大象魚短暫的一生: 2

「叮叮叮，叮叮叮⋯⋯」唉，比我訓多5分鐘啦。正所謂醒之前訓多5分鐘，就等於平時訓1個鐘
「叮叮叮，叮叮叮⋯⋯」仆街啦，訓過龍，要遲到啦！！！
我即刻著返校服，一口氣攞住個書包沖出門口，其間仲伸出左手攞住塊包，右手抓住枝蘋果汁。成個過程好流暢，無任何停頓，我自己都好佩服我自己，假如舉辦個趕出門口大賽，我一定攞冠軍。唉死伙，掛住諗5記得跑，死啦，今日頭兩堂仲要係班主任堂，一陣遲返去佢實鬧爆我。
正當我進入忘我境界，低頭狂奔沖到最後一個街口就返到學校時，突然間眼前一黑，然後再擘大眼嘅時候，竟然唔係個石屎地，反而係藍藍嘅天空，之後feel到個背脊有啲痛，我就知我今次真係仆街啦。
當我諗住起身既時候發現咗我前面有個啊婆攤咗係地下，我先發現原來我撞到個啊婆。死啦，一陣佢有咩事我咪好大獲？所以我諗都5諗即刻沖過去諗住扶佢起身。
「啊婆，你有無事啊，對唔住啊，我掛住跑返學無睇到路，我唔係有心架。」
「啊⋯⋯啊⋯我條腰啊。」
「後⋯生仔啊，啊婆我⋯好似好扭親條腰，你⋯⋯可啱可以⋯送一送我去睇醫生啊⋯」
點算好呢，我整親啊婆咁我無理由唔盡責任送佢去睇醫生架，但係今日數學又有測驗，個測驗仲好似話會影響考試分喎。假如比啊媽知道我唔返學無測驗，搞到考試分勁低佢實殺咗我都似。
「後生仔，你⋯係咪要⋯⋯趕住返學啊，算啦，啊婆自己慢慢行⋯⋯得架啦。」啊婆見我呆咗咁耐所以問下我。




唉，算啦，唔理啦，我有錯在先既，死就死啦。
「唔係啊啊婆，我有錯在先既，我而加陪你去睇醫生啊。」
當我咩起阿婆既時候，我發現個啊婆好鬼重，唔似係睇落咁瘦，好似個200幾磅既大肥佬咁，同埋佢身上陣味完全唔係平時啲公公婆婆身上既驅風油味，似係個啲糖果味。我懷疑個啊婆一定係平時食得糖多，如果唔係都唔會咁重同埋成身糖果味，不過好彩我平時做開運動，都勉強咩都起佢。
就係咁我就試咗人生第一次既逃學，走咗去送啊婆睇醫生一路上仲同個啊婆有講有笑，傾下我係學校啲野，又傾啊隻雞啲衰野。不過我地都行咗幾耐下，因為個啊婆話佢只係睇開一間診所，一定要行去個間到睇。
唔經唔覺都已經行咗半個鐘，就算我平時有做開運動都開始有啲頂唔算，唔係我好咋。大佬啊，你試下咩一個好似成200幾磅既人係大熱天時行成半個幾鐘啊。廣告都有講啦，大熱天時唔好玩咁耐啊，如果唔係好容易中暑架啦。
就係我就黎頂唔順既時候，啊婆終於講咗句我期待已久既說話
「頂⋯住啊後⋯生仔，就到啦，過埋⋯⋯前面個⋯隧道就到啦，加油⋯啊。」
聽完呢句說話，我啲體力好似返哂黎，我即刻行快兩步，心入面淨係諗住
「頂你個肺，行快兩步，我要放低個啊婆！！！！！」