爆煲之前，我亦都兼營代客泊車同去停車場幫人洗車搵錢，即係而家收人幾舊水一個月一個禮拜幫你抹2-3次車果啲服務。果陣基本上每個人都唔介意洗錢，如果serve得客好，抹車個客都會每個月醒多成叉嘢(1,000)俾我。所以果陣就算大洗，戶口都有一舊錢，有一日機緣巧合下，等緊客做代客泊車之際，同隔離檔既0靚仔阿青講開股票，而呢個就係我另一頁既起點。





「喂晨哥，你有無買股票？」

「青爺，叫我阿晨得啦，你咁樣叫我我收工都唔知出唔出到科學館道。不嬲都無買股票，好攬彩咋，如果唔係真係要跳落前面部車頂啦。」

「x，唔冒險邊有世間財呀，喂，之前個個客魚翅撈飯就話大方闊佬啫，而家，我x，有啲來搵代客泊車真係夠攬膽唔俾貼士架喎，無理由咁都做落去嘛。打工唔掂架啦，你睇下，大丸咁攬大間都執得，做生意又無咁大本錢。喂，一場隔離檔，醒隻好嘢俾你，5條1，11111，京谷電子，收到內幕料，係果日有個有錢客射俾我，今日得毫半子，但過多兩個禮拜會過8毫，下個月頭會過1蚊，到時就好走啦，唔好再搏。我都瞓咗身，搞掂呢鋪就整部拉利，日日來尖東搵人幫我代泊。」

「青爺，而家仲玩股票，邊個買死邊個喎。」

「你咪生人唔生蛋啦，之前啲股票陷陷聲咁冧樓冧落來，而家政府仲要救市買埋一份，即係話你聽，個價已經跌到要掃啦。咁你諗下，香港政府入場掃股票呀，根本無風險啦，你上到呢班車，直情以後唔使坐公車添呀。」

「但我真係唔曉喎，點玩架？譬如我買兩叉嘢(2,000)，升到8毫子我會賺幾多？」

「x唔係咁計架，等青哥教你啦。通常股票係一手手咁買，唔通你1、2、3、4股都俾你買咩，股票行啲人排到上羅湖啦。呢隻京谷係20,000股一手，即係而家毫半子，最少買一手既話就要3叉嘢，咁就睇你買幾多手。如果隻嘢早咗來料去到8毫子，你每1股咪賺6毫半子，一手咪6毫半子乘20,000，賺13,000囉。」





「嘩x呀，兩個禮拜就賺皮幾嘢，你唔早啲講。」

「而家咪同你講囉，你不如話點解你唔早啲出世係誠哥未發達之前同佢拍住上啫，你都痴既。你有興趣就得啦，聽日晏晝瞓醒覺我同你去股票行開戶，即刻買得，買幾多你就自己度，我呢啲發達計係俾多條路啲老友行，唔係迫你行，不過我就瞓咗身買左70手，連埋手續費廿幾皮啫，我唔貪心，升到1蚊毫半子就每股賺1蚊，埋單賺百4萬。呢鋪我真係跑咗幾廿個山撲廿皮返來，呢鋪響咗朵以後大把人爭住俾料我買，當幫佢哋宣傳。」

「呢鋪真係扑中既話我送條鈴賀你部拉利呀青爺。聽日一於去開戶口。」

從阿青口中所講既種種跡象，都好似預示呢隻京谷電子係穩賺唔蝕既投資，而且當時我亦都無諗過，其實阿青條仆街實在係曲解咗當年政府入市既動機同原因。而且，就算當時股市真係接近谷底，而家睇返轉頭，真係就算一個傻既都知京谷電子呢隻嘢絕對唔會係跟到大市反彈既股票......

當晚收工，我已經決定咗，既然阿青條仆街都出到廿皮去掃，我就決定全力瞓身用晒我成副身家掃佢50萬 - 170手京谷電子。