《台灣個表妹嚟咗我屋企住》【完】: 結局.幸福嘅倒數.2

結局.幸福嘅倒數.2


又少一日，

同小南行咗一日街，好撚攰。

攰，唔只係身體，

仲有個心都好攰。





明明我應該係唔開心，但又要強顏歡笑，對住小南露出虛偽嘅笑容。

終歸我太喜歡佢，越喜歡，越怕失去。

太過喜歡，唔想佢擔心，因而帶上面具。

就像我失去阿琪同媽媽嘅時候一樣，投放嘅情感有幾多，到咗當失去一刻，只會落得一個空虛寂莫嘅下場。

返去屋企時，經過樓下大堂見到看更陳伯對我同小南投放詫異嘅眼光，佢一定係好驚訝我同小南發展到拖埋手嘅關係。





不過我哋不嬲都毫不忌諱，拖住手周圍去，我睇陳伯你都察覺得太遲啦啩？

諗返起小南嚟到嘅第一日陳伯問阿爸係咪個仔帶埋新抱返屋企，估唔到佢嘅預言靈驗咗，輾轉一輪，明明上一個月仲係啱啱嚟到嘅表妹，轉眼間已成為我嘅女朋友。

搭lift上到去，步經走廊，正當我拎埋條鎖匙出嚟想開門嗰陣⋯⋯

忽然陰風陣陣，令人毛骨悚然。

感覺好似有人伏於四周⋯⋯





唔係咁好彩撞鬼呀？

身處於依種環境，搞到我諗起孔明嘅《失蹤》，諗緊自己會唔會入咗結界，心裏又驚一重。

「表哥你⋯⋯你做咩事呀？你出緊汗嘅？」小南傻傻咁問。

有時我諗做人蠢蠢地都唔錯，起碼咩都唔識，冇嘢好驚。

「冇事⋯⋯返屋企啦。」我用手臂印下自己額頭嘅冷汗。

然後就準備將鎖匙插入門鎖⋯⋯

突然之間，嗰道陰風就更加強⋯⋯





兩個身影夾住咗我，

一道怪力打落我拖住小南嘅手，搞到我鬆開咗佢隻手，我感覺得到，

兩道風左右吹來，四隻鬼手捉住咗我，迅速將我撳落地下。

呢獲真係有鬼？

成個人撞落地下，只覺心口一痛，慘叫一聲：「呀！」

我下意識擰個頭向左面上方一望，睇下係何方鬼怪。

點知一睇⋯⋯

「小南？你⋯⋯」





再擰埋去右面上方⋯⋯

「小南⋯⋯」

此時此刻，我嚇到目定口呆，唔明白點解會有兩個小南喺度。

仲要嚟攻擊我？莫非係可以變成別人樣子嘅鬼怪？

老子什麼鬼也不怕！雖然咁講，但我差啲就嚇到賴尿。

呢個時候⋯⋯

只聽到身後第三個小南以驚慌嘅語氣講咗一聲：





「家⋯⋯家姐？」