《台灣個表妹嚟咗我屋企住》【完】: 結局.幸福嘅倒數.3
結局.幸福嘅倒數.3
「對唔住呀！你有冇事呀？」
「我二妹出手係重咗啲嘅。」
「喂！你都有份出手㗎喎！」
「咩呀？係你指示我做㗎！」
睇住眼前兩個「小南」互相鬥嘴，我終於知道點解看更陳伯會用詫異嘅眼光望住我同小南。
我望向坐喺我身邊真正嘅小南，只見佢嗤笑一下。
依家到底咩情況呀？
「咳咳！」我扮咳兩聲，佢哋就安靜咗落去一齊望住我。
同時畀三個小南望住，好唔習慣，一個都夠煩㗎喇。
「係⋯⋯兩位表姐你哋好！」我十分謙恭咁講：「點稱呼呢？」
「點稱呼？你咪叫咗我做表姐囉！家星表弟。」似乎係大家姐嘅「小南」回答我。
「係囉，咁唔通你想叫我哋做咩呀？」二家姐「小南」附和。
「嗯⋯⋯咁當我冇講過啦，哈哈。」
雖然佢哋三個嘅容貌都相當之相似，唔講真係以為佢哋係三胞胎，但當中都有一些分別嘅，例如大家姐嘅身高就比較高，起碼高過小南一個頭，而二家姐嘅身型就比較碩壯，有別於小南嘅纖瘦。
對應返佢哋細個嘅相⋯⋯
一個哨牙嘅高妹，大家姐大南。
好樣衰嘅大肥妹，二家姐中南。
同小南一樣又係女大十八變，變咗好多。
果然係同一個阿媽生，三個都係天生麗質，只係所散發出嚟嘅氣質完全唔相同，兩位表姐睇落都係女強人，表裏如一，我諗我都比較鍾意小南嗰種要讓人小心呵護嘅氣質。
但好似講遠咗⋯⋯
講返起我好介意一樣嘢，佢哋兩個此行嘅目的。
由台灣遠道而來搵自己細妹？
正當我想問，大南表姐就搶先問我一個問題：
「係喎⋯⋯表弟你頭先做咩拖住小南隻手嘅？」
「吓⋯⋯」
雖則好聽啲叫表弟，但我同你哋隔咗十幾年再見返，都唔係好熟咋喎，使唔使一嚟就單刀直入。
好，既然係咁都費事隱瞞。
「因為小南係我女朋友。」我話。
大南同中南兩位表姐先係面面相覷，然後大嚇一跳。
「你講咩話？講笑咋？」大南問：「小南！佢講嘅嘢係咪真㗎？」
「嗯⋯⋯」小南扭扭擰擰咁望下我，又苦笑住咁同大南講：「嘻⋯⋯係呀，我哋拍緊拖。」
忽然，我嘅右手又畀人捉住用力一扭，猶如爆蛋嘅痛楚喺手腕上傳嚟。
「呀！！！」
原來係中南一個箭步上前扭我隻手，再將我撳低落枱面。
「講！你有冇對我哋小南做過啲乜嘢！」
「斷啦！饒命呀⋯⋯」
「講呀！」說罷，佢又用多咗力落去扭我隻手。
「呀！冇呀冇呀！」為保生命安全，真係有都話冇啦。
「二家姐唔好呀！」小南好緊張咁衝過嚟，幫手拉開我同中南。「你會打死佢㗎，唔好咁啦。」
乜我睇落似係咁弱不禁風㗎咩？點會畀個女仔打死㗎？但睇真啲中南嘅手臂咁粗，將我打到半死亦並非冇可能。
何況佢只係扭我隻手，都可以令我痛不欲生，真係唔敢想像其他嘅攻擊係點。
不過見到小南咁着緊我，心裏一甜，所有痛楚都忘掉了。
「好啦好啦，二妹你放開佢先啦，我都冇叫你打佢。」大南一聲下令，中南立即放開咗我。
睇嚟小南嘅大家姐都係比較理性啲嘅人，冇二家姐咁撚暴力。
中南你咪郁手郁腳咪好囉，萬事有商量，坐低慢慢傾就得㗎啦，我溝咗你個妹都唔使咁嬲啫，好似大南咁和平啲啦。
但我睇錯，原來人真係唔可以睇表面。
正當我想以微笑答謝大南嘅饒命之恩⋯⋯
點知佢好冷靜咁講：
「你去廚房拎把刀出嚟先啦。」
仆街！嗰一刻，我終於知道點解小南呢個咁好嘅女仔，十八歲人可以拖又冇拍過，暗戀過人又冇下文，連初吻都咁遲先畀我攞咗。
「係！」
屌佢老味，跟住中南真係衝咗入我間屋嘅廚房，拎咗把豬肉刀出嚟。
「家星表弟，今日算你唔好彩，總之我哋唔會畀小南跟住你。」大南話。
「冇錯，你放心啦好快㗎咋。」手持豬肉刀嘅中南附和。
兩位表妹都好凶狠咁啤實我，其中一個仲要揸住武器，可以隨時結束我嘅生命。
「唔好玩啦⋯⋯」我好淆底，冒緊冷汗，但依然企喺小南前面，以身軀保護住小南。「兩位親愛嘅表姐，一陣搞出人命點算呀？」
「清明先算囉。」說罷，佢哋就向住我步步逼近。
每接近我一步，我嘅心又驚一分。
但始終都係一心想保護住小南。
喺呢個生死存亡嘅關頭，我嘅背後傳嚟一聲：
「夠啦！」
矮小嘅身影立時擋在我前面，猶如陽光般燦爛地映照著我，畫面既溫暖，又感動⋯⋯
「就算我拍拖又點喎？你哋都冇權管我啦！」小南話。
我見小南衝咗上前，我立即拉住佢，又再次用身軀擋喺佢前面。
「唔好傷害你個妹啦！要斬就斬我！」我張開雙臂守護住喺我背後嘅女仔。
只見兩位表姐怔了一下，又繼續逼近過嚟。
「星星呀！」小南從後攬住我條腰。
從來冇諗過死亡係一件咁兒戲嘅事，我感覺到自己個身體抖震緊，於是我緊閉雙眼，準備好迎接死亡嘅來臨。
原來人之將死，個腦會空白一片。
「來生再見啦小南⋯⋯」
踏！踏！
腳步聲停止咗。
最後，
豬肉刀並冇落喺我嘅頭上，
反而係有一隻手放喺我膊頭上。
我擘返大眼，見到上一秒仲要將我置諸死地嘅兩位表姐，下一秒卻笑容滿面。
「咩情況⋯⋯」我問。
中南放低把刀，然後再話：「哈哈！好！你合格啦表弟！」