《台灣個表妹嚟咗我屋企住》【完】: 結局.星空

結局.星空


最短暫嘅一個夜晚，我同小南坐喺一張長椅上，佢挨落嚟我嘅膊頭上，我倆就此靜謐地望住大海，細聽住海風嘅聲音。

我記得小學嗰陣，中文老師同我講海係一望無際。

但大個咗之後，我先知道再遼闊嘅海，都會有到岸邊嘅一刻，人之所以覺得海係一望無際，係因為人嘅目光有時實在太淺窄，冇認真咁望過呢個海洋。

「星星，咁我哋依家點算呀？班機走咗喇喎。」小南問。





「走咗咪等下一班囉，兩個禮拜啫。」我決定把望海嘅目光放遠啲。

「你依家捨得啦？」

「係呀，陪多咗你咁耐，仲點會唔捨得呀？」

「但係到我唔捨得你啦喎⋯⋯」小南憂心地講：「其實我一直都好唔捨得你㗎，頭先上機嗰陣都不停咁諗緊你，我好驚見你唔到呀⋯⋯」

「傻豬嚟嘅⋯⋯」我攬住小南溫暖嘅身軀，柔聲細語問：「唔通你唔記得我頭先講過啲咩啦咩？」





「你會⋯永遠陪住我？」小南話。

「嗯，你望下個天空。」我用手指指住夜空，然後話：「你見唔見嗰粒星？」

喺城市都能見到星星，仲要獨立一粒，確係十分罕見，亦都證明呢個世界係冇嘢冇可能。

「嗯⋯嗯！見到呀。」

「你記住，以後見到星星就等於見到我，我會一直喺天空上面凝視住你，陪伴住你。」





「嘩⋯好浪漫呀！」

「講真㗎，我叫家星呀嘛。」

「得啦得啦，我返咗台灣之後，都會成日望住你㗎。」

「嗱！我就畀咗粒星你，但你冇嘢留低畀我喎⋯⋯一陣我又心掛掛咁點算好呀？」

「乜嘢冇留低呀？你自己搵下啦。」說罷，小南跳皮咁敲我嘅額頭一下。

「咩呀？唔明喎。」我話。

「唔明就算啦⋯⋯」趁住小南一時冇留意，我就錫咗佢一下，回味嗰種窩心嘅甜蜜。





「留低你嘅心畀我囉。」我掂住佢個鼻話。

「喂呀！肉麻到死！哈哈⋯⋯」小南粉拳襲來，甚麼痛意都化作愛意。

「喂⋯認真呀，咁我依家點呀？外公佢哋一定係搵緊我。」

「唔知呀，我個電話都震咗好多次，不過⋯過埋今日先再諗啦。」

過埋今日⋯我忽然記起一句說話。

「嗯嗯⋯都好！」

風繼續吹、時間繼續流逝、小南依然喺我身邊。

但我始終介懷，嗰句說話嘅內容會唔會實現呢？





我望住手上嘅錶，時間顯示住十一點五十八分。

滴答！五十九分。

「小南⋯」正當我想同小南講多一句說話，先發現佢依隻懶瞓豬又進入咗夢鄉。

唯有將嗰三隻字收埋喺心。

「我愛你。」

如果你聽到嘅話就好⋯⋯

滴答！





頭部嘅刺痛又再度傳嚟，但今次畀起喺書局嘅痛意增強咗十倍有多，就好似有成千把刀插入我個頭一樣。

「呀！」我撳住個頭，就算明知冇用。

依種感覺係咪真係死亡？

原來嗰句說話係真⋯⋯

呢種痛，我已經冇辨法承受得到。

雙眼見到微微藍光，

突然又眼前一黑，

只覺頭昏腦脹，痛不欲生，我四肢無力咁倒在地上。





喔，原來死亡係一件咁簡單嘅事。

對唔住，小南，

估唔到我咁快就背棄咗承諾，

但願你仍然能望見閃閃發光嘅星星。