人生工匠: 第一工
2022年7月28日，香港機場Arrival Hall行李輸送帶。 「又去完旅行，又要等下次去返3轉農村體驗之旅，先有得再去日本。阿爸，不如安排下次既3轉農村之旅一嘢過搞，我寧願一去去10幾20日，返來就可以好快去旅行。」
歐陽子龍，14歲，一個普通既中學三年級生，係香港接受填鴨式教育。
「仔呀，呢個世界唔係所有嘢都可以儲埋一齊、一次過架。」
歐陽晨，42歲，香港新晉創業家，的士司機出身，現時經營既生意係以的士團隊提供私人交通、組團交通、生活運輸及物流等服務，兼營的士牌租賃，在香港與私人交通大國Uber分庭抗禮。
「每一次體驗都會見到唔同既東西，遇到唔同既人和事，如果幾次既體驗機會放晒係同一次，上，你就會睇少好多嘢架啦。阿爸讀好少書，但又好想教你好多嘢，唯有同你一齊去唔同既農村體驗生活，又可以接觸大自然，你見到既呢啲情景，就算可以係課本上睇到，都只係一張平面既圖片，當你睇到活生生既畫面，成個感覺會唔同晒。」
「基本上呢，阿爸，你由我8歲第一次帶我去農村已經講緊呢番說話，都唔使咁Hard Sell呀嘛。不過呢，你的確係一個與眾不同既人，做人做事都係。以今時今日歐陽先生既身家，大可以放低錢俾我自己週圍去，但你選擇自己帶我去農村。無咗你，我既世界會無咗好多色彩。不過阿爸你都記住，人生本來就唔係一帆風順架啦，有啲事情只係適合用來懷緬咋。」
「子龍哥，第日你大個咗就明白架啦，一世人雖然都係人來人往，但人老咗，總會諗返起以前、果陣時，細味從前就係而家支撐住我既減壓方法，Learning from experience係可以令人成長得好快。過咗去既，總會有更適合佢既地方。」
我叫歐陽晨，我同我個仔係住元朗既原居民。係我讀小學既時候，阿爸因為過度疲勞，積勞成疾，就離開咗我同阿媽。我阿媽係一個好堅強既人，阿爸過咗身，佢就一力承擔父母雙方既重擔，雖然我同我阿媽講既嘢唔多，但我好以我阿媽為榮，亦好懷念阿爸，因為佢哋用佢哋既身教教育咗我人係需要自力更生同有永遠唔放棄既精神。阿爸同我講過 「唔好靠人，靠自己，人哋幫咗你，永遠都需要還俾人，用自己雙手打併，幾辛苦都會心安理得。」
我自細就唔鐘意讀書，典型一打開本書就進入昏睡狀態果隻，所以讀完中三之後就出咗來讀社會大學。麥當勞、跟車、送外賣、派傳單呢啲童年回憶當然少不免做唔少啦，最過癮始終係呃阿媽話想食糖水，叫佢煮一大煲然後出去賣。90年代至2000年代果陣元朗啱啱起步發展，好多樓盤起，地盤阿叔食完個飯盒，擔返支煙飲杯生力，原來都鐘意整碗紅豆沙。多得呢個機遇，我都屬於建築業受惠人士之一。
我之所以要迫我個仔一齊返大陸去探訪窮鄉僻壤，係因為我細個十幾歲既時候，一次偶然既機會下參加咗一個由童軍總會舉辦既大陸探訪團。當時正值1995年香港最瘋狂既年代，人人魚翅撈飯既年代。雖然果陣家庭環境唔好，但每日生活係當時既世道，所見所聞，都係阿邊個邊個兩三個禮拜就摸出咗層樓賺咗唔知幾錢。其實當時既我連女仔手都未摸過，我知道摸樓呢個Term，除咗係電視新聞外，就係由我啲舊同學度聽返來。我見誇張到既情況係有啲讀書時家境一般既同學，都趁機會走去摸埋一份。 就係呢個時候，我走去參加咗農村探訪團。
十幾歲0靚仔走去做呢啲嘢，都係不外乎為媾女。果陣係一次偶然既機會下，識咗一個暑假來做派傳單既女仔，佢叫Crystal，同我同年。由於佢家庭環境幾好，直至去到佢16歲先第一次出來社會付出體力賺人工。當時好多人都會趁課餘出來搵錢，絕對無人會理係咪唔夠16歲唔做得嘢呢啲咁Admin既問題。咁我作為師兄，當然就指導下師妹派傳單。
「晨哥，我唔知你有無興趣，不過都即管問下你，我阿哥係童軍，佢話童軍總會來緊搞個農村探訪團，去韶關探訪當地既人，同去果度既小學做義工教果度既小朋友學英文。佢話係義工性質，所以火車票同住宿都係全免，出個人就得。我見平時你教我咁多嘢，當請你去旅行！」
我唔知當時佢講完之後察唔察覺到、了解唔了解「當請我去旅行」呢句話根本就犯咗邏輯上既錯誤。但anyway，果種感覺就係咁令人期待，彷彿好似你係當年既猶他爵士死光鎗漢拿錫咁，總希望今年NBA總決賽隊冧Michael Jordan咁，一樣令人無限幻想。
「但我好忙喎，基本上每日都要返工，呢排嘉湖山莊又開新一期，要去排籌呀。」
〈慾拒還迎〉
「去5日咋喎，包食宿喎，你咪當慳咗食囉。我阿哥好悶，如果你唔去我都唔去架啦。」
〈鼻血都噴埋〉
「咁好啦，其實做義工既話我都會好開心架!」
「咁一於咁話啦，下星期四出發，唔好放飛機呀!」
結果，我就同咗Crystal同佢阿哥仲有一班後生仔女加幾個大叔去咗韶關做咗5日義工。初初去到第一日，好快就適應咗個環境，可能係因為自己住村屋，所以對於環境都唔會太難適應。呢個Trip最令我啟發，而且相隔咁多年都仲瀝瀝在目既情景，就係人係艱難環境下既求生意志同本能。你可以體驗一班只有9至10歲既細路仔，朝朝天未光行個半鐘由屋企返到學校，靠既係一對穿晒窿既帆布鞋。而夜晚係學校做完功課後，用差唔多既時間摸黑由學校行返屋企。至於佢哋既父母，每日堅持落田工作，年中無休，為既只係一個月約百零蚊人民幣既收入。
呢啲畫面可能會間唔中係電視睇到，但當你同當地人一齊相處同體驗既時候，係非常之真實，而且，當佢哋將一年只會破費係過年時食一次既豬肉買返屋企招呼我哋既時候，果種感動係深深打入心，就好似一個第一次見面既人毫不吝惜咁同你分享佢擁有既所有。 就係呢份感動，令到我一開始為咗去媾Crystal既衝動都消失，更令到我如今好似上咗癮咁，帶埋我個仔一齊去體驗，將我認為人生中最應該感受既，感染埋佢。
最終我同Crystal係果5日入面乜事都無發生，但就俾我發現，雖然出身小康之家，但原來Crystal做嘢好細心。而且基於女仔一般比同年男仔早熟既關係，Crystal思想好成熟，成熟到一個地步我當時會以為佢已經做咗人阿媽咁。
例如有一次，我哋係尖沙咀星光行門口幫一個地產發展商派新樓盤既傳單，派咗三粒鐘都派唔到10張傳單，Crystal就提議我哋唔好再留係度派樓盤傳單。
「唔派樓盤傳單？而家全香港都炒緊樓喎，仲有咩傳單會吸引過樓盤傳單？」
「你諗真啲，週街啲人都知炒樓，佢哋會唔知邊度有樓賣咩？中原都幫你派晒要派既傳單啦。而家炒樓最缺係咩？就係派隊輪籌既人。我哋去新樓盤同示範單位搵啲炒家，同佢哋講幫佢哋去社區會堂同街市商場派傳單俾啲師奶大叔，高薪請人排隊輪籌，一定易派過你而家派樓盤單。」
「得唔得架？」
「最多試兩日，得唔得都兩日見真章。」
結果，我同Crystal係1995年去到1997年樓市爆煲前呢兩年，靠呢個方法同做中間人幫炒家搵排籌黨，各自搵到相信要5到6年先搵到既第一桶金。當然，Crystal比我優勝既地方係佢只用返學課餘既時間，就搵到同我全職去做呢件事既差唔多收入。可惜，果陣我拎晒啲錢去買股票貼牆紙。 而係1997年之後，由於Crystal要準備應付考大學，佢做Part-time既時間少咗好多，而我哋亦少咗好多時間見面相處。 還好，我賺咗Crystal呢個好朋友兼好柏檔，我同Crystal係一種好猩猩相惜既感覺，大家係適當時候總有一個共同目標去一齊完成。於是，佢今日其中一個身份係我公司既人事部阿頭。