《台灣個表妹嚟咗我屋企住》【完】: (一)普通人

我仲好記得嗰年嘅夏天⋯⋯

喺一個星期五嘅夜晚。

我去完自修室溫書之後，就去咗附近一間快餐店，是是但但食咗個飯。

而身為一條書蟲，喺晚飯過後，我就行去咗一間書店入面打書釘⋯⋯

由於我係一個文科人，好鍾意睇歷史故事同埋流行文學，所以就走到去歷史書嗰邊隨手就拎咗本書釘下，我見本書封面好靚咁寫住《鄭成功秘史》。





當時心諗本書應該係講當年鄭成功點樣成為台灣英雄啦⋯⋯

點知⋯⋯打開一睇先發現：「民族英雄鄭成功一生最愛的人並非其妻，而是其表妹，一位姓田川的日本女子⋯⋯」

再睇多幾頁，我發現都只係講有關鄭成功同個女仔嘅愛情故事，其實本嘢應該要叫做《鄭成功情史》囉，我釘多一陣覺得好悶，冇咩興趣就放低返本書。

之後我再去到流行文學嗰邊，睇住一本關於校園愛情嘅書，叫做《女神話我考第一就畀我中出》。只係睇咗本書一頁，就令我好有衝動咁睇哂成本書⋯⋯

我睇完之後不禁心諗⋯⋯





唉⋯⋯我都好想遇到個好似阿圓咁嘅女仔⋯⋯

的確諗返起我嘅中學生涯，朋友已經唔多，想遇到個好女仔都只不過係痴人說夢。

但係喺中四嗰年，我都有過一個初戀女友，只係有一日佢無啦啦同我講分手，連學校都轉埋，我就再冇見過佢啦。

當我入哂迷咁睇書嘅時候，書店原來都要準備閂門。

於是我就放低手上嘅書本，然後孤身隻影走到熱鬧嘅大街上。





見住一對又一對嘅情侶從我身邊輕輕擦過，冇另一半嘅，都仲有一班好兄弟好姊妺相伴而行，毫不孤單。

而我呢？繼續漫無目的咁行，思考緊我嘅人生到底得到過啲乜野？

愛情？友情？我曾經都擁有過，但好可惜⋯⋯

突然電話響起，係我嘅阿爸打嚟⋯其實我仲有親情。

「星仔，仲唔返屋企？」

「嗯，我就快返啦。」

「咁拜拜喇。」

「嗯。」講完收咗線後，我就行返去屋企。





返到屋企，我將書包入面一大堆嘅試卷放喺枱上，坐低做咗陣卷就打算上床瞓。

有時臨瞓之前，我都會開電腦睇下一啲網路文學，因為睇書係我嘅興趣，應該係話我都幾鍾意文字依樣嘢⋯⋯我覺得文字係一種好有興趣嘅嘢，能夠創造一啲嘢又或者摧毀一啲嘢，而通常呢啲嘢都係我哋現實中做唔到嘅嘢。

通常睇開啲網路文學，乜類型嘅故仔我都會睇下，但今日對恐怖故仔有啲興趣，就睇下啲鬼故啦，雖然怕鬼嘅我都驚夜晚會因為咁而瞓唔着。

再睇多一陣之後，我就開始眼訓了。

於是我就熄咗部電腦，熄埋燈我就瞓落床望住個天花板。

終於可以畀我抖下⋯⋯