《台灣個表妹嚟咗我屋企住》【完】: (一百一十四)唔再暪落去

溫馨嘅屋企，有三個人正品嚐住平凡嘅幸福。

「表哥，食舊雞翼啦。」小南笑嘻嘻咁夾咗舊雞翼畀我。

「你都食啦表妹。」說罷，我都禮尚往來，夾咗舊畀佢。

「嘻⋯⋯唔該表哥。」

同小南一邊食飯，一邊以眉目傳情，快活得忘形，差啲唔記得咗在場嘅阿爸。





「阿爸你都食啦。」

「星仔⋯」阿爸帶啲傷感咁問：「你冇事呀嘛？」

「我冇事呀⋯」我有啲愕然。

想必係我尋晚發生嘅事情嚇親阿爸。

「我都知⋯自從⋯走咗之後你一直都好唔開心，係我呢個老竇畀唔到幸福你⋯⋯」阿爸越講越憂愁，如此煽情嘅佢，我都係第一次見到。





「唔關心你事呀，我依家生活得好開心呀。」我話。「你一直都照顧得我無微不至，唔係咩？你盡哂責任㗎啦。」

的確，如果唔計外賣，阿爸呢個崗位已經非常之稱職，一路盡力去守住呢個有啲殘缺嘅家庭，盡力去畀我擁有家庭幸福。

「唔止㗎。」阿爸悔疚地話：「阿爸又唔識點同你溝通，所以每次同你食外賣我都特登講啲嘢，唔想同你零溝通，我知你一定好孤獨、好辛苦，連一個可以安慰你嘅人都冇。」

阿爸少有地一面嚴肅咁同我講嘢，但一講就講啲咁心噏嘅嘢。

但佢講得冇錯，我真係一直都覺得好辛苦。





好想搵個人同我傾計，安慰下我，將我所有嘅心事毫無保留咁向嗰個人分享。

不過阿爸有啲講錯，其實嗰個人我已經搵到。

「阿爸⋯⋯我有樣想同你講。」

「嗯？」

事到如今，都冇必要再暪落去。

我抖咗啖氣，然後再講：

「我同咗小南一齊。」