《台灣個表妹嚟咗我屋企住》【完】: (一百一十五)再多謝

呢個咁突然嘅消息傳到佢哋嘅耳朵。

一句說話可以連空氣凝住⋯⋯

頭上淡淡嘅白光，映住我哋三人嘅臉龐。

小南就呆呆咁望住我，個口仲咬住隻雞翼。

而阿爸就冇太大嘅表情變化，好冷靜咁。





「你哋⋯⋯一齊咗？」阿爸嘅說話繼續讓時間流動。「即係咩意思⋯⋯」

「我哋拍緊拖。」我好正經咁講。

「喂⋯表哥⋯你唔係話⋯」小南輕扯住我嘅衫袖。

「阿爸知道都冇所謂啦。」我向小南話。

「原來你真係搵到你覺得好好嘅人。」阿爸異常地平淡咁講。





我記得當初，阿爸開玩笑咁叫我唔好打表妹主意，雖然最後我哋都一齊咗，但唔知道佢點睇呢。

佢接受得到嗎？

「阿爸！」我認真咁講：「係我追表妹先㗎！如果你要鬧就鬧我啦！」

「哈⋯哈⋯」阿爸又忽然笑起嚟。

「嗯？」





「我點會鬧你呀？開心都嚟唔切啦，原來我冇估錯⋯⋯小南同你真係⋯⋯」

「你⋯冇估錯？」

「哈⋯你哋成日眉來眼去，咁明顯點會唔知呀？」

「哦⋯」說起慚愧，有時同小南喺阿爸面前嘅假裝確係太誇張。「但係你唔嬲咩？」

「嬲咩呢？多個新抱仔唔好咩？哈⋯我都老啦，有個人陪你都好正常啫，同埋如果老婆知道咗⋯我估在天之靈都好開心。」阿爸講起媽媽，有一種釋懷嘅感覺。

估唔到阿爸如此通情達理⋯⋯

咁以後我同小南都不必再偷偷摸摸。

「阿爸⋯⋯你⋯⋯」





「星仔，你大個仔㗎啦，條路點行係你自己揀，唔使受人影響㗎，唔開心嘅嘢咪忘記晒佢囉，同埋我真係好耐冇見過你笑，係小南嚟咗你先至會笑返，所以我點解要反對呀？」阿爸向住我微笑，久違嘅笑容係對我無聲嘅支持。

「阿爸⋯⋯我⋯⋯」不自覺地有啲想喊，好想衝過去攬住阿爸錫佢幾啖，都諗起好似有啲基，所以都係好簡單咁講一聲：「好多謝你呀。」

要是「多謝」可以表達愛意。

同樣嘅「多謝」亦可以表達我對親人嘅愛。