《台灣個表妹嚟咗我屋企住》【完】: (零)回憶

請問喺你嘅日記入面有冇一個人？

嗰個人曾經喺你嘅生命中悄悄咁嚟到，然後又匆匆離開，畀咗一段最美好嘅時光你，然之後又拋低你返去嗰個孤獨嘅世界。

而你⋯⋯依然念念不忘，並唔係唔願意忘記，而係忘記唔到。冇開始，就唔會有完結嘅一日，如果我冇開始寫呢個故事，就永遠冇人知道個結局。

有好多嘢都係由初次嘗試，吃盡苦頭先得到，但又唔係一個定律，因為有啲野⋯⋯我試過好多次但都得唔到。

嚟台灣生活咗幾年，慢慢長大之後，先發現以前嘅自己好幼稚，好想控制每一件事情，可惜有時亦會無力控制。相比起喺香港，喺台灣嘅生活更見輕鬆，生活節奏真係好慢好慢，令我真正可以去享受生活，捉住每一分每一秒。





一個二千幾萬人嘅島國，繁華熱鬧嘅城市，為人熟悉嘅夜市小食，附近又有好多風景怡人嘅小島，得閒嘅時候就去睇睇迷人嘅海平線，去到郊外感受一下大自然嘅氣息，身處台灣一定要做嘅環島遊喺我讀大學時就已經完成埋，但係呢啲嘢都唔係我嚟到台灣嘅主要原因。

故事嘅起源都唔係喺依到⋯⋯

我將手放喺鍵盤上，開始用一字一句去寫出一個故仔。

台灣嘅閱讀風氣都幾盛行，每逢放假唔洗返工或者喺夜晚食完飯之後，我都會一個人去到屋企附近間書店打書釘，呢個習慣係我由中學開始就養成，中學⋯⋯唔經唔覺就過咗咁耐，而且人嘅一生有好多嘢都唔經唔覺就過咗⋯⋯

打打下書釘，我部電話突然之間響起。





原來係我住喺香港嘅阿爸打嚟。

「喂！係咪星仔呀？」阿爸熟悉嘅聲線再度傳入耳畔。

「嗯⋯⋯係呀，做咩呀阿爸？」

「你最近點呀？見你幾個月冇打畀阿爸喇喎。」

「嗯⋯⋯係呀⋯⋯」諗返起又真係好耐都冇搵過阿爸。「因為之前做嘢太忙，唔記得搵下你。」





「哦⋯⋯唔緊要啦，你依家生活點呀？」

「唔錯啦，都過得幾好⋯⋯」

「得閒就打下電話返嚟啦，好耐都冇聽過你把聲喇。」

「嗯⋯⋯」突然畀阿爸提一提醒，我記得好似曾經都講過類似嘅說話。「之前忙呀，我遲啲會多啲打畀你㗎啦。」

我拎住本書，再睇一睇手上嘅錶，我知道如果再咁講落去，以阿爸一向長氣到死嘅本性，一定會沒完沒了係咁講，我諗傾傾下到時連間書店都要閂門，而佢都仲未講完。

於是我按照以往做法⋯⋯

「阿爸，我唔講住啦，有啲嘢做緊呀！得閒先再慢慢同你傾啦。」

「哦⋯⋯」阿爸嘅語氣好似有啲愕然。「咁好啦好啦，唔阻你喇，照顧好自己呀！拜拜。」





「你都係，記住保重身體呀，拜拜喇。」講完我就收咗線。

其實由細到大我同阿爸都有啲代溝，總係唔會同佢暢所欲言，甚至有時寧願講少啲嘢，睇嚟咁多年嚟都改變唔到，雖然我個心依然係好關心佢⋯雖然見阿爸越嚟越老，我都好想陪多啲佢⋯⋯

跟住我就繼續打書釘，腦海中因為阿爸一句提醒，浮現出一個回憶。

六年前，其實我都係咁樣打住書釘，過住普通嘅生活。

突然迎接咗一個人嘅來臨⋯⋯